నవంబర్ 4, 2023
సామాన్య కాలపు ముప్పయ్యవ వారంలోని శనివారం
నేటి పఠనాలు
పునీత చార్లెస్ బొరోమియో, పీఠాధిపతి—స్మరణ

ఆంగ్లంలో వినండి
“ఎవరైనా మిమ్మల్ని వివాహ విందుకు ఆహ్వానించినప్పుడు, గౌరవస్థానంలో కూర్చోవద్దు. మీకంటే ఘనతగల అతిథిని కూడా అతడు ఆహ్వానించి ఉండవచ్చు. మీ ఇద్దరినీ ఆహ్వానించిన విందు యజమాని మీ దగ్గరకు వచ్చి, ‘మీ స్థానాన్ని ఈయనకు ఇవ్వండి’ అని అనవచ్చు. అప్పుడు మీరు సిగ్గుతో వెళ్లి అతి తక్కువ స్థానంలో కూర్చోవలసి వస్తుంది.” లూకా 14:8–9
ఇది ఆసక్తికరమైన ఉపమానం. ముందుగా, నిజమైన పునీతులు ఇటువంటి అవమానం వల్ల సిగ్గుపడరని గమనించాలి. బదులుగా, వారు తమ గౌరవస్థానాన్ని సంతోషంగా మరొకరికి ఇస్తారు. నిజానికి, వారు మొదట్లోనే “అతి తక్కువ” స్థానాన్ని ఎంచుకునే అవకాశమే ఎక్కువ. ఎందుకంటే ఈ విధమైన లోక గౌరవానికి వారి దృష్టిలో ఏ విలువా ఉండదు. అయితే యేసు ఆ సమయంలో పునీతులుగా జీవిస్తున్నవారితో మాట్లాడటం లేదు. లోకంలో గౌరవం పొందాలనే కోరికలతో పోరాడుతున్న ప్రజలతో ఆయన మాట్లాడుతున్నారు. యేసు ఎవరితో మాట్లాడుతున్నారో, వారిలో అభద్రతాభావం కూడా ఉందనీ, ఆరోగ్యకరమైన ఆత్మగౌరవం లోపించిందనీ ఇది చూపిస్తుంది.
ఇందులో అందమైన విషయం ఏమిటంటే, యేసు ఈ ప్రజలున్న స్థితిని అర్థం చేసుకుని, వారికి అన్వయించుకోగల ఉపమానాన్ని చెబుతున్నారు. వీరు ప్రముఖ పరిసయ్యులలో ఒకరు ఏర్పాటు చేసిన విందుకు వచ్చిన అతిథులు. ఆ విందుకు యేసు కూడా ఆహ్వానించబడ్డారు. గర్వం కంటే వినయం ఎంతో మేలైనదనే సత్యాన్ని వారికి సున్నితంగా తెలియజేయడమే యేసు ఉద్దేశం. తమను తాము తగ్గించుకుని, ఇతరులను ఉన్నతంగా నిలబెట్టడం ద్వారా, వ్యక్తులుగా వారిలో సహజంగా ఉన్న గౌరవాన్నీ విలువనూ చాటినప్పుడు నిజమైన ఆనందోత్సాహమూ గౌరవమూ లభిస్తాయి. ఇది నేర్చుకోవడానికి కష్టమైన పాఠం.
చాలామంది ఇతరులతో కలిసి ఉన్నప్పుడు, తమను ఇతరులతో పోల్చుకునే ధోరణితో పోరాడుతుంటారు. “ఆమె మరింత అందంగా ఉంది” లేదా “అతను మరింత విజయవంతుడయ్యాడు” లేదా “వారు బాగా చదువుకున్నారు” మొదలైనవి. ఒక వ్యక్తిగా తాము ఎవరనే విషయంలో అభద్రతాభావం ఉండటం వల్లనే ఈ సాధారణ ధోరణి తరచుగా కలుగుతుంది. అయితే, మీరు మీ వ్యక్తిత్వాన్ని పూర్తిగా అంగీకరించి ప్రశాంతంగా ఉండగలిగితే, దేవుడు మిమ్మల్ని ప్రేమించినట్లుగా మిమ్మల్ని మీరు ప్రేమించుకోగలిగితే, ఇతరులను ప్రేమించడానికి, వారి గౌరవాన్ని గుర్తించడానికి, వారు విజయాన్ని సాధించి ఉన్నతస్థితికి చేరుకున్నప్పుడు సంతోషించడానికి కూడా మీకు మరింత స్వేచ్ఛ ఉంటుంది.
యేసు తన ఉపమానాన్ని ఈ మాటలతో ముగిస్తున్నారు: “తమను తాము హెచ్చించుకునే ప్రతి ఒక్కరూ తగ్గింపబడతారు; కానీ తమను తాము తగ్గించుకునేవారు హెచ్చింపబడతారు.” సాధారణ లౌకిక దృక్పథంతో ఆలోచించేవారికి ఈ సత్యాన్ని గ్రహించడం కష్టంగా ఉండవచ్చు. వినయం ఎంత విలువైనదో అర్థం చేసుకోవడం కష్టంగా ఉండవచ్చు. అయితే వినయం అంటే సత్యపు వెలుగులో, దేవుడు మిమ్మల్ని చూసే విధంగా, మిమ్మల్ని మీరు చూసుకోవడమే. వినయంగలవారికి ఇతరుల ప్రశంసలు, గౌరవం అవసరం లేదు. తమపట్ల దేవునికున్న ప్రేమ వారికి చాలు. అందువల్ల వినయంగలవారు దేవుడు తమను ప్రేమించినట్లే తమను తాము ప్రేమించుకోవడమే కాక, ఇతరుల మేలుపై తమ దృష్టిని పూర్తిగా కేంద్రీకరించడానికి స్వేచ్ఛ కలిగి ఉంటారు. ఇదే స్వచ్ఛమైన ప్రేమ. వినయాన్ని సంపూర్ణంగా ఆచరించినప్పుడే ఈ ప్రేమ సాధ్యమవుతుంది.
వినయం ఎంతో కొరవడినవారికి యేసు ఇచ్చిన ఈ మృదువైన బోధను గురించి ఈ రోజు ధ్యానించండి. వారిపట్ల యేసుకున్న శ్రద్ధను, వారిని సిగ్గుపరచాలని కాకుండా వారి అభద్రతాభావాల పెనుభారం నుండి వారిని విముక్తులను చేయాలన్న ఆయన కోరికను గుర్తించడానికి ప్రయత్నించండి. మీరు కూడా ఈ విషయంలో పోరాడుతుంటే, వినయాన్ని అలవరచుకోమని మన ప్రభువు మిమ్మల్ని మృదువుగా ఆహ్వానిస్తున్నారని ధ్యానించండి. ఈ సద్గుణం కోసం ప్రార్థించండి; దానిని చిత్తశుద్ధితో ఆచరించండి. ఈ సద్గుణాన్ని పొందడం మీ జీవితంలో ఎంతో స్వేచ్ఛకు ద్వారం తెరుస్తుందని తెలుసుకోండి.
వినయమూర్తివైన నా ప్రభువా, నీవు నిన్ను నీవు పరిపూర్ణంగా తెలుసుకున్నావు; పరలోకపు తండ్రి నిన్ను ప్రేమించిన అదే ప్రేమతో నీ పవిత్రమైన ఆత్మను నీవు ప్రేమించుకున్నావు. నేను ఎవరినో తెలుసుకోవడానికి దయచేసి నాకు సహాయం చేయి. నీవు నన్ను చూసే విధంగా నన్ను నేను చూసుకోవడానికి సహాయం చేయి. భూలోక సత్కారాలకూ లోక గౌరవానికీ సంబంధించిన వక్రమైన కోరిక నాకు ఎన్నడూ భారంగా మారనీయకు. బదులుగా, వినయం అనే ఈ మహిమాన్వితమైన వరం నా ఆత్మలో లోతుగా జీవించాలని ప్రార్థిస్తున్నాను. యేసూ, నేను నీపై నమ్మకం ఉంచుతున్నాను.
సామాన్య కాలానికి పవిత్ర గ్రంథ ధ్యానాలు
నేటి పునీతులు – పునీత చార్లెస్ బొర్రోమియో, బిషప్పు




