Thursday, March 19, 2020
Solemnidad ni San Jose, Bana ni Maria
Paminaw sa Iningles
Jose, anak ni David, ayaw kahadlok sa pagdawat kang Maria nga imong asawa sa imong panimalay. Kay ang bata nga gipanamkon niya pinaagi sa Espiritu Santo. Manganak siya ug usa ka lalaki ug nganlan mo siyag Jesus, kay luwason niya ang iyang katawhan gikan sa ilang mga sala. Matthew 1:20
Pagkabulahan gayod ni San Jose! Gitawag siya nga mahimong amahan dinhi sa yuta sa Anak sa Dios ug bana sa Inahan sa Dios! Seguradong napuno siya sa kahingangha niining maong responsibilidad ug, usahay, mikurog sa balaang kahadlok atubangan sa ingon kadakong pagtawag.
Apan angayng matikdan nga ang sinugdanan niining pagtawag daw nalambigit sa usa ka iskandalo. Mabdos si Maria ug dili kini kang Jose. Giunsa man kini pagkahitabo? Ang bugtong tawhanong pagpasabot mao nga wala magmatinud-anon si Maria kaniya. Apan supak kaayo kini sa pagkaila ni Jose kang Maria. Seguradong nakurat ug nalibog gayod siya sa pag-atubang niining daw walay kasulbaran nga kahimtang. Unsa may angay niyang buhaton?
Nahibalo kita kon unsa ang una niyang gihukman nga buhaton. Mihukom siya nga bulagan si Maria sa hilom. Apan unya misulti kaniya ang anghel pinaagi sa usa ka damgo. Ug, sa iyang pagmata gikan sa pagkatulog, “gibuhat niya ang gisugo kaniya sa anghel sa Ginoo ug gidawat ang iyang asawa sa iyang panimalay.”
Usa ka bahin niining kahimtanga nga angay pamalandongan mao nga kinahanglang dawaton ni Jose ang iyang asawa ug ang iyang Anak diha sa pagtuo. Kining iyang bag-ong pamilya labaw pa sa masabtan sa tawhanong pangatarongan lamang. Dili gayod kini masabtan pinaagi lamang sa pagsulay sa pagtuki niini. Kinahanglan niya kining atubangon uban sa pagtuo.
Ang pagtuo nagpasabot nga kinahanglang mosalig siya sa tingog sa Dios nga nagsulti kaniya diha sa iyang konsensiya. Oo, misalig siya sa gisulti kaniya sa anghel diha sa damgo, apan damgo ra kadto! Ang mga tawo makadamgo man ug nagkalainlaing katingalahang butang! Isip tawo, natural lamang nga duhaduhaan niya kining damgo ug maghunahuna kon tinuod ba kini. Gikan ba gayod kini sa Dios? Kining Bataha gikan ba gayod sa Espiritu Santo? Giunsa man kini pagkahitabo?
Kining tanang pangutana, ug ang uban pang pangutana nga mitungha tingali sa hunahuna ni San Jose, matubag lamang pinaagi sa pagtuo. Apan ang maayong balita mao nga ang pagtuo naghatag gayod ug mga tubag. Ang pagtuo makapahimo sa usa ka tawo sa pag-atubang sa mga kalibog sa kinabuhi uban sa kalig-on, baroganan ug kasigurohan. Ang pagtuo nag-abli sa pultahan ngadto sa kalinaw taliwala sa kawalay kasigurohan. Giwagtang niini ang kahadlok ug gipulihan sa kalipay sa pagkahibalo nga nagsunod ka sa kabubut-on sa Dios. Ang pagtuo adunay gahom, ug ang pagtuo mao ang gikinahanglan natong tanan aron makalahutay sa kinabuhi.
Pamalandongi karon ang kalalom sa imong pagtuo atubangan sa daw mga kalisdanan. Kon gibati nimo nga gitawag ka sa Dios sa pag-atubang sa usa ka hagit sa imong kinabuhi karon, sunda ang panig-ingnan ni San Jose. Tugoti ang Dios nga mosulti kanimo, “Ayaw kahadlok!” Gisulti Niya kini kang San Jose ug gisulti usab Niya kini kanimo. Ang mga pamaagi sa Dios labaw kaayo sa atong mga pamaagi, ang Iyang mga hunahuna labaw kaayo sa atong mga hunahuna, ang Iyang kaalam labaw kaayo sa atong kaalam. Ang Dios adunay hingpit nga plano alang sa kinabuhi ni San Jose, ug aduna usab Siya niini alang kanimo. Lakaw diha sa pagtuo matag adlaw ug imong makita nga anam-anam nga matuman kanang mahimayaong plano.
Lord, enable me to walk by faith each and every day. Allow my mind to rise above human wisdom alone and to see Your divine plan in all things. St. Joseph, pray for me that I may imitate the faith you lived in your own life. St. Joseph, pray for us. Jesus, I trust in You!
40 Days at the Foot of the Cross – Reflection Twenty-Two – “Behold, Your King!”
Mga Kapanguhaan alang sa Kwaresma
A Prayer to Combat the Coronavirus Pandemic
Dugang nga mga Pamalandong sa Ebanghelyo
Mga Pamalandong sa Diosnong Kalooy
Mga Santos/Kasaulogan Karong Adlawa
Mga Kapilian sa mga Basahon sa Misa
