Cebuano

Usa ka Batasan sa Pag-ampo

Oktubre 21, 2020
Miyerkoles sa Ika-29 nga Semana sa Kasagarang Panahon
Mga Basahon sa Adlaw

Paminaw sa Iningles

Miingon si Jesus sa iyang mga tinun-an: “Hinumdomi kini: kon nahibalo pa ang tagbalay sa takna nga moabot ang kawatan, dili unta niya tugotan nga sudlon ang iyang balay. Kinahanglan usab nga andam kamo, kay sa takna nga wala ninyo damha, moabot ang Anak sa Tawo.”  Lucas 12:39-40

Kining teksto sa Kasulatan nagtanyag kanato og usa ka pagdapit.  Makaingon kita nga si Jesus moanhi kanato sa wala nato damhang takna sa duha ka paagi.

Una, nasayod kita nga moanhi siya pag-usab sa himaya aron paghukom sa mga buhi ug sa mga patay.  Tinuod ang iyang Ikaduhang Pag-anhi, ug angay natong hinumdoman nga mahimo kining mahitabo sa bisan unsang higayona.  Tingali daghan pang katuigan, o gani ginatos pa ka tuig, sa dili pa kini mahitabo, apan mahitabo gayod kini.  Moabot ang higayon nga matapos ang kalibotan sa kahimtang niini karon ug matukod ang bag-ong kahusay.  Angay unta kitang magkinabuhi matag adlaw nga nagpaabot nianang adlawa ug nianang higayona.  Kinahanglan magkinabuhi kita sa paagi nga kanunay kitang andam alang nianang kataposan.  

Ikaduha, kinahanglan natong masabtan nga si Jesus kanunay gayong moanhi kanato pinaagi sa grasya.  Sa naandan, naghisgot kita sa Iyang duha ka pag-anhi: 1) ang Iyang Pagpakatawo, ug 2) ang Iyang pagbalik sa himaya.  Apan adunay ikatulong pag-anhi nga atong mahisgotan: ang Iyang pag-anhi pinaagi sa grasya diha sa atong kinabuhi.  Ug tinuod gayod kining pag-anhi, ug angay nga kanunay kitang magmatngon niini.  Ang Iyang pag-anhi pinaagi sa grasya nagkinahanglan nga kanunay kitang “andam” sa pagsugat Kaniya.  Kon dili kita andam, makaseguro kita nga mapakyas kita sa pagsugat Kaniya.  Unsaon nato pagpangandam alang niining pag-anhi pinaagi sa grasya?  Una sa tanan, mangandam kita pinaagi sa pagpalambo sa inadlaw-adlaw nga batasan sa sulodnong pag-ampo.  Ang sulodnong batasan sa pag-ampo nagpasabot nga, sa usa ka diwa, kanunay kitang nag-ampo.  Nagpasabot kini nga bisan unsa pa ang atong buhaton matag adlaw, ang atong hunahuna ug kasingkasing kanunay nga nakapunting sa Diyos.  Sama kini sa pagginhawa.  Kanunay nato kining ginabuhat bisan wala nato kini hunahunaa.  Ang pag-ampo kinahanglan mahimong batasan sama gayod sa pagginhawa.  Kinahanglan kini maoy sentro sa atong pagkatawo ug sa atong pagkinabuhi.

Pamalandongi karon ang imong kinabuhi sa pag-ampo.  Hibaloi nga ang mga takna nga imong gigahin matag adlaw alang lamang sa pag-ampo gikinahanglan gayod alang sa imong pagkabalaan ug relasyon sa Diyos.  Ug hibaloi nga kadtong mga takna kinahanglan makatabang sa pagpalambo sa batasan nga kanunay kang magmatngon sa Diyos.  Ang pagpangandam sa ingon niini nga paagi magtugot kanimo sa pagsugat kang Kristo sa matag higayon nga moanhi Siya kanimo pinaagi sa grasya.

Ginoo, tabangi ako sa pagpalambo sa kinabuhi sa pag-ampo diha sa akong kasingkasing.  Tabangi ako nga kanunay kang pangitaon ug nga kanunay akong andam sa imong pag-anhi.  Jesus, misalig ako kanimo.

Dugang nga mga Pamalandong sa Ebanghelyo

Mga Pamalandong sa Diosnong Kalooy

Mga Santos/Kasaulogan Karong Adlawa

Mga Kapilian sa mga Basahon sa Misa

Hulagway: Wala Ba Kamo Makahimo sa Pagtukaw Uban Kanako Bisan Usa ka Oras?, ni James_Tissot