April 30, 2020
Thursday of the Third Week of Easter
Readings for Today

San Pio V, Papa—Opsyonal nga Handumanan

Paminaw sa Iningles

Miingon si Jesus sa katawhan: “Walay makaari Kanako gawas kon danihon siya sa Amahan nga nagpadala Kanako, ug banhawon Ko siya sa kataposang adlaw.” Juan 6:44

Kini nga teksto sa Kasulatan nagpadayag kanato og usa ka kahibulongang espirituhanong prinsipyo nga kinahanglan natong sabton ug kinabuhian kon buot kitang mas maduol sa Dios. Kini mao ang prinsipyo sa pagdani sa Amahan kanato ngadto kang Jesus.

Una sa tanan, importante nga masabtan ang unang bahin sa giingon ni Jesus: “Walay makaari Kanako gawas kon…” Kini nagsulti kanato nga ang pagduol kang Jesus diha sa pagtuo, ang pagtubo niana nga pagtuo, ug ang pagtubo sa atong gugma sa Dios dili nato mahimo sa kaugalingon lamang. Ang pagdangop sa pagtuo usa ka tubag sa paglihok sa Dios sa atong kinabuhi.

Importante kining masabtan kon buot kitang makaugmad og tinuod nga relasyon kang Cristo, kay nagpadayag kini kanato nga kinahanglan natong tugotan ang Dios nga maoy mouna sa paghimo og lakang niana nga relasyon. Kon tugotan nato Siya sa pagbuhat niini, atong responsibilidad ang pagtubag.

Siyempre, wala kini magpasabot nga magpabilin lang kitang walay buhaton samtang maghulat nga moduol ang Dios kanato. Ang Dios kanunayng moduol kanato, kanunayng mosulti ug kanunayng modani kanato ngadto Kaniya. Busa ang atong unang responsibilidad mao ang pagpatalinghog sa Iyang malumo nga “pagdani.” Moabot kini pinaagi sa malumong mga pag-aghat sa grasya nga nagdapit kanato sa mas hingpit nga pagdangop Kaniya ug sa mas bug-os nga pagtugyan sa atong kaugalingon matag adlaw.

Sa atong puliking kalibotan, sayon kaayo kitang mabalda sa daghang nag-ilogay nga mga tingog. Sayon rang madungog ang pagdani, ug bisan ang pagpugos, sa kalibotan ug sa tanang mga panghaylo niini. Nahimong hanas na kaayo ang kalibotan sa pagsulod sa atong mubo nga pagtagad ug sa pagtanyag og dihadiha nga mga katagbawan nga sa kataposan magbilin kanato nga walay sulod.

Apan lahi kaayo ang tingog sa Dios ug ang Iyang pagdapit. Makaplagan kini diha sa kahilom sa kasingkasing. Hinuon, dili kinahanglan nga anaa kita sa usa ka monasteryo aron makab-ot kining kahilom sa kasingkasing. Makab-ot hinuon kini pinaagi sa matinud-anong paggahin og panahon sa pag-ampo matag adlaw, ug sa pag-ugmad sa batasan sa pagdangop sa Dios sa tanang butang. Makab-ot kini kon motubag kita sa tawag sa Dios, ug dayon buhaton kini pag-usab, ug pag-usab, ug padayon pa. Kini nag-ugmad og batasan sa pagpadani, pagpaminaw, pagtubag ug pagpadani nga mas maduol pa aron motubag pag-usab.

Pamalandongi karon kon unsa ka maayo ang imong pagpaminaw sa Dios. Paningkamoti nga makagahin og bisan pipila lang ka minuto (o labaw pa) sa kahilom karong adlawa. Piyonga ang imong mga mata ug paminaw. Paminawa ang Dios nga nakigsulti kanimo. Kon danihon ka Niya, tubaga Siya uban sa dakong pagkamanggihatagon. Kini ang labing maayong pagpili nga imong mahimo matag adlaw!

Lord, please draw me in, draw me close and help me to recognize Your voice. As I hear You calling, help me to respond to You with much generosity. My life is Yours, dear Lord. Help me to desire You all the more. Jesus, I trust in You.

Mga Pag-ampo sa Pasko sa Pagkabanhaw

Dugang nga mga Pamalandong sa Ebanghelyo

Mga Pamalandong sa Diosnong Kalooy

Tanang Santos/Mga Kapistahan

Santos sa Adlaw – San Pio V, Santo Papa

Mga Kapilian sa mga Basahon sa Misa