August 14, 2020
Friday of the Nineteenth Week of Ordinary Time
Readings for Today
San Maximilian Mary Kolbe, Pari ug Martir—Handumanan
Paminaw sa Iningles
“Wala ba kamo makabasa nga sukad sa sinugdan gibuhat sila sa Magbubuhat nga lalaki ug babaye ug miingon, Tungod niini, biyaan sa lalaki ang iyang amahan ug inahan ug makighiusa sa iyang asawa, ug silang duha mahimong usa ka unod? Busa dili na sila duha, kondili usa ka unod.” Mateo 19:4-6a
Unsa ang kaminyoon? Gikan pa sa pagkabatan-on, ang mga lalaki ug mga babaye mobati na og usa ka matang sa pagdani ngadto sa usag usa. Kabahin sa kinaiya sa tawo ang pagsinati niini. Oo, usahay kining “pagdani” matuis ug mahimong kaulag, apan mahinungdanong ipatin-aw nga kining natural nga pagdani mao gayod kana…natural. “Sukad sa sinugdan gibuhat sila sa Magbubuhat nga lalaki ug babaye…” Busa, sukad pa sa sinugdan, gituyo na sa Dios ang sagradong panaghiusa sa kaminyoon.
Ang kaminyoon tinuod gayod nga usa ka misteryo. Oo, tingali maghunahuna ang mga bana nga ang ilang mga asawa “misteryoso,” ug mao usab tingali ang hunahuna sa mga asawa mahitungod sa ilang mga bana. Apan sa pagkatinuod, ang matag tawo usa ka sagradong misteryo, ug ang panaghiusa sa duha ka tawo diha sa kaminyoon usa ka mas dakong misteryo.
Tungod kay usa kini ka misteryo, ang relasyon sa kapikas ug ang kaminyoon mismo kinahanglang sudlan uban sa pagkabukas ug pagpaubos nga nagaingon, “Gusto kong mas mailhan ka sa matag adlaw.” Ang mga kapikas nga nagdala sa pagtuo nga sila ray matarong diha sa ilang kaminyoon kanunayng motamay sa usa ug kanunayng mapakyas sa pagtahod sa balaang misteryo sa ilang kapikas.
Ang matag tawo nga imong mailhan, ilabina ang imong kapikas, usa ka matahom ug mahimayaong misteryo sa kabuhatan sa Dios. Wala ka tawga aron “sulbaron” siya, kondili aron makig-ila kaniya sa mas lawom ug mas lawom pa nga paagi sa matag adlaw. Kinahanglan nga anaa kanunay ang pagpaubos nga makapahimo sa mga kapikas nga mahimong bukas sa usag usa sa bag-ong paagi matag adlaw, aron padayon nilang madiskobrehan ang mas lawom nga katahom sa usag usa. Kining pagpaubos ug pagtahod sa usag usa diha sa kaminyoon mao ang makapahimo sa mga kapikas nga matuman ang ilang hiniusang misyon nga mahimong usa. Hunahunaa kini: “dili na sila duha, kondili usa ka unod.” Diyutay ra kaayo ang tinuod nga nakasabot sa kahulogan niini, ug mas diyutay pa ang nagkinabuhi sa matahom nga kahiladman niining mahimayaon ug halangdong tawag sa kaminyoon.
Pamalandongi karon ang misteryo sa mga tawo nga gitawag ka sa paghigugma, ilabina kon minyo ka. Ang pagtawag sa usa ka tawo nga “misteryo” tingali makapahiyom kanimo sa sinugdan, samtang imong dawaton nga dili nimo siya hingpit nga masabtan. Apan ang mapainubsanong pag-ila sa matahom nga kahulogan sa “misteryo” mogiya kanimo sa paghatag og bili sa pagkatalagsaon sa uban ug motabang kanimo sa pagdawat sa tawag sa panaghiusa sa mga tawo, ilabina sulod sa kaminyoon.
Lord, help me to see the beauty and holy mystery of the people You have placed in my life. Help me to love them with a humble love. May I especially deepen my love for my spouse each and every day. Jesus, I trust in You.
Dugang nga mga Pamalandong sa Ebanghelyo
Mga Pamalandong sa Diosnong Kalooy
Santos sa Adlaw – San Maximilian Mary Kolbe, Pari ug Martir
Mga Kapilian sa mga Basahon sa Misa
Image: Le mariage. by Giulio Rosati
