తెలుగు

పవిత్ర త్రిత్వం అంతర్నివాసం

మే 11, 2020
పాస్కా కాలం ఐదవ వారంలోని సోమవారం
నేటి పఠనాలు

ఆంగ్లంలో వినండి

“ఎవరు నన్ను ప్రేమిస్తారో వారు నా వాక్యాన్ని పాటిస్తారు, నా తండ్రి వారిని ప్రేమిస్తారు, మేము వారి వద్దకు వచ్చి వారితో నివాసముంటాము.”  యోహాను 14:23

పిల్లలకు ఈ విషయం అర్థమైనట్లే అనిపిస్తుంది.  దేవుడు తమ హృదయాల్లో నివసిస్తున్నారని వారు గ్రహించినట్లే కనిపిస్తుంది.  అయితే, ఈ విషయం తమకెలా తెలుసని మీరు వారిని అడిగితే, వారు అయోమయంగా మీవైపు చూస్తూ, ఎలా జవాబివ్వాలో తెలియక ఉండవచ్చు.  అయినప్పటికీ, ఏదో విధంగా దేవుడు తమలో నివసిస్తున్నారని వారు గ్రహిస్తారు.

అయితే, “దేవుడు వచ్చి మీలో నివాసమేర్పరచుకుంటారని మీకెలా తెలుసు?” అని ఎవరైనా మిమ్మల్ని అడిగితే మీరేమంటారు?  మన విశ్వాసంలోని ఈ అద్భుతమైన రహస్యాన్ని వర్ణించడానికి బహుశా మీకు కూడా మాటలు దొరకకపోవచ్చు.  ఇది నిజమని మీరు విశ్వసిస్తున్నారా?  దేవుడు మీ హృదయాన్ని, ఆత్మను తన నివాసస్థలంగా చేసుకోవాలని కోరుకుంటున్నారని మీరు విశ్వసిస్తున్నారా?  అలా అయితే, ఇది ఎలా జరుగుతుంది?

విశ్వాసమనే వరం ద్వారా, చిన్నపిల్లల్లాగే మనకు కూడా దేవుడు మనలో నివసించాలని కోరుకుంటున్నారని తెలుసు.  మన ఆత్మలను తన సొంతం చేసుకోవాలని, మనతో మాట్లాడాలని, మనల్ని బలపరచాలని, నడిపించాలని, మనకు దారి చూపాలని ఆయన కోరుకుంటున్నారని మనకు తెలుసు.  దేవుడు నిజంగా ఉన్నారని, మనతో అత్యంత గాఢమైన, సన్నిహితమైన సంబంధాన్ని కోరుకుంటున్నారని విశ్వాసమనే వరం ద్వారా మనకు తెలుసు.  అది మనకు తెలుసు, అంతే.

శుభవార్త ఏమిటంటే, విశ్వాసం అవగాహనకు దారితీస్తుంది.  అంటే, మనలో మాట్లాడుతూ, మనల్ని నడిపిస్తూ, మనకు దారి చూపుతున్న దేవుని స్వరాన్ని మనం ఎంత శ్రద్ధగా ఆలకిస్తామో, అంతగా మనలో నివసించే ఆయన సాన్నిధ్యాన్ని అర్థం చేసుకోవడం మొదలుపెడతాం.  పునీత అగుస్తీను చెప్పినట్లుగా, “మీకు కనిపించనిదాన్ని నమ్మడమే విశ్వాసం. మీరు నమ్మేదాన్ని చూడటమే విశ్వాసానికి లభించే ప్రతిఫలం.”  మనలో నివసించే దేవుని సాన్నిధ్యంపై విశ్వాసం, పై ప్రశ్నకు జవాబు వైపు మనల్ని నడిపిస్తుంది.  ఆ జవాబును దేవుడు, దేవుడు మాత్రమే మనకు ఇవ్వగలరు.  మన విశ్వాసాన్ని ఇతరులతో పంచుకోవచ్చు, మన జీవితాల్లో ఆయన సాన్నిధ్యానికి సాక్ష్యమివ్వవచ్చు, విశ్వాసం ద్వారా మన చుట్టూ ఉన్నవారికి ఆ ప్రశ్నకు జవాబు ఇవ్వవచ్చు.  దేవుడు నాలో నివసిస్తున్నారని నాకెలా తెలుసు?  జవాబు ఇదే: ఎందుకంటే నేను ఆయనను అక్కడ చూస్తున్నాను, అక్కడ ఆయనతో మాట్లాడుతున్నాను, ఆయన నాతో మాట్లాడుతున్నారు.  

మీలో నివసిస్తున్న ప్రభువును గురించి ఈ రోజు ధ్యానించండి.  ఆయన మీతో మాట్లాడనివ్వండి. మరింత గాఢమవుతూ సాగే ఆ సంభాషణలో, మీలో నివసించే ఆయన సాన్నిధ్యం వృద్ధిచెంది, ఇతరులకు వెల్లడయ్యేలా అనుమతించండి.  దేవుడు మీలో నివసించాలని మాత్రమే కాదు, మీ ద్వారా ప్రకాశించాలని కూడా కోరుకుంటున్నారు.

ప్రభువా, వచ్చి నా హృదయంలో నివసించు.  నా హృదయాన్ని నీ నివాసస్థలంగా చేసుకో.  అక్కడ నిన్ను చూడటానికి, అక్కడ నిన్ను కలుసుకోవడానికి, నీతో సంభాషించడానికి, నా ఆత్మలో నిన్ను ప్రేమించడానికి నాకు సహాయం చేయి.  యేసూ, నేను నీపై నమ్మకం ఉంచుతున్నాను.

మరిన్ని సువార్త ధ్యానాలు

దైవకారుణ్య ధ్యానాలు

నేటి పునీతులు/పండుగలు

దివ్యబలిపూజ పఠనాల ఎంపికలు

చిత్రం: గ్వెర్చినో చిత్రించిన తండ్రియైన దేవుడు మరియు దేవదూత


దైవైక్యానికి మార్మిక యాత్ర:
సిలువ పునీత యోహాను అందించే ఆధ్యాత్మిక జ్ఞానం