Sunday, November 22, 2020
Ang Atong Ginoong Jesukristo, Hari sa Uniberso—Solemnidad
Tan-awa ang among mga kapanguhaan alang sa Adbiyento!
Malipayong Solemnidad ni Jesukristo, Hari sa Uniberso! Kini ang kataposang Domingo sa tuig sa Simbahan, nga nagpasabot nga atong ipunting ang atong pagtagad sa kataposan ug mahimayaong mga butang nga umaabot! Nagpasabot usab kini nga sa sunod Domingo, Unang Domingo na sa Adbiyento.
Kon moingon kita nga si Jesus usa ka hari, adunay pipila ka butang nga atong gipasabot. Una, Siya ang atong Magbalantay. Isip atong Magbalantay, gusto Niyang giyahan kita sa personal nga paagi sama sa usa ka mahigugmaong amahan. Gusto Niyang mosulod sa atong kinabuhi sa personal, suod ug maampingong paagi, dili gayod magpugos sa Iyang Kaugalingon kanato kondili kanunay nga motanyag sa Iyang Kaugalingon isip atong giya. Ang kalisdanan niini mao nga sayon kaayo alang kanato ang pagsalikway niining matang sa pagkahari. Isip Hari, gusto ni Jesus nga giyahan ang matag bahin sa atong kinabuhi ug tultolan kita sa tanang butang. Gusto Niyang mahimong bug-os nga magmamando ug hari sa atong mga kalag. Gusto Niya nga moduol kita Kaniya alang sa tanang butang ug kanunayng mosalig Kaniya. Apan dili Niya ipugos kanato kining matang sa pagkahari. Kinahanglan natong dawaton kini nga gawasnon ug walay pagduhaduha. Dumalahon lamang ni Jesus ang atong kinabuhi kon gawasnon natong itugyan ang atong kaugalingon Kaniya. Apan kon mahitabo kana, ang Iyang Gingharian magsugod sa pagkatukod sulod kanato! Ug pinaagi kanato, dinhi sa kalibotan.
Dugang pa, gusto gayod ni Jesus nga magsugod sa pagkatukod ang Iyang Gingharian dinhi sa atong kalibotan. Una sa tanan, mahitabo kini kon mahimo kitang Iyang mga karnero ug sa ingon mahimong Iyang mga galamiton aron motabang sa pagkabig sa kalibotan. Apan, isip Hari, gitawag usab kita Niya sa pagtukod sa Iyang Pagkahari pinaagi sa pagsiguro nga gitahod ang Iyang kamatuoran ug balaod sulod sa sibil nga katilingban. Ang awtoridad ni Kristo isip Hari mao ang naghatag kanato sa awtoridad ug katungdanan isip mga Kristohanon sa pagbuhat sa tanan natong mahimo aron batokan ang mga inhustisya sa katilingban ug mapalambo ang pagtahod sa matag tawo. Ang tanang balaod sibil, sa kataposan, nagakuha sa awtoridad niini gikan kang Kristo lamang tungod kay Siya ang bugtong Hari sa tibuok Uniberso.
Apan daghan ang wala moila Kaniya isip Hari, busa unsa man ang mahitungod kanila? Angay ba natong “ipugos” ang balaod sa Diyos ngadto sa mga wala motuo? Ang tubag mao ang oo ug dili. Una, adunay pipila ka butang nga dili nato mahimong ipugos. Pananglitan, dili nato mapugos ang mga tawo sa pagtambong sa Misa matag Domingo. Makababag kini sa kagawasan sa usa ka tawo sa pagdawat niining bililhong gasa. Nasayod kita nga gisugo kini ni Jesus kanato alang sa kaayohan sa atong mga kalag, apan kinahanglan gihapon kini nga dawaton sa gawasnong paagi. Bisan pa niana, adunay pipila ka butang nga kinahanglan natong “ipugos” ngadto sa uban. Ang pagpanalipod sa mga wala pa matawo, sa mga kabos ug sa mga huyang kinahanglan nga “ipatuman nga hugot.” Ang kagawasan sa konsensiya kinahanglan nga ilakip sa atong mga balaod. Ang kagawasan sa pagpraktis sa atong pagtuo sa dayag (kagawasan sa relihiyon) sulod sa bisan unsang institusyon kinahanglan usab nga “ipatuman nga hugot.” Ug daghan pang ubang butang nga mahimo natong ilista dinhi. Ang mahinungdanong ipasiugda mao nga, sa kataposan sa panahon, si Jesus mobalik sa Yuta uban sa bug-os Niyang himaya ug unya tukoron Niya ang Iyang permanente ug walay kataposang Gingharian. Niadtong panahona, ang tanang tawo makakita sa Diyos kon kinsa gayod Siya. Ug ang Iyang balaod mahiusa sa balaod “sibil.” Ang matag tuhod moluhod sa atubangan sa bantogang Hari ug ang tanan mahibalo sa kamatuoran. Niadtong panahona, maghari ang tinuod nga hustisya ug ang matag daotan matul-id. Pagkamahimayaon gayod niadtong adlawa!
Pamalandongi karon ang imong kaugalingong pagdawat kang Kristo isip Hari. Tinuod ba Niyang gidumala ang imong kinabuhi sa tanang paagi? Gitugotan ba nimo Siya nga bug-os nga magbuot sa imong kinabuhi? Kon buhaton kini sa gawasnon ug bug-os nga paagi, ang Gingharian sa Diyos matukod diha sa imong kinabuhi. Tugoti Siya nga maghari aron makabig ka ug, pinaagi kanimo, ang uban makaila Kaniya isip Ginoo sa tanan!
Lord, You are the sovereign King of the Universe. You are Lord of all. Come reign in my life and make my soul Your holy dwelling place. Lord, come transform our world and make it a place of true peace and justice. May Your Kingdom come! Jesus, I trust in You.
Dugang nga mga Pamalandong sa Ebanghelyo
Mga Pamalandong sa Diosnong Kalooy
Dugang nga Basahon – Cristo nga Hari
Saint of the Day – Saint Cecilia, Virgin and Martyr
Not celebrated as a liturgical memorial this year since it falls on Sunday
Mga Kapilian sa mga Basahon sa Misa
Gipasiugda nga hulagway sa ibabaw: flickr
