Sunday, August 18, 2019
Twentieth Sunday in Ordinary Time, Year C
Paminaw sa Iningles
Miingon si Jesus sa iyang mga tinun-an: “Mianhi Ako aron pagpasilaob sa yuta, ug pagkadako sa Akong tinguha nga unta nagdilaab na kini!” Lucas 12:49
Kini nga teksto nagpadayag kanato og duha ka butang. Una, gipadayag niini ang tuyo ni Jesus nga “pagpasilaob sa yuta.” Ikaduha, gipadayag niini ang Iyang tinguha nga “unta nagdilaab na kini.”
Unsa may gipasabot ni Jesus sa Iyang pag-ingon nga mianhi Siya aron pagpasilaob sa kalibotan? Ang kalayo usa ka gamhanang hulagway nga makatabang kanato sa pagsabot pag-ayo sa Kristohanong kinabuhi. Una, ang kalayo molamoy. Ingon usab niini si Kristo. Mianhi Siya aron lamuyon kita. Mianhi Siya aron himoon ang atong gagmayng kinabuhi nga nagdilaab nga mga kalayo. Nagpadayag kini nga ang matag usa kanato adunay dakong katakos nga motubo ug mausab. Mahimo kitang mahimong hingpit nga bag-o kon tugotan nato ang aligato sa grasya nga mopasilaob sa atong mga kalag.
Ang kalayo adunay katakos usab sa pagdalag kausaban. Ang kainit niini makapainit kanato, ang kahayag niini makatabang kanato nga makakita diha sa kangitngit, ug ang enerhiya niini makamugna og gahom sa nagkalainlaing paagi aron makatabang sa atong adlaw-adlaw nga kinabuhi. Ingon usab niini ang grasya. Ang grasya sa Dios nag-usab sa atong bugnaw nga mga kasingkasing, naggiya kanato latas sa kangitngit sa kinabuhi, ug naghatag kanato sa tanan natong gikinahanglan aron magkinabuhi nga mabungahon.
Angayng matikdan nga wala lamang moingon si Jesus nga mianhi Siya aron pagpasilaob sa kalibotan; miingon hinuon Siya nga nagtinguha Siya nga unta nagdilaab na kini. Kini nga tinguha sa atong Ginoo usa ka pagdapit sa pagbiya sa usa ka kinabuhing walay kadasig ug dagaang lamang, ug sa pagsulod sa usa ka kinabuhing hingpit nga nagtugyan sa Kristohanong pagkinabuhi. Wala kita tawga aron mausab lamang sa pipila ka bahin, o bisan pa sa kadaghanang bahin sa atong kinabuhi. Dili, gitawag kita nga mahimong nagdilaab nga mga kalayo sa pagtuo, nga giusab sa Dios aron makadalag tinuod nga kausaban sa kalibotan!
Pamalandongi karon ang kalayo sulod sa imong kaugalingong kalag. Unsa kakusog ang pagdilaab niana nga kalayo? Kinahanglan nimo kining sugnoran matag adlaw, ug huypon aron mosamot ang pagdilaab pinaagi sa hingpit nga pagtugyan. Paningkamoti nga mahimong nagdilaab nga kalayo nga gitinguha sa Ginoo alang kanimo, ug mahibulong ka kon unsa ka hingpit ang kausaban nga mahimo sa grasya diha kanimo.
Lord, set my heart on fire with the brightness of Your love and mercy. Help me to be open to the complete transformation of life that You desire of me. I give myself to You without reserve, dear Lord. Use me as You will. Jesus, I trust in You.
Dugang nga mga Pamalandong sa Ebanghelyo
Mga Pamalandong sa Diosnong Kalooy
