తెలుగు

యేసు పాదాలకు సుగంధతైలంతో అభిషేకం

ఏప్రిల్ 11, 2022
పవిత్ర వారంలోని సోమవారం
నేటి పఠనాలు

వీడియో

ఆంగ్లంలో వినండి

మరియ స్వచ్ఛమైన జటామాంసితో చేసిన ఖరీదైన సుగంధతైలాన్ని ఒక లీటరు తీసుకొని, యేసు పాదాలకు అభిషేకించి, తన తలవెంట్రుకలతో ఆయన పాదాలను తుడిచింది; ఆ తైలపు సువాసనతో ఇల్లంతా నిండిపోయింది.  యోహాను 12:3

యేసు పట్ల ఎంత వినయపూర్వకమైన, అందమైన ప్రేమచర్య ఇది!  ఈ సుగంధతైలం విలువ 300 రోజుల కూలికి సమానం.  అది ఎంతో పెద్ద మొత్తం!  దానిని అమ్మి, ఆ డబ్బును పేదలకు ఇవ్వాల్సిందని తనకు అనిపించిందంటూ యూదా ఈ చర్యను వ్యతిరేకించడం గమనించదగ్గ విషయం.  అయితే, యూదా డబ్బు సంచి నుండి దొంగిలిస్తుండేవాడు కాబట్టి, నిజానికి అతనికి ఆసక్తి ఉన్నది తన కోసం ఆ డబ్బుపైనే అని సువార్త స్పష్టంగా చెబుతోంది.  అంతకంటే ఎక్కువగా గమనించవలసినది యూదాకు యేసు ఇచ్చిన సమాధానం.  యేసు యూదాను మందలిస్తూ ఇలా అంటారు: “ఆమెను వదిలిపెట్టు. నా సమాధి దినం కోసం ఆమె దీన్ని ఉంచుకోనివ్వు. పేదలు ఎల్లప్పుడూ మీతో ఉంటారు, కానీ నేను ఎల్లప్పుడూ మీతో ఉండను.”

ఇదే మాట మరెవరైనా చెప్పి ఉంటే, అది స్వార్థంతో చెప్పినట్లుగా వినిపించేది.  కానీ ఆ మాట చెప్పింది యేసు; ఆయన ప్రేమలో పరిపూర్ణమైన నిస్వార్థం ఉంది.  మరి దీని అంతరార్థం ఏమిటి?  మరియకు ఏమి అవసరమో యేసుకు తెలుసు అన్నదే దాని అంతరార్థం.  ఆయన ఆ మాటలు చెప్పడం ద్వారా మనలో ప్రతి ఒక్కరికీ ఏమి అవసరమో వెల్లడించారు.  మనం ఆయనను ఆరాధించాలి, గౌరవించాలి, మన జీవితాలకు ఆయననే కేంద్రంగా చేసుకోవాలి.  ఆయన ఎదుట మనల్ని మనం తగ్గించుకొని, ఆయనకు సేవ చేయాలి.  మనం ఆయన పట్ల ఇలా ప్రవర్తించడం ఆయనకు అవసరం కాబట్టి కాదు, మనకు ఆయన పట్ల ఇలా ప్రవర్తించవలసిన అవసరం ఉంది కాబట్టి.  మన సొంత పవిత్రత, సంతోషం కోసం మనం చేయవలసినది వినయంతో, ప్రేమతో ఆయనను గౌరవించడమే.  యేసుకు ఇది తెలుసు; అందుకే మరియ చేసిన ఈ ప్రేమచర్యను బట్టి ఆయన ఆమెను గౌరవించారు.

ఈ సంఘటన మనల్ని కూడా అలాగే చేయమని ఆహ్వానిస్తోంది.  యేసువైపు దృష్టి సారించి, మన ఆరాధనకు, ప్రేమకు ఆయననే కేంద్రంగా చేసుకోమని ఆహ్వానిస్తోంది.  మన శ్రమనంతటినీ ఇష్టపూర్వకంగా ఆయన కోసం ధారపోయమని ఆహ్వానిస్తోంది (300 రోజుల కూలికి సమానమైన విలువగల సుగంధతైలం దీనికి సూచనగా ఉంది).  యేసు కోసం ఎంత ఖరీదైనది సమర్పించినా అది ఎక్కువ కాదు.  మనం చేసే ఒక్క ఆరాధనా కార్యం కంటే విలువైనది ఏదీ లేదు.

