March 30, 2021
Tuesday of Holy Week
Readings for Today
Paminaw sa Iningles
“Karon gihimaya ang Anak sa Tawo, ug ang Diyos gihimaya diha kaniya. Kon ang Diyos gihimaya diha kaniya, ang Diyos usab maghimaya kaniya diha sa iyang kaugalingon, ug himayaon dayon niya siya.” Juan 13:31–32
Gisulti ni Jesus kining mga pulonga mahitungod sa Iyang paghimaya diha-diha human mobiya si Judas sa panihapon aron motugyan Kaniya. Bag-o pa lamang nahuman si Jesus sa paghugas sa mga tiil sa Iyang mga tinun-an, ug sa dili madugay tapuson Niya ang Kataposang Panihapon, moadto sa Tanaman sa Getsemani, dakpon, bunalan ug ilansang sa krus. Ug kining tanan mahitabo pinaagi sa pagbudhi sa usa sa Napulog Duha. Apan imbes mosulti mahitungod niining umaabot nga mga panghitabo uban sa kahadlok o kabalaka, gipunting ni Jesus ang himaya nga Iyang madawat pinaagi niini.
Ang tanang butang sa kinabuhi mahimong instrumento sa himaya sa Diyos. Bisan ang atong sala mahimong mosangpot sa himaya sa Diyos kon kita maghinulsol ug modawat sa Iyang pagpasaylo. Dili ang atong sala ang maghimaya sa Diyos, kondili ang Iyang kalooy nga gibubo kanato gikan sa Krus mao ang naghatag Kaniya og himaya.
Mao usab kini ang tinuod sa mga panghitabo sa Semana Santa. Kon tan-awon gikan lamang sa tawhanong panglantaw, ang giantos ni Jesus makapasubo ug makalilisang. Usa sa Iyang labing suod nga mga kauban mibudhi Kaniya. Ang mga pangulo sa relihiyon niadtong panahona mibudhi Kaniya. Ang sibil nga mga awtoridad mibudhi Kaniya. Ug ang tanang tinun-an gawas kang Juan nangalagiw sa kahadlok sa dihang gitugyan si Jesus. Apan wala kini tan-awa ni Jesus pinaagi lamang sa tawhanong mga mata. Nakita Niya kining tanan gikan sa panglantaw sa kahangtoran ug tin-aw Niyang gitudlo nga kining tanang daw makapasubo nga mga panghitabo mosangpot sa Iyang himaya.
Kon atong itugyan ang atong kaugalingon sa pagsunod kang Kristo, makasiguro kita nga makaambit usab kita sa Iyang Krus. Masinati nato ang mga sala sa uban, atubangon ang dili maayong pagtratar, ug kinahanglan natong antoson ang nagkalainlaing mga pag-antos. Ang pangutana alang kanatong tanan sa atong pag-atubang niining mga kasinatian sa kinabuhi mao kon antoson ba nato kini uban sa kasuko ug pagkawalay paglaom o uban sa masaligon ug puno sa paglaom nga pagsalig sa atong Ginoo. Sa makausa pa, ang tanang butang sa kinabuhi mahimong instrumento sa himaya sa Diyos. Walay bisan unsa sa kinabuhi nga adunay gahom sa pag-agaw nianang himayaa kon atong ipunting kanunay ang atong panan-aw sa kabubut-on sa Diyos ug sa Iyang gahom sa paggamit sa tanan alang sa Iyang himaya.
Pamalandongi karon ang tawag kanimo sa kinabuhi nga tan-awon ang tanan gikan sa balaang panglantaw. Kon usahay mabalaka ka, masuko, mawad-an og paglaom o maglibog, hibaloi nga gusto sa Diyos nga hatagan og katin-awan ug grasya ang matag kahimtang. Gusto Niyang ipakita kanimo kon unsaon nimo pag-ambit sa Iyang balaang misyon sa pagbag-o sa matag daotan ngadto sa himaya sa Diyos. Pangitaa ang mga paagi nga ang imong kinabuhi kinahanglang maghatag og himaya sa Diyos sa tanang butang, ilabina niadtong mga butanga nga daw dili magamit alang sa kaayohan. Kon mas daw dili magamit alang sa himaya sa Diyos ang usa ka kasinatian sa kinabuhi, mas dako usab ang katakos nianang kasinatiana sa paghatag og tinuod nga himaya sa Diyos.
Akong mahimayaong Ginoo, Imong gipagula ang kaayohan gikan sa tanang butang. Bisan ang grabeng kadaotan sa pagbudhi Kanimo nabag-o ngadto sa usa ka pagpadayag sa Imong himaya. Gitanyag ko Kanimo, hinigugmang Ginoo, ang tanan kong giantos sa kinabuhi ug nag-ampo ako nga mahimaya Ka sa tanang butang, ug nga ang akong kinabuhi padayon nga mahimong pagpadayag sa himayang angay sa Imong balaang ngalan. Jesus, misalig ako Kanimo.
Mga Kapanguhaan alang sa Kwaresma
Mga Pag-ampo alang sa Semana Santa
Dugang nga mga Pamalandong sa Ebanghelyo
Mga Pamalandong sa Diosnong Kalooy
Mga Pamalandong sa Balaang Kasulatan alang sa Kwaresma
Mga Santos/Kasaulogan Karong Adlawa
Mga Kapilian sa mga Basahon sa Misa
Featured image above: Last Supper By Philippe de Champaigne
