Lunes, Nobyembre 1, 2021
Solemnidad sa Tanang mga Santos
Sa dihang nakita ni Jesus ang panon sa katawhan, mitungas siya sa bukid, ug sa nakalingkod na siya, miduol kaniya ang iyang mga tinun-an. Gisugdan niya sila sa pagtudlo, nga nag-ingon: “Bulahan ang mga kabos sa espiritu, kay ila ang Gingharian sa langit.” Matthew 5: 1–3
Karong adlawa, gisaulog nato ang usa sa labing mahimayaong mga solemnidad sa atong Simbahan! Ang matag santos, kanonisado man o dili, gipasidunggan karong adlawa. Ang atong teksto sa Ebanghelyo naglatid sa dalan nga giagian niining mga santosa aron makasulod sa Langit. Samtang dinhi pa sa yuta, kining halangdong mga lalaki ug babaye nagkinabuhi nga kabos sa espiritu, puno sa balaang kasubo, kaaghop, kagutom ug kauhaw sa pagkamatarong, kalooy, kalinaw, kaputli sa kasingkasing ug bisan pa sa paglutos. Ang matag usa niining mga Kabulahanan nagtapos pinaagi sa pagpahayag sa ganti nga madawat niadtong nagkinabuhi uban niining mga hiyas: ang Langit, paghupay, katagbawan, kalooy, pagkakita sa Dios, pagkahimong mga anak sa Dios ug mga ganti nga labaw pa sa atong mahanduraw diha sa Gingharian sa Dios.
Ang mga Kabulahanan nagdapit kanato ngadto sa kahitas-an sa pagkabalaan. Dili kini alang sa mga mahuyang og kasingkasing o niadtong nagpuyo sa usa ka dagaang nga espirituhanong kinabuhi. Kining mga Kabulahanan nagpakita kanato sa kinatumyan sa balaang pagkinabuhi ug naghagit kanato hangtod sa kinahiladman sa atong pagkatawo. Apan ang matag paningkamot sa pagkinabuhi sumala niining mga Kabulahanan takos gayod dinhi sa yuta ug, sa kataposan, didto sa Langit. Atong tan-awon sa makadiyot ang duha niining mga Kabulahanan.
Ang ikaduhang Kabulahanan nagpahayag nga kadtong “nagbangotan…hupayon.” Makapainteres kining Kabulahanana. Nganong balaan man ang pagbangotan? Sa yano nga pagkasulti, kining matang sa balaang pagbangotan nagpasabot nga dili lamang ikaw adunay balaang kasubo tungod sa imong kaugalingong mga sala, kondili aduna ka usab niining balaang kasubo sa dihang makita nimo ang daghang kadaotan sa atong kalibotan. Importante kaayo kini karon. Una, klaro gayod nga kinahanglan kitang adunay balaang kasubo tungod sa atong kaugalingong mga sala. Ang pagbuhat niini nagpasabot nga naglihok ang imong konsensiya. Ug kon naglihok ang imong konsensiya, kining balaang kasubo magtukmod kanimo sa pag-ila sa imong mga paglapas batok sa Dios ug sa makugihong pagpaningkamot nga magbag-o. Apan kinahanglan usab kitang adunay balaang kasubo sa dihang makita nato ang daghang kadaotan sa atong kalibotan. Kasagaran kaayo karon, adunay kalagmitan nga pahuyangon kining Kabulahanana pinaagi sa pagpakita nga maayo ang pagdawat sa tanang butang nga walay pagpihig. Giingnan kita nga dili kita angay mohukom, ug bisan tuod tinuod kini kon bahin sa paghukom sa kasingkasing sa laing tawo, ang kalibotanong paghulagway niining sekular nga “hiyas” naningkamot sa pagdala kanato sa pagpakamenos sa obhetibong kinaiya sa sala. Ang atong sekular nga kalibotan nagtintal kanato sa pagsalikway sa daghang obhetibong kamatuoran sa moralidad nga gigamit sa Dios sa paggiya kanato ngadto sa tibuok kamatuoran. Apan isip mga Kristohanon, ang una natong tubag kinahanglan mao ang pagdumot sa tanang butang nga gitudlo sa atong Ginoo nga obhetibong daotan sa moralidad. Ug kon makaatubang kita sa mga paagi sa pagkinabuhi nga supak sa moralidad, ang tukmang tubag kinahanglan mao ang balaang kasubo, dili ang pagdawat sa bug-at nga sala. Ang pagbangotan tungod sa sayop nga mga pagpili sa laing tawo usa ka tinuod nga buhat sa gugma alang kaniya.
Ang ikaupat nga Kabulahanan nagtawag kanato sa “pagkagutom ug pagkauhaw sa pagkamatarong.” Nagpasabot kini nga dili lamang kita adunay balaang kasubo tungod sa atong mga sala ug sa mga daotan sa atong kalibotan nga daotan gayod sa ilang kaugalingon, kondili tugotan usab nato nga mapuno kita sa kagutom ug kauhaw sa kamatuoran ug sa balaang pagkinabuhi. Kini nga tinguha kinahanglang mahimong nagdilaab nga kadasig sulod kanato aron buhaton ang tanan natong mahimo sa pagpalapad sa Gingharian sa Diyos bisan asa. Kini nga Kabulahanan makapahimo kanato sa pagbuntog sa pagkawalay-pagtagad, ug nagdasig kanato sa pagpahinabo og kausaban bisan pa sa tanang pagsupak. Ug kining tinguhaa gipalig-on sa gugma ug sa tanang uban pang hiyas nga nag-uban niini.
Pamalandongi karon ang matahom nga kamatuoran nga gitawag ka nga mahimong santos. Ug ang labing kasaligang dalan ngadto sa pagkasantos mao ang mga Kabulahanan. Basaha kini pag-ayo. Pamalandongi kini ug hibaloi nga gipadayag niini kanimo kon giunsa ka pagtawag sa Diyos sa pagkinabuhi. Kon adunay usa niining mga Kabulahanan nga ilabinang nakatandog kanimo, paggahin og panahon sa pagtutok niini. Paningkamoti nga masilsil sa imong kasingkasing kining mga grasyaha, ug ang Diyos magbuhat og mga kahibulongang butang sa imong kinabuhi, hangtod nga usa ka adlaw himoon Niya kining solemnidad sa atong Simbahan nga usa ka tinuod nga pagsaulog sa imong kinabuhi nga gipuy-an sa maayong paagi.
Akong labing balaan nga Ginoo, naghari Ka karon sa Langit ug nagtinguha nga ang Imong mahimayaong Gingharian malig-ong matukod dinhi sa yuta. Hatagi ako sa grasya nga akong gikinahanglan aron tinguhaon ang pagkabalaan sa tibuok kong kasingkasing ug ilabina aron himoon kong dalan sa akong pagpanaw ang Imong pagpadayag sa mga Kabulahanan. Nangamuyo ako nga mahimo akong tinuod nga santos dinhi sa kalibotan ug nga gamiton Mo ako sa pagpalapad sa Imong Gingharian karon ug hangtod sa kahangtoran. Jesus, misalig ako Kanimo.
Dugang nga mga Pamalandong sa Ebanghelyo
Mga Pamalandong sa Diosnong Kalooy
Mga Pamalandong sa Balaang Kasulatan alang sa Panahon sulod sa Tuig
Dugang nga Basahon– Tanang Santos—Solemnidad
Mga Kapilian sa mga Basahon sa Misa