దేవుణ్ణి ఆరాధించడం సముచితం.  అన్నిటికంటే ముఖ్యంగా, మీరు ఏ వ్యక్తిగా ఉండాలని సృజించబడ్డారో ఆ వ్యక్తిగా మిమ్మల్ని మార్చే కార్యం అది.  దేవుణ్ణి పూజించడానికి, ఆరాధించడానికి మీరు సృజించబడ్డారు; మీ సమస్త అస్తిత్వంతో వినయంగా మన ప్రభువును గౌరవించినప్పుడు ఈ ఉద్దేశం నెరవేరుతుంది.  

మన ప్రభువు పట్ల మీ ఆరాధన ఎంత లోతుగా ఉందో నేడు ధ్యానించండి.  మీ జీవనాధారమంతటినీ ఆయనపై “ధారపోయడానికి” మీరు సిద్ధంగా ఉన్నారా?  మీ దృష్టిలో ఆయన విలువ 300 రోజుల కూలికంటే ఎక్కువేనా?  మీ జీవితంలో ఆయనకే అత్యంత ప్రధాన స్థానం ఉందా?  ప్రతిరోజూ ఆయన ఎదుట మిమ్మల్ని మీరు తగ్గించుకొని, ప్రార్థనలో మీ హృదయాన్ని ఆయన ముందు ధారపోస్తున్నారా?  మరియ యేసుకు అర్పిస్తున్న ఈ వినయపూర్వక ఆరాధనా కార్యాన్ని ధ్యానించి, ఆమె అందమైన ఆదర్శాన్ని అనుసరించడానికి ప్రయత్నించండి.

ప్రభువా, పరిశుద్ధురాలైన ఈ మరియ ఆదర్శాన్ని నేను అనుసరించేలా చేయి.  నీ సన్నిధిలో నన్ను నేను తగ్గించుకొని, నా జీవితమంతటితో నిన్ను గౌరవించేందుకు నాకు సహాయం చేయి.  ప్రియ ప్రభువా, జీవితంలో నీకంటే, నిన్ను సంపూర్ణంగా ఆరాధించడంకంటే ముఖ్యమైనది ఏదీ లేదు.  ప్రియ ప్రభువా, నన్ను నీ చెంతకు ఆకర్షించు, నీ మహిమ ఎదుట నన్ను వినమ్రంగా ఉంచు; నా సమస్త అస్తిత్వంతో నిన్ను ప్రేమించి ఆరాధించేందుకు నాకు సహాయం చేయి.  యేసూ, నేను నీపై నమ్మకం ఉంచుతున్నాను.

మన ధన్యమాత హృదయం నుండి ప్రేమపూర్వక దృష్టి
ముప్పై ఎనిమిదవ ధ్యానం – సైనికుని ఈటె
(పవిత్ర వారంలోని సోమవారం)

మరిన్ని సువార్త ధ్యానాలు

దైవకారుణ్య ధ్యానాలు

తపస్సుకాలం కోసం వనరులు

తపస్సు కాలానికి పవిత్ర గ్రంథ ధ్యానాలు

పవిత్ర వారపు ప్రార్థనలు

పునీతులందరూ/పండుగలు

నేటి పునీతులు – పునీత స్టానిస్లాస్, బిషప్పు మరియు వేదసాక్షి
(ఈ సంవత్సరం పవిత్ర వారంలో రావడం వల్ల ప్రార్థనావిధిలో స్మరణ దినంగా జరుపుకోరు)

దివ్యబలిపూజ పఠనాల ఎంపికలు

పైన ప్రదర్శించిన చిత్రం: పరిసయ్యుడైన సీమోను ఇంట క్రీస్తు — చిత్రకారుడు పీటర్ పాల్ రూబెన్స్, వికీమీడియా కామన్స్ ద్వారా