Oktubre 29, 2020
Huwebes sa Ika-30 nga Semana sa Ordinaryong Panahon
Mga Pagbasa Karong Adlawa

Paminaw sa Iningles
May pipila ka Pariseo nga miduol kang Jesus ug miingon, “Pahawa, biyai kining dapita kay gusto kang patyon ni Herodes.” Mitubag Siya, “Lakaw ug sultihi kanang milo, ‘Tan-awa, naghingilin Ako og mga demonyo ug nag-ayo sa mga masakiton karon ug ugma, ug sa ikatulong adlaw matuman Ko ang Akong katuyoan.’” Luke 13:31-32
Makapainteres gayod kining panag-estorya tali ni Jesus ug sa pipila ka Pariseo. Makapainteres nga tan-awon ang gibuhat sa mga Pariseo ingon man ang gibuhat ni Jesus.
Mahimo natong ipangutana nganong nakigsulti ang mga Pariseo kang Jesus niining paagiha, nga nagpasidaan Kaniya sa tuyo ni Herodes. Nabalaka ba sila alang kang Jesus ug busa naningkamot sa pagtabang Kaniya? Lagmit dili. Hinuon, nahibalo kita nga ang kadaghanan sa mga Pariseo nasina ug nangabugho kang Jesus. Niining higayona, daw gipasidan-an nila si Jesus bahin sa kapungot ni Herodes aron hadlokon Siya ug papahawaon sa ilang distrito. Siyempre, wala mahadlok si Jesus.
Usahay makasinati usab kita sa samang butang. Adunay mga higayon nga may moduol kanato ug mosulti og mga tabi bahin kanato, nga nagpakaaron-ingnong nagtinguha sa pagtabang, apan sa pagkatinuod usa diay kini ka maliputon nga paagi sa pagpanghadlok kanato aron pun-on kita sa kahadlok o kabalaka.
Ang yawe mao ang pagtubag lamang sama sa gibuhat ni Jesus sa dihang giatubang Siya sa kabuangan ug daotang tuyo. Wala magpadala si Jesus sa pagpanghadlok. Wala gayod Siya mabalaka sa daotang tuyo ni Herodes. Hinuon, mitubag Siya sa paagi nga sama rag nag-ingon sa mga Pariseo, “Ayaw ninyo usiki ang inyong panahon sa pagtinguha nga pun-on Ako sa kahadlok o kabalaka. Ginabuhat Ko ang mga buhat sa Akong Amahan ug kana lamang ang angay Kong kabalak-an.”
Unsa may nagsamok kanimo sa imong kinabuhi? Unsa may nakapahadlok kanimo? Gitugotan ba nimo nga makapaluya kanimo ang mga opinyon, daotang tuyo, o mga tabi sa uban? Ang bugtong butang nga angay natong kabalak-an mao ang pagtuman sa kabubut-on sa Amahan sa Langit. Kon masaligon kitang nagtuman sa Iyang kabubut-on, makaangkon usab kita sa kaalam ug kaisog nga atong gikinahanglan aron badlongon ang tanang pagpanglimbong ug walay hinungdang pagpanghadlok sa atong kinabuhi.
Pamalandongi karon ang imong kaugalingong pasalig sa pagtuman sa kabubut-on sa Amahan sa imong kinabuhi. Gituman ba nimo ang Iyang kabubut-on? Kon mao, namatikdan ba nimo nga may mga tawo nga moduol ug mosulay sa pagpugong kanimo? Paningkamoti nga maangkon ang samang pagsalig ni Jesus ug padayon nga ipunting ang imong pagtagad sa misyon nga gihatag kanimo sa Dios.
Ginoo, nagsalig gayod ako sa Imong balaang kabubut-on. Nagsalig ako sa plano nga Imong giandam alang kanako, ug dili ako magpadala o magpahadlok sa binuang ug daotang tuyo sa uban. Hatagi ako og kaisog ug kaalam aron dili mawala ang akong pagtan-aw Kanimo sa tanang butang. Hesus, misalig ako Kanimo.
Mga Pag-ampo & Mga Kapanguhaan alang sa Eleksiyon sa Estados Unidos
Dugang nga mga Pamalandong sa Ebanghelyo
Mga Pamalandong sa Diosnong Kalooy
Mga Santos/Kasaulogan Karong Adlawa
Mga Kapilian sa mga Basahon sa Misa




