డిసెంబరు 1, 2020
ఆగమనకాలపు మొదటి వారంలోని మంగళవారం
నేటి పఠనాలు

ఆంగ్లంలో వినండి
శిష్యుల వైపు తిరిగి, ఆయన వారితో ఏకాంతంగా ఇలా అన్నారు: “మీరు చూస్తున్నవాటిని చూసే కన్నులు ధన్యమైనవి. ఎందుకంటే నేను మీతో చెబుతున్నాను, ఎంతోమంది ప్రవక్తలు, రాజులు మీరు చూస్తున్నవాటిని చూడాలని ఆశించారు, కాని చూడలేదు; మీరు వింటున్నవాటిని వినాలని ఆశించారు, కాని వినలేదు.” లూకా 10:23–24
శిష్యులు ఏమి చూడటం వల్ల వారి కన్నులు “ధన్యమైనవి” అయ్యాయి? మన ప్రభువును చూడగలగడం వల్లనే వారు ధన్యులయ్యారనేది స్పష్టం. పూర్వకాలపు ప్రవక్తలు, రాజులు ఎవరి రాక గురించి వాగ్దానం చేశారో ఆ వ్యక్తి యేసే. ఇప్పుడు శిష్యులు ఆయనను చూడగలిగేలా ఆయన రక్తమాంసాలతో వారి సమక్షంలో ఉన్నారు. దాదాపు 2,000 సంవత్సరాల క్రితం శిష్యులు మన ప్రభువును “చూసిన” విధంగా చూసే భాగ్యం మనకు లేకపోయినా, మనకు “చూడగల కన్నులు”, వినగల చెవులు ఉంటే చాలు, మన దైనందిన జీవితంలో లెక్కలేనన్ని ఇతర మార్గాల్లో ఆయనను చూసే భాగ్యం మనకు ఉంది.
యేసు ఈ భూమిపై మానవ శరీరంతో ప్రత్యక్షమైన కాలం నుండి ఎంతో మారిపోయింది. కాలక్రమేణా అపొస్తలులు పవిత్రాత్మతో నింపబడి, ప్రపంచాన్ని మార్చే ప్రేషిత కార్యానికి పంపబడ్డారు. సభ స్థాపించబడింది, దివ్యసంస్కారాలు నెలకొల్పబడ్డాయి, క్రీస్తు బోధనాధికారం వినియోగించబడింది, అసంఖ్యాకమైన పునీతులు తమ జీవితాలతో సత్యానికి సాక్ష్యమిచ్చారు. గడచిన 2,000 సంవత్సరాలుగా క్రీస్తు లెక్కలేనన్ని మార్గాల్లో ప్రపంచానికి నిరంతరం వెల్లడవుతూ ఉన్నారు.
నేడు కూడా క్రీస్తు మన మధ్య ఉన్నారు; మన ఎదుట నిలిచి ఉంటూనే ఉన్నారు. మనకు విశ్వాసంతో చూసే కన్నులు, వినే చెవులు ఉంటే, మనం ఏ రోజూ ఆయనను గుర్తించకుండా ఉండము. నేడు ఆయన మనతో మాట్లాడే, మనలను నడిపించే, మనకు దారి చూపే లెక్కలేనన్ని మార్గాలను మనం చూసి అర్థం చేసుకుంటాము. ఇలా చూడగలిగే, వినగలిగే వరాన్ని పొందడానికి మొదటి మెట్టు మీ కోరిక. మీరు సత్యాన్ని కోరుకుంటున్నారా? క్రీస్తును చూడాలని కోరుకుంటున్నారా? లేక అత్యంత వాస్తవమైనది, జీవితాన్ని అత్యంతగా మార్చగలిగేది ఏదో దాని నుండి మీ దృష్టిని మరల్చడానికి ప్రయత్నించే జీవితంలోని అనేక గందరగోళాలతోనే సంతృప్తి చెందుతున్నారా?
ఈ రోజు మీ కోరిక గురించి ధ్యానించండి. పూర్వకాలపు ప్రవక్తలు, రాజులు మెస్సీయను చూడాలని “కోరుకున్నారు.” నేడు ఆయన సజీవంగా మన సమక్షంలో ఉంటూ, మనతో మాట్లాడుతూ, మనలను నిరంతరం పిలుస్తూ ఉండటం మనకు లభించిన భాగ్యం. మన ప్రభువు పట్ల ఆకాంక్షను మీలో పెంపొందించుకోండి. సత్యమైనదంతా, మంచిదంతా తనలో లీనం చేసుకోవాలని తపించే ప్రజ్వలిత జ్వాలగా ఆ ఆకాంక్ష మారనివ్వండి. దేవుణ్ణి కోరుకోండి. ఆయన సత్యాన్ని కోరుకోండి. మీ జీవితాన్ని నడిపించే ఆయన హస్తాన్ని కోరుకోండి; మీరు ఊహించగలిగిన దానికంటే మిన్నగా మిమ్మల్ని దీవించడానికి ఆయనకు చోటివ్వండి.
నా దివ్య ప్రభువా, నేడు నీవు సజీవంగా ఉన్నావనీ, నాతో మాట్లాడుతూ, నన్ను పిలుస్తూ, నీ మహిమాన్విత సాన్నిధ్యాన్ని నాకు వెల్లడిస్తున్నావనీ నాకు తెలుసు. నిన్ను కోరుకోవడానికి, ఆ కోరికతో నా పూర్ణహృదయంతో నీ వైపు తిరగడానికి నాకు సహాయం చేయి. నా ప్రభువా, నేను నిన్ను ప్రేమిస్తున్నాను. నిన్ను మరింతగా ప్రేమించడానికి నాకు సహాయం చేయి. యేసూ, నేను నీపై నమ్మకం ఉంచుతున్నాను.
మరియమ్మ జన్మపాపరహిత గర్భధారణకు నవదిన ప్రార్థన
నవంబర్ 29-డిసెంబర్ 7
పైన ఉన్న ప్రధాన చిత్రం: యేసు తన శిష్యులతో సంభాషిస్తున్నారు — జేమ్స్ టిస్సో
ఆగమనకాలం మరియు క్రిస్మస్ ధ్యానాలు
పేపర్బ్యాక్ & ఈ-పుస్తకం
Amazon.com – గూగుల్ ప్లే – ఐట్యూన్స్ – బార్న్స్ అండ్ నోబుల్





