Ang Kamatuoran Mopalingkawas Kaninyo

March 24, 2021
Wednesday of the Fifth Week of Lent
Readings for Today

Paminaw sa Iningles

Miingon si Jesus sa mga Judio nga mituo Kaniya, “Kon magpabilin kamo sa Akong pulong, tinuod gayod nga mga tinun-an Ko kamo, ug mailhan ninyo ang kamatuoran, ug ang kamatuoran mopalingkawas kaninyo.” Juan 8:31–32

Kini nga mga pulong adunay gahom sa pagbag-o sa atong kinabuhi. Timan-i nga gisulti ni Jesus kini nga mga pulong “sa mga Judio nga mituo Kaniya.” Sa ato pa, kadtong midawat sa Iyang pulong ug, busa, Iyang tinuod nga mga tinun-an. Kita nga nagtuo usab kang Jesus angay nga mamalandong pag-ayo niining mga pulonga. Duha ka butang ang kinauyokan niining pagtulon-ana: kinahanglan nga “mailhan ninyo ang kamatuoran” aron ang kamatuoran nga inyong mailhan “mopalingkawas kaninyo.”

Kini nga pagtulon-an ni Jesus labihan ka makatabang sa sikolohikal ug espirituhanong bahin sa kinabuhi. Una sa tanan, sa sikolohikal lamang nga bahin, usa sa labing dakong tabang sa maayong kahimsog sa pangisip mao ang kamatuoran. Kasagaran, kon ang usa ka tawo nakigbisog sa nagkalainlaing matang sa depresyon, kini tungod kay nagtan-aw siya sa pipila ka bahin sa iyang kinabuhi nga puno sa kalibog. “Nganong gibuhat man kini niining tawhana kanako?” O “Unsaon ko man gayod paglahutay niini?” O “Gubot na ang akong kinabuhi ug wala nay paagi nga makagawas niini.” Kini ug ang ubang susamang mga hunahuna dili gayod kalikayan nga mosangpot sa depresyon tungod sa usa ka yano nga hinungdan: nakagamot kini sa sayop nga panghunahuna.

Usa sa labing maayong pamaagi sa sikolohikal nga pagtambag mao ang matawag nga “terapiya sa kamatuoran.” Ang matag pangutana nato nga puno sa pagkawalay paglaom ug ang matag konklusyon nga makapaluya nga atong nahimo bahin sa kinabuhi kinahanglang susihon pag-usab diha sa kahayag sa panghunahuna sa Diyos. Unsa may gihunahuna sa Diyos? Unsa may anaa sa hunahuna sa Diyos bahin niini? Kadtong mga kamatuoran nga naghulat nga madiskobrehan mao ang kamatuoran nga “mopalingkawas kaninyo.” Mas sayon mabuntog ang depresyon kon tan-awon nato ang atong kinabuhi sa paagi sa pagtan-aw niini sa Diyos. Kini mopatubo og paglaom, ug ang paglaom makapalingkawas kanato gikan sa mga gapos sa depresyon ug kalibog.

Sa espirituhanong bahin, mas labaw pang magamit kining mga prinsipyoha. Ang kamatuoran bahin sa sala, kapasayloan, kaluwasan ug Langit kinahanglang mailhan sa lawom nga paagi ug dawaton sa hingpit. Kon atong ilimod ang kamatuoran bahin sa sala o kapasayloan, nagpuyo kita sulod sa usa ka bakak ug nagpabiling ginapos nianang bakaka. Ang tinuod nga espirituhanong kagawasan nga mosangpot sa kaluwasan ug kinabuhing walay kataposan sa Langit makab-ot lamang kon kinasingkasing natong dawaton ang balaan ug hingpit nga espirituhanong kamatuoran nga gihatag kanato sa Diyos. Kinahanglang klaro natong mailhan ang atong sala, maghinulsol niini, mangayo sa kapasayloan sa Diyos, magbag-o sa atong kinabuhi ug magkinabuhi sa bag-ong kinabuhi sa grasya diin kita gitawag.

Pamalandongi karon kining pagtulon-an ni Jesus nga adunay dakong gahom sa pagbag-o: “mailhan ninyo ang kamatuoran, ug ang kamatuoran mopalingkawas kaninyo.” Unsang sikolohikal ug espirituhanong mga kamatuoran ang kinahanglan nimong mailhan sa mas lawom nga paagi? Unsang kalibog o pagkabuta ang nagpabilin? Pangitaa ang tambal diha sa Kamatuoran sumala sa anaa sa hunahuna sa Diyos, ug hibaloi nga naghulat kanimo ang kagawasan.

Diyos sa tanang Kamatuoran, ang Imong Pulong makapalingkawas, makapausab ug mopuno kanamo sa paglaom. Hinaot nga ipunting ko ang akong hunahuna Kanimo ug sa Imong balaang Pulong aron mailhan ko ang Kamatuoran sumala sa Imong gipamulong ug tugotan ko kanang Kamatuoran nga makapausab sa kinabuhi sa pagpalingkawas kanako. Jesus, misalig ako Kanimo.

40 Days at the Foot of the Cross – Reflection Thirty-Five – “It is Finished”

Mga Kapanguhaan alang sa Kwaresma

Dugang nga mga Pamalandong sa Ebanghelyo

Mga Pamalandong sa Diosnong Kalooy

Mga Pamalandong sa Balaang Kasulatan alang sa Kwaresma

Mga Santos/Kasaulogan Karong Adlawa

Mga Kapilian sa mga Basahon sa Misa

Featured image above: by Stephanie LeBlanc on Unsplash