Nobyembre 3, 2021
Miyerkules sa Ika-katloan ug Usa nga Semana sa Ordinaryong Panahon
Mga Pagbasa Karong Adlawa
San Martin de Porres, Relihiyoso—Opsiyonal nga Paghandum
Paminaw sa Iningles
Daghang mga tawo ang mikuyog kang Jesus, ug milingi Siya ug miingon kanila, “Kon adunay moduol Kanako nga dili magdumot sa iyang amahan ug inahan, asawa ug mga anak, mga igsoong lalaki ug babaye, ug bisan sa iyang kaugalingong kinabuhi, dili siya mahimong Akong tinun-an.” Lucas 14:25–26
Human niining makapakurat nga unang pahayag sa atong Ginoo, gitapos ni Jesus ang Ebanghelyo karong adlawa sa pag-ingon, “Sa samang paagi, bisan kinsa kaninyo nga dili mobiya sa tanan niyang kabtangan dili mahimