Cebuano

Pagkakabig sa Kasingkasing

Oktubre 27, 2020
Martes sa Ika-30 nga Semana sa Ordinaryong Panahon
Mga Pagbasa Karong Adlawa

Paminaw sa Iningles

Miingon na usab Siya, “Sa unsa Ko ikatandi ang Gingharian sa Dios? Sama kini sa patubo nga gikuha sa usa ka babaye ug gisagol sa tulo ka takos nga harina sa trigo hangtod nga mitubo ang tibuok minasa.”  Lucas 13:20-21

Talagsaon ang patubo.  Gamay kaayo kini, apan dako kaayo ang epekto niini sa minasa.  Hinay ang paglihok sa patubo, ug daw usa kini ka milagro.  Sa hinay-hinay, motubo ug mausab ang minasa.  Kanunay kining makapainteres sa mga bata nga nagtan-aw samtang naghimo og pan. 

Mao kini ang labing maayong paagi sa paglihok sa Ebanghelyo sa atong kinabuhi.  Karong higayona, ang Gingharian sa Dios buhi una sa tanan diha sa atong kasingkasing.  Talagsa rang mahitabo sa tinuod ang pagkakabig sa atong kasingkasing sulod lang sa usa ka adlaw o sa usa ka gutlo.  Tinuod, importante ang matag adlaw ug ang matag gutlo, ug sigurado nga kitang tanan adunay mahinumdoman nga mga higayon sa dakong pagkakabig.  Apan ang pagkakabig sa kasingkasing mas sama sa patubo nga nagpatubo sa minasa.  Ang pagkakabig sa kasingkasing kasagarang mahitabo sa hinayhinay ug sa matag lakang.  Gitugotan nato ang Espiritu Santo nga modumala sa atong kinabuhi sa paaging nagkalalom kanunay ug, sa pagbuhat nato niini, mas molalom pa gayod ang atong pagkabalaan, sama sa minasa nga hinayhinay apan seguradong motubo.

Pamalandongi karong adlawa kining hulagway sa patubo nga nagpatubo sa minasa.  Nakita ba nimo kini isip hulagway sa imong kalag?  Nakita ba nimo nga ang Espiritu Santo hinayhinayng naglihok diha kanimo?  Nakita ba nimo ang imong kaugalingon nga hinayhinay apan padayon nga nagbag-o?  Hinaot nga “Oo” ang imong tubag.  Bisan tuod ang pagkakabig dili kanunay mahitabo sa usa lang ka gabii, kinahanglan nga magpadayon kini aron ang kalag makaabante padulong sa dapit nga giandam sa Dios alang niini.

Ginoo, tinuod gayod nga gusto kong mahimong balaan.  Gusto kong mausab sa hinay-hinay matag adlaw.  Tabangi ako nga tugotan Ikaw sa pag-usab kanako sa matag gutlo sa akong kinabuhi, aron magpadayon ako sa pagsubay sa dalan nga Imong giandam alang kanako.  Hesus, misalig ako Kanimo.

Mga Pag-ampo & Mga Kapanguhaan alang sa Eleksiyon sa Estados Unidos

Dugang nga mga Pamalandong sa Ebanghelyo

Mga Pamalandong sa Diosnong Kalooy

Mga Santos/Kasaulogan Karong Adlawa

Mga Kapilian sa mga Basahon sa Misa

Hulagway: Usa ka kinulit nga dibuho ni Jan Luyken nga naghulagway sa Mateo 13:30-34 diha sa Bibliyang Bowyer, Bolton, Inglatera.