Thursday, March 25, 2021
Solemnidad sa Pagpahibalo sa Anghel kang Maria
Paminaw sa Iningles
Ang anghel Gabriel gipadala sa Dios ngadto sa usa ka lungsod sa Galilea nga ginganlag Nazaret, ngadto sa usa ka ulay nga gisaad nang ipakasal sa usa ka lalaki nga ginganlag Jose, nga kaliwat ni David, ug ang ngalan sa ulay mao si Maria. Ug sa pagduol niya kang Maria, miingon siya, “Maghimaya ka, napuno sa grasya! Ang Ginoo anaa kanimo.” Luke 1:26–28
Handurawa kon ang Anghel Gabriel, ang mahimayaong Arkanghel nga nagatindog atubangan sa Labing Balaang Trinidad, moanha kanimo ug mopahibalo nga ikaw “napuno sa grasya” ug nga “Ang Ginoo anaa kanimo.” Pagkadili mahulagway ug pagkakahibulongan gayod sa maong kasinatian! Apan mao gayod kini ang nahitabo niining batan-ong dalagita, ang Mahal nga Birhen Maria.
Gisaulog nato karon kining kahibulongang hitabo, nga nagtimaan sa higayon nga ang Dios nahimong tawo sulod sa iyang bulahang sabakan. Hinumdomi nga ang adlaw karon mao ang siyam ka bulan sa dili pa ang Pasko. Gihatag kanato sa Simbahan kining Solemnidad karon aron dapiton kita sa paglakaw uban kang Maria sulod sa umaabot nga siyam ka bulan, aron makaambit kita sa iyang kalipay sa pagkatawo sa iyang diosnong Anak.
Daghan kitag ikasulti mahitungod niining mahimayaong Solemnidad. Mahimo natong pamalandongan si Inahang Maria ug ang iyang Imakulada nga Pagpanamkon. Mahimo natong pamalandongan ang mismong mga pulong nga gisulti sa Arkanghel. Mahimo natong pamalandongan ang misteryo sa iyang pagmabdos ug ang paagi nga gipili sa Dios aron sugdan kining gasa. Ug daghan pa kitag mapamalandongan. Bisan tuod kining tanang bahin angay gayod nga pamalandongan ug iampo pag-ayo, atong ipunting ang atong pagtagad sa tubag niining batan-ong babaye sa pahibalo sa anghel.
Una, mabasa nato nga si Maria “hilabihan nga nabalisa” ug “namalandong” niining mga pulong nga gisulti sa Arkanghel. Ang iyang pagkabalisa nagpakita nga si Maria wala pa hingpit nga mahibalo sa gipadayag sa Arkanghel. Apan ang iyang pagpamalandong sa mga pulong nagpakita usab sa iyang pagkaandam nga makasabot pa gayod. Dayon nangayo siya og mas lawom nga gasa sa kahibalo pinaagi sa pagpangutana, “Unsaon man pagkahitabo niini, sanglit wala man akoy pakighilawas sa lalaki?” Kining tubag usa una sa tanan ka pag-uyon diha sa pagtuo, nga gisundan sa usa ka hangyo alang sa mas lawom nga pagsabot niining pagpadayag. Ang pagtuo mao ang katakos sa pag-uyon sa butang nga wala pa nato hingpit nga masabti, apan ang tinuod nga pagtuo kanunayng nangita og mas lawom nga pagsabot—ug mao kini ang gibuhat ni Maria.
Human ang Arkanghel mipadayag kaniya og dugang, hingpit nga gidawat ni Maria ang gipadayag ug misalig siya nga ang gisulti kaniya mao na ang tanan nga kinahanglan niyang mahibaloan niadtong higayona. Ug dayon gihatag niya ang iyang tubag nga nailhan nga iyang “fiat.” Miingon siya, “Ania ako, ang sulugoon sa Ginoo. Matuman unta kanako sumala sa imong pulong.” Kining fiat ni Maria mao ang iyang hingpit nga pag-ampo sa pagtugyan ngadto sa kabubut-on sa Dios, ug mao usab kini ang hingpit nga sumbanan kon unsaon natong tanan pagtubag sa kabubut-on sa Dios. Kinahanglan natong ilhon ang atong kaugalingon nga tinuod nga mga sulugoon sa Iyang kabubut-on, ug kinahanglan natong dawaton sa kinasingkasing ang bisan unsang gipangayo sa Dios kanato, nga bug-os natong ipahiusa ang atong mga kabubut-on sa Iya.
Pamalandongi karon kining mga pulong sa atong Mahal nga Inahan: “Ania ako, ang sulugoon sa Ginoo. Matuman unta kanako sumala sa imong pulong.” Sa unsang paagi gihangyo ka sa Dios nga himoon usab kini nga imong pag-ampo? Sa unsang paagi gitawag ka sa Dios sa pag-alagad sa Iyang labing balaang kabubut-on? Andam ka ba nga hingpit nga mouyon sa bisan unsa ug sa tanang gipangayo sa Dios kanimo? Samtang mapinangampoon mong gipamalandongan kining fiat sa atong Mahal nga Inahan, paningkamoti nga mahiusa ang iyang tubag ug ang imoha aron ikaw usab mahimong sulugoon sa Labing Halangdong Dios.
Amahan sa Langit, Imong gipadala ang Imong Anak aron magpakatawo diha sa sabakan sa Mahal nga Birhen Maria. Ang Imong mahimayaong Arkanghel Gabriel mipahibalo niining Maayong Balita. Hinaot nga kanunay akong matinagdanon sa mga mensahe nga Imong ipadangat kanako samtang Imo akong gidapit sa pagpakig-ambit sa Imong balaang misyon sa pagdala sa Imong Anak nganhi sa kalibotan. Moingon ako og “Oo” karong adlawa, minahal nga Ginoo, aron tumanon ang Imong labing balaang kabubut-on. Hesus, misalig ako Kanimo.
Mga Kapanguhaan alang sa Kwaresma
Dugang nga mga Pamalandong sa Ebanghelyo
Mga Pamalandong sa Diosnong Kalooy
Mga Pamalandong sa Balaang Kasulatan alang sa Kwaresma
Further Reading – Annunciation of the Lord
Mga Kapilian sa mga Basahon sa Misa
Featured image above: The Annunciation By Benvenuto Tisi
