பிப்ரவரி 17, 2024
திருநீற்றுப் புதனுக்குப் பின்வரும் சனிக்கிழமை
இன்றைய வாசகங்கள்
மரியன்னையின் ஊழியர் சபையை நிறுவிய புனிதர்கள் எழுவர்—விருப்ப நினைவு
சுங்கச் சாவடியில் அமர்ந்திருந்த லேவி என்னும் வரிதண்டுபவரை இயேசு கண்டார். அவர் அவரிடம், “என்னைப் பின்பற்றி வா” என்றார். அவர் அனைத்தையும் விட்டுவிட்டு எழுந்து இயேசுவைப் பின்பற்றிச் சென்றார். லூக்கா 5:27–28
லேவி வசதியாக வாழ்ந்து வந்தார். வரிதண்டுபவராக அவருக்கு நல்ல வருமானமும் நிலையான வேலையும் இருந்தன. ஆனால், இயேசுவைப் பின்பற்றுவதற்காக ஒரே கணத்தில் அவை அனைத்தையும் விட்டுவிட்டார்; உடனே அவரது வாழ்வு நன்மையை நோக்கி மாறியது.
லேவியின் அழைப்பைப் பற்றிய இந்தச் சிறிய நிகழ்வை நாம் கவனத்தில் கொள்ள வேண்டும். கிறிஸ்துவைப் பின்பற்றுவதற்கான முடிவை நீங்கள் பெரும்பாலும் ஏற்கெனவே எடுத்திருக்கலாம். இருப்பினும், அந்த முடிவு ஒவ்வொரு நாளும் மேலும் ஆழப்படுத்தப்பட வேண்டும். அவ்வாறு செய்ய லேவியின் சாட்சியம் உங்களுக்கு ஊக்கமளிக்க வேண்டும்.
பல வேளைகளில், தம்மோடு இன்னும் ஆழமான, நெருக்கமான உறவுக்கு இறைவன் நம்மை அழைப்பதை உணரும்போதும், நாம் இன்னும் முழுமையாகத் தம்மைப் பின்பற்ற வேண்டுமென அவர் விரும்புவதை உணரும்போதும், நாம் சற்றுத் தயங்கி நிற்கக்கூடும். நம்பிக்கையோடு முன்னெடுத்துச் செல்வதற்கு முன், அத்தகைய முடிவைப் பற்றி நன்கு சிந்தித்து, அதன் “சாதக பாதகங்களை” எடைபோட மக்கள் விரும்புவது இயல்பே. ஆனால், நீங்கள் அவ்வாறு செய்யாதீர்கள். மற்ற அனைத்தையும் விட்டுவிட்டுக் கிறிஸ்துவைப் பின்பற்ற லேவி உடனடியாக எடுத்த முடிவின் சாட்சியம், நாமும் அவ்வாறே செய்ய அழைப்பதற்காக நமக்கு அளிக்கப்பட்டுள்ளது.
லேவியைப் போல முழுமையாகத் தம்மை அர்ப்பணிக்க இயேசு இன்று உங்களை எவ்வாறு அழைக்கிறார்? அன்போடும் முழு அர்ப்பணிப்போடும் அவருக்கு இன்னும் நிறைவாகப் பணிபுரிய, எதை விட்டுவிட்டு வருமாறு அவர் உங்களை அழைக்கிறார்? அந்தக் கேள்விக்கான பதில் உங்களுக்குத் தெரியாவிட்டாலும், நம் ஆண்டவரிடம் “ஆம்” என்று சொல்லுங்கள். லேவியைப் பின்பற்ற விரும்புவதாகவும், அவரது திருவுளத்தை முழுமையாகவும் எவ்விதத் தயக்கமின்றியும் பின்பற்ற உங்களை முழு மனதோடு அர்ப்பணிக்க விரும்புவதாகவும் அவரிடம் சொல்லுங்கள்.
இயேசுவைப் பின்பற்ற முடிவு செய்த உடனேயே, லேவி தமது வீட்டில் இயேசுவுக்கும் மற்ற வரிதண்டுபவர்களுக்கும் விருந்து அளித்தார் என்பதும் கவனிக்கத்தக்கது. தாம் எடுத்த முடிவைப் பிறர் அறிந்துகொள்ள லேவி அஞ்சவில்லை; தம் நண்பர்களும் அவ்வாறே செய்ய அவர்களுக்கு ஒரு வாய்ப்பை அளிக்க விரும்பினார்.
இன்று, லேவியையும் அவர் பெற்ற அழைப்பையும் குறித்துச் சிந்தியுங்கள். இந்தத் தவக்காலத்தை நீங்கள் தொடங்கும்போது, லேவி பெற்ற அழைப்பையும் அதற்கு அவர் அளித்த பதிலையும், இயேசு உங்களை அழைப்பதைக் கேட்பதற்கான ஒரு வாய்ப்பாகப் பயன்படுத்திக்கொள்ளுங்கள். உண்மையிலேயே “அனைத்தையும் விட்டுவிட்டுச் செல்ல” நீங்கள் அழைக்கப்படாமல் இருக்கலாம்; இருப்பினும், அவ்வாறு செய்ய நீங்கள் தயாராக இருப்பதை வெளிப்படுத்துங்கள். நம் ஆண்டவரைப் பின்பற்றுவதற்கான உங்கள் முடிவுக்கு எந்த நிபந்தனையும் விதிக்காதீர்கள்; அவ்வாறு செய்ததற்காக நீங்கள் நித்தியமும் நன்றியுள்ளவர்களாக இருப்பீர்கள்.
என் அருமை ஆண்டவரே, எவ்விதத் தயக்கமுமின்றி உம்மைப் பின்பற்ற உம் பிள்ளைகள் அனைவரையும் நீர் அழைக்கிறீர். இன்னும் மிகுதியானவற்றைப் பெற்றுக்கொள்ளும்பொருட்டு, இவ்வாழ்வு தரக்கூடிய அனைத்தையும் கைவிடத் தயாராகவும் மனமுள்ளவர்களாகவும் இருக்க எங்களை அழைக்கிறீர். இன்றும் நாளையும் எல்லா நாட்களிலும் உமக்கு “ஆம்” என்று சொல்லும் அளவுக்கு உம்மை நம்புவதற்குத் தேவையான அருளை எனக்குத் தாரும். அன்பு ஆண்டவரே, என் வாழ்வு உமதே. உமது விருப்பப்படியே என்னை நடத்தும். இயேசுவே, உம்மீது நம்பிக்கை வைக்கிறேன்.
நான்காம் நாள் தியானங்கள்:
பாலைநிலத்தில் 40 நாள்கள் & சிலுவையடியில் 40 நாள்கள்
தவக்காலத்திற்கான திருவிவிலியத் தியானங்கள்
அனைத்துப் புனிதர்கள்/திருவிழாக்கள்
இன்றைய புனிதர் – மரியன்னையின் ஊழியர் சபையை நிறுவிய ஏழு புனிதர்கள்
திருப்பலி வாசிப்புகளுக்கான தெரிவுகள்
