Cebuano

Kalibotanon o Langitnong Kalamposan?

Nobyembre 6, 2020
Biyernes sa Ika-31 nga Semana sa Ordinaryong Panahon
Mga Basahon sa Adlaw

Paminaw sa Iningles

“Kay ang mga anak niining kalibotana labaw pang maalamon sa ilang pagpakiglabot sa ilang kaugalingong kaliwatan kay sa mga anak sa kahayag.” Lucas 16:8b

Kini nga mga pulong anaa sa kataposan sa sambingay sa Dili Matinud-anong Tinugyanan. Gisaysay ni Jesus kini nga sambingay aron ipasiugda nga ang “mga anak sa kalibotan” tinuod nga malampuson sa ilang pagmaniobra sa kalibotanong mga butang, samtang ang “mga anak sa kahayag” dili ingon kaabtik kon kalibotanong mga butang na ang hisgotan. Busa unsa may gipasabot niini alang kanato?

Dili gayod kini nag-ingon nga angay kitang magkinabuhi sa kalibutanong paagi, maningkamot sa pagsunod sa mga sukdanan sa kalibotan ug maghago alang sa mga tumong niini. Sa pag-ila ni Hesus niining kamatuoran bahin sa mga tawong kalibutanon, gipakita hinuon Niya ang dakong kalainan tali sa ilang paagi ug sa angay natong paagi sa paghunahuna ug paglihok. Gitawag kita nga mahimong mga anak sa kahayag. Busa, dili gayod kita angayng mahibulong kon dili kita sama ka malamposon sa kalibutanong mga butang sa mga tawong natumog sa sekular nga kultura.

Tinuod kini ilabina kon atong tan-awon ang daghang “kalamposan” niadtong hingpit nga naunlod sa kalibotan ug sa mga mithi niini. Ang uban malampuson sa pag-angkon og dakong bahandi, gahom o dungog pinaagi sa ilang kaabtik sa mga butang niining panahona. Makita nato kini ilabina sa popular nga kultura. Pananglitan, tan-awa ang industriya sa kalingawan. Daghan ang malampuson kaayo ug inila sa mga mata sa kalibotan, ug usahay matental kitang masina kanila. Itandi sila niadtong napuno sa hiyas, pagpaubos ug kaayo. Kasagaran, atong makita nga kining mga tawhana wala lang tagda.

Busa unsa may angay natong buhaton? Angay natong gamiton kini nga sambingay aron pahinumdoman ang atong kaugalingon nga, sa kataposan, ang bugtong mahinungdanon mao ang pagtan-aw sa Dios. Giunsa man kita pagtan-aw sa Dios, lakip ang atong mga paningkamot sa pagkinabuhi nga balaan? Isip mga anak sa kahayag, kinahanglan nga maningkamot kita alang lamang sa mga butang nga walay kataposan, dili sa mga butang nga kalibotanon ug lumalabay. Itagana sa Dios ang atong kalibotanong mga panginahanglan kon mosalig kita Kaniya. Tingali dili kita mahimong malampuson kaayo sumala sa mga sukdanan sa kalibotan, apan makab-ot nato ang pagkahalangdon sa tanang butang nga tinuod nga mahinungdanon ug sa tanang butang nga walay kataposan.

Pamalandongi karong adlawa ang imong mga prayoridad sa kinabuhi. Nakatutok ka ba sa pagtigom og mga bahandi nga walay kataposan? O kanunay ka bang malambigit sa mga pagmaniobra ug mga pamaagi nga ang bugtong tumong mao ang kalibotanong kalamposan? Paningkamoti ang mga butang nga walay kataposan ug magmapasalamaton ka hangtod sa kahangtoran.

Ginoo, tabangi ako nga ipunting kanunay ang akong mga mata sa Langit. Tabangi ako nga maalamon sa mga dalan sa grasya, kalooy ug kaayo. Kon matintal ako nga mabuhi alang lamang niining kalibotana, tabangi ako nga makakita kon unsay tinuod nga bililhon ug magpabiling nakapunting niana lamang. Hesus, misalig ako Kanimo.

Dugang nga mga Pamalandong sa Ebanghelyo

Mga Pamalandong sa Diosnong Kalooy

Mga Santos/Kasaulogan Karong Adlawa

Mga Kapilian sa mga Basahon sa Misa

Hulagway nga gipakita sa ibabaw: Sambingay sa Dili Matinud-anong Tinugyanan, dibuho ni Marinus van Reymerswaele