Pebrero 20, 2024
Martes sa Unang Linggo ng Kuwaresma
Mga Pagbasa para sa Araw na Ito
Sinabi ni Hesus sa Kanyang mga alagad: “Sa inyong pagdarasal, huwag kayong magdaldal na gaya ng mga pagano, na nag-aakalang pakikinggan sila dahil sa dami ng kanilang sinasabi. Huwag kayong tumulad sa kanila. Matthew 6:7–8
Alalahanin na may mga pagkakataong lumalayo si Hesus upang mapag-isa at magdamag na nananalangin. Kaya malinaw na sinasang-ayunan ni Hesus ang mahahaba at taimtim na panahon ng pananalangin, sapagkat ibinigay Niya ang Kanyang sariling halimbawa bilang aral sa atin. Ngunit malinaw na may pagkakaiba ang ginawa ng ating Panginoon sa buong magdamag at ang pinuna Niyang ginagawa ng mga pagano kapag sila ay “nagdaldal” gamit ang maraming salita. Matapos punahin ang pananalangin ng mga pagano, ibinigay sa atin ni Hesus ang panalanging “Ama Namin” bilang huwaran ng ating personal na pananalangin.
Nagsisimula ang panalanging Ama Namin sa pakikipag-usap sa Diyos sa isang lubhang personal na paraan. Ibig sabihin, ang Diyos ay hindi lamang isang makapangyarihang nilalang sa sansinukob. Siya ay personal, kapamilya—Siya ang ating Ama. Ipinagpapatuloy ni Hesus ang panalangin sa pagtuturo sa atin na parangalan ang ating Ama sa pamamagitan ng pagpapahayag ng Kanyang kabanalan, ng pagiging banal Niya. Ang Diyos at ang Diyos lamang ang Banal na pinagmumulan ng lahat ng kabanalan sa buhay. Habang kinikilala natin ang kabanalan ng Ama, dapat din natin Siyang kilalanin bilang Hari at hangarin ang Kanyang paghahari sa ating buhay at sa daigdig. Natutupad lamang ito kapag nagaganap ang Kanyang ganap na kalooban “dito sa lupa para nang sa Langit.” Nagtatapos ang ganap na panalanging ito sa pagkilala na ang Diyos ang pinagmumulan ng lahat ng ating pang-araw-araw na pangangailangan, kabilang ang kapatawaran ng ating mga kasalanan at pag-iingat laban sa lahat ng kasamaan.
Matapos bigkasin ang ganap na panalanging ito, ibinigay ni Hesus ang konteksto kung paano ito at ang bawat panalangin ay dapat dasalin. Sinabi Niya, “Kung patatawarin ninyo ang mga tao sa kanilang mga pagkakasala, patatawarin din kayo ng inyong Ama sa langit. Ngunit kung hindi ninyo patatawarin ang mga tao, hindi rin patatawarin ng inyong Ama ang inyong mga pagkakasala.” Magiging mabisa lamang ang pananalangin kung hahayaan natin itong baguhin tayo at gawin tayong higit na katulad ng Ama sa Langit. Kaya kung nais nating maging mabisa ang ating panalangin para sa kapatawaran, dapat nating isabuhay ang ating ipinagdarasal. Dapat din nating patawarin ang iba upang patawarin tayo ng Diyos.
Pagnilayan ngayon ang ganap na panalanging ito, ang Ama Namin. Isang tukso ang maging lubhang pamilyar tayo sa panalanging ito na hindi na natin nabibigyang-pansin ang tunay nitong kahulugan. Kung mangyari iyon, matutuklasan nating ang pagdarasal natin nito ay higit na katulad ng sa mga paganong basta na lamang nagdadaldal. Ngunit kung buong pagpapakumbaba at katapatan nating uunawain at isasapuso ang bawat salita, makatitiyak tayong ang ating pananalangin ay higit na magiging katulad ng sa ating Panginoon. Ipinapayo ni San Ignacio de Loyola na pagnilayan nang napakabagal ang bawat salita ng panalanging iyon, paisa-isang salita. Subukang manalangin sa ganitong paraan ngayon, at hayaang ang pagdarasal ng Ama Namin ay maging tunay na pakikipag-usap sa Ama sa Langit sa halip na pagdadaldal lamang.
Ama namin, sumasalangit Ka, sambahin ang ngalan Mo. Mapasaamin ang kaharian Mo. Sundin ang loob Mo dito sa lupa para nang sa Langit. Bigyan Mo kami ngayon ng aming kakanin sa araw-araw. At patawarin Mo kami sa aming mga sala, para nang pagpapatawad namin sa mga nagkakasala sa amin. At huwag Mo kaming ipahintulot sa tukso, at iadya Mo kami sa lahat ng masama. Amen. Hesus, nagtitiwala ako sa Iyo.
Mga Pagninilay sa Ikaanim na Araw:
40 Days in the Desert & 40 Days at the Cross
Higit pang mga Pagninilay sa Ebanghelyo
Mga Pagninilay sa Inaawit na Awa ng Diyos
Mga Sanggunian para sa Kuwaresma
Mga Pagninilay sa Banal na Kasulatan para sa Kuwaresma
Mga Pagpipilian sa mga Pagbasa sa Misa
