Hunyo 5, 2020
Biyernes sa Ikasiyam nga Semana sa Ordinaryong Panahon
Mga Basahon Karong Adlawa
San Bonifacio, Obispo ug Martir—Handumanan

Paminaw sa Iningles
Ang dakong panon sa mga tawo naminaw niini nga malipayon. Marcos 12:37b
Kining tudling gikan sa kataposan sa Ebanghelyo karong adlawa. Bag-o lang nagtudlo si Hesus sa panon sa mga tawo, ug naminaw sila nga “malipayon.” Ang pagtulon-an ni Hesus nakahatag ug dakong kalipay sa ilang mga kalag.
Ingon niini kasagarang motubag ang mga tawo sa pagtulon-an ni Hesus ug sa Iyang presensya sa atong kinabuhi. Ang mga Salmo puno sa ingon niining mga hulagway: “Nagmaya ako diha sa Ginoo.” “Pagkatam-is sa Imong mga pulong.” “Nalipay ako sa Imong mga sugo.” Kini ug ang daghan pang susamang mga tudling nagpakita sa usa sa mga bunga sa mga pulong ug presensya ni Hesus sa atong kinabuhi. Ang Iyang pulong ug ang Iyang presensya sa atong kinabuhi naghatag ug talagsaong kalipay.
Busa angay natong pangutan-on ang atong kaugalingon: “Nalipay ba ako sa mga pulong ni Hesus?” Kasagaran kaayo natong isipon ang mga pulong ni Kristo nga palas-anon o babag sa atong mga gusto sa kinabuhi. Tungod niini, kasagaran sab natong tan-awon ang kabubut-on sa Diyos nga lisod ug bug-at tumanon. Sa tinuod lang, kon ang atong kasingkasing nakagamot sa sala o sa mga kalipayan sa kalibotan, mahimong makapasakit kanato ang mga pulong sa atong Ginoo ug bation nato kini nga bug-at. Apan tungod lamang kana kay supak kini sa daghang butang nga dili maayo alang kanato nga naandan na natong gunitan.
Kon gibati nimo nga lisod paminawon ang Pulong sa Diyos, ang mga pulong ni Hesus, nagsugod ka na sa pagsubay sa hustong dalan. Nagsugod ka nang motugot sa Iyang Pulong nga, ingnon ta, “makig-away” batok sa daghang ubang mga pagdani ug mga tintasyon nga sa kataposan magbilin lamang kanato nga uga ug haw-ang. Mao kini ang unang lakang aron makakaplag ka ug kalipay diha sa Ginoo ug sa Iyang mga pulong.
Ang maayong balita mao kini: kon tugotan nimo ang Iyang Pulong nga putlon ang mga gapos sa daghang butang nga imong gikapitan bisag dili kini maayo alang kanimo, magsugod kang makamatikod nga gihigugma mo pag-ayo ang Iyang Pulong ug nalipay ka sa Iyang presensya sa imong kinabuhi. Makita nimo nga ang katagbawan ug kalipay nga imong masinati tungod sa Iyang presensya sa imong kinabuhi labaw pa kaayo sa bisan unsang lumalabay nga kalipayan o butang nga imong gikapitan. Bisan ang sala makahatag ug bakak nga pagbati sa katagbawan. Ang maong katagbawan sama sa epekto sa droga nga daling mawala. Apan ang kalipay diha sa Ginoo padayong nagdani kanimo ngadto sa mas hataas nga mga butang ug naghatag kanimo ug mas lawom nga katagbawan matag adlaw.
Paggahin ug panahon karong adlawa sa pagpamalandong kon tinuod ba nga gitugotan nimo ang imong kaugalingon nga mapuno sa kalipay diha sa presensya sa Ginoo ug sa Iyang mga pulong. Sulayi pagsinati ang katam-is niini. Tugoti ang imong kaugalingon nga madani niini. Sa dihang madani ka na pag-ayo, labi pa nimo Siyang pangitaon.
Ginoo, nangandoy ako nga magmaya diha Kanimo. Tabangi ako sa pagtalikod sa daghang mga pagdani ug mga tintasyon niining kalibotana. Tabangi ako nga pangitaon Ka ug ang Imong Pulong sa kanunay. Samtang mas mailhan nako ang Imong Pulong, pun-a ang akong kalag sa labing dakong kalipay. Hesus, misalig ako Kanimo.
Dugang nga mga Pamalandong sa Ebanghelyo
Mga Pamalandong sa Diosnong Kalooy
Santo sa Adlaw – San Bonifacio, Obispo ug Martir
Mga Kapilian sa mga Basahon sa Misa
Hulagway: Ang Wali sa Bukid ni Carl Heinrich Bloch




