Cebuano

Pagdawat sa mga Makasasala

Nobyembre 5, 2020
Huwebes sa Ika-31 nga Semana sa Ordinaryong Panahon
Mga Basahon sa Adlaw

Paminaw sa Iningles

Ang tanang mga maniningil og buhis ug mga makasasala nagkaduol aron maminaw kang Jesus, apan ang mga Pariseo ug mga eskriba misugod sa pagbagulbol, nga nag-ingon, “Kining tawhana modawat sa mga makasasala ug mokaon uban kanila.” Lucas 15:1-2

Giunsa nimo pagtagad ang mga makasasala nga imong mahimamat? Gilikayan ba nimo sila, gilibak, gibiaybiay, gikaluy-an, o gipasagdan? Hinaot unta nga dili! Unsaon man nimo pagtagad ang makasasala? Gitugotan sila ni Jesus nga moduol Kaniya ug gihatagan Niya sila og pagtagad. Sa pagkatinuod, maluluy-on ug buotan kaayo Siya sa makasasala nga gisaway Siya pag-ayo sa mga Pariseo ug mga eskriba. Ikaw kaha? Andam ka bang makig-uban sa makasasala bisan pa kon tungod niini sawayon ka usab?

Sayon kaayo ang pagkamapintas ug mapanawayon ngadto sa mga tawo nga “angayan niini.” Kon makita nato nga ang usa ka tawo klarong nahisalaag, morag makataronganon pa gani para nato nga tudloan siya sa tudlo ug tamayon, nga daw mas maayo kita kay kaniya o daw hugaw lang siya. Sayon kaayo kana buhaton, apan dako kaayo kana nga sayop!

Kon gusto kitang mahisama kang Jesus, kinahanglan nga lahi gayod ang atong tinamdan ngadto kanila. Kinahanglan nga lahi ang atong pagtagad kanila kay sa atong gustong buhaton tungod sa atong gibati. Ang sala mangil-ad ug hugaw. Sayon ra ang pagsaway sa usa ka tawo nga nabitik sa balikbalik nga pagpakasala. Apan kon buhaton nato kini, wala kitay kalainan sa mga Pariseo ug mga eskriba sa panahon ni Jesus. Ug lagmit makadawat usab kita sa samang mapintas nga pagtagad gikan kang Jesus tungod sa atong kakulang sa kalooy.

Makaiikag nga usa sa pipila ka sala nga kanunayng gibadlong ni Jesus mao ang pagkahukmanon ug pagkamasawayon. Daw kini nga sala mao ang nagsira sa pultahan sa kalooy sa Diyos diha sa atong kinabuhi.

Pamalandongi karong adlawa kon giunsa nimo pagtan-aw ug pagtagad kadtong medyo dayag ang ilang mga sala. Gitagad ba nimo sila uban sa kalooy? O mitubag ka ba uban sa pagtamay ug naglihok uban sa kasingkasing nga mahukmanon? Pasalig pag-usab sa imong kaugalingon nga magmaluluy-on ug hingpit nga likayan ang paghukom sa uban. Ang paghukom iya ni Kristo, dili imo. Gitawag ka sa pagpakita og kalooy ug pagkamabination. Kon mao kana ang imong ikahatag, labi ka pang mahisama sa atong maluluy-ong Ginoo.

Ginoo, tabangi ako kon matintal ako sa pagkamapintas ug sa paghukom sa uban. Tabangi ako nga motan-aw sa makasasala uban ang kalooy, aron makita ko una ang kaayo nga Imong gibutang sa ilang kalag sa dili pa nako tan-awon ang ilang makasasala nga mga buhat. Tabangi ako nga itugyan Kanimo ang paghukom ug mopili hinuon sa pagpakita og kalooy. Hesus, misalig ako Kanimo.

Dugang nga mga Pamalandong sa Ebanghelyo

Mga Pamalandong sa Diosnong Kalooy

Mga Santos/Kasaulogan Karong Adlawa

Mga Kapilian sa mga Basahon sa Misa

Hulagway nga gipakita sa ibabaw: Si Kristo ug ang Makasasala, dibuho ni Henryk Siemiradzki