ኦክቶበር 24, 2021
በመደበኛው ዘመን ሠላሳኛ እሑድ፣ ዓመት ለ
የዛሬ ንባባት
በርጠሜዎስ የናዝሬቱ ኢየሱስ መሆኑን በሰማ ጊዜ፣ “የዳዊት ልጅ ኢየሱስ ሆይ፣ ራራልኝ” እያለ መጮኽ ጀመረ። ማርቆስ 10:47
ዓይነ ስውሩ በርጠሜዎስ የተናገራቸው እነዚህ ቃላት፣ በጥቂት ምክንያቶች ፍጹም የሆነ ጸሎት ያቀርቡልናል።
በመጀመሪያ፣ ይህ ጸሎት የበርጠሜዎስን ጥልቅ ትሕትና ያሳያል። በርጠሜዎስ ይህን ጸሎት በመጸለይ፣ ኢየሱስ የሚያስፈልገው ነገር ምንጭ መሆኑንና ራሱን መርዳት እንደማይችል ያውቅ እንደነበር ይገልጻል። በርጠሜዎስ ራሱ ደካማ እንደሆነ፣ ኢየሱስ ግን ፍጹም ኃይል እንደሆነ ያውቅ ነበር። ስለዚህ፣ በርጠሜዎስ በችግሩ ጊዜ ኢየሱስን ምንጩ እንደሆነ አውቆ፣ በትሕትና ወደ እርሱ ዞረ።
ሁለተኛ፣ “ርኅራኄ” የሚለምን ጩኸት ያለበት ጸሎት ነው። ርኅራኄ የሌሎችን ሥቃይ በማየት የሚነሳ የሐዘንና የአዘኔታ ስሜት ነው። ርኅራኄ ምሕረት ነው፤ እንዲሁም የመስጠት ግዴታ ከሌለበት ሰው ለሌላው የሚሰጥ የፍቅር መገለጫ ነው። በዚህ ጸሎት በርጠሜዎስ፣ ለእንዲህ ያለ ስጦታ የማይገባ ቢሆንም፣ ሁሉን የሚችለው ጌታ ቸርነትና ምሕረት እንዲያሳየው ይለምናል። ይህ ጸሎት፣ በርጠሜዎስ ከጌታችን እርዳታ ለመቀበል የሚገባው እንዳልሆነ ያውቅ እንደነበር ያሳያል፤ ቢሆንም ኢየሱስ እንደሚረዳው ተስፋ አድርጎ ጮኸ። በእርግጥም፣ ኢየሱስ ይረዳዋል።
ሦስተኛ፣ ይህ ጸሎት አንድ የተለየ ጥልቅ ልባዊ ጉጉት ያሳያል። የእግዚአብሔርን እርዳታ መጠየቅ ብቻ አይደለም፤ ይልቁንም እርዳታ የሚሻ ጩኸት ነው። ልመናና ምጽዋት መጠየቅ የሚመስል ተማጽኖ ነው። ድካሞችን ስለማሳየት ሳይሳቀቁ፣ ወይም ሌሎች ያንን ያያሉ፣ ምንስ ያስባሉ ብለው ሳይጨነቁ፣ ነፍስን ለእግዚአብሔር መክፈት ነው። ይህም የዓይነ ስውሩን ጸሎት ጥልቀት ያሳያል።
ዛሬ፣ ከበርጠሜዎስ አጭር ጸሎት የምንማራቸውን እነዚህን ሦስት ትምህርቶች አሰላስሉ። ትሑታን መሆን፣ ምሕረትን መለመን፣ ይህንንም በጥልቅ ልባዊ ጉጉትና ናፍቆት ማድረግ አለብን። በዚህ መንገድ መጸለይ የእግዚአብሔርን ጸጋና ምሕረት ለመቀበል እንደሚያዘጋጀን ፈጽሞ የታመነ ነው።
ጌታ ኢየሱስ፣ የዳዊት ልጅ ሆይ፣ ራራልኝ። ምሕረትህንና ርኅራኄህን በትሕትና በፍጹም ልቤ እለምንሃለሁ። የማይገባኝ ብሆንም፣ ጸጋህን እሻለሁ፣ በቸርነትህም እታመናለሁ። ኢየሱስ ሆይ፣ በአንተ እታመናለሁ።
ወደ ቅዱስ ይሁዳ የሚቀርብ የዘጠኝ ቀን ጸሎት
ተስፋ ላስቆረጡ ሁኔታዎችና ጉዳዮች
በዓመቱ ውስጥ በማንኛውም ጊዜ፣ በተለይም ኦክቶበር 19–27 የሚጸለይ
ለዓመቱ መደበኛ ዘመን የመጽሐፍ ቅዱስ ማሰላሰያዎች
የዕለቱ ቅዱስ – ቅዱስ አንቶኒ ማርያ ክላሬት፣ ጳጳስ—አማራጭ መታሰቢያ
በዚህ ዓመት እሑድ ስለሚውል፣ በሥርዓተ አምልኮ መታሰቢያ አይከበርም
ከላይ የቀረበው ምስል፦ በፈርናንዶ ጋሌጎ የተሳለው የዓይነ ስውሩ በርጠሜዎስ ፈውስ፣ በዊኪሚዲያ ኮመንስ በኩል
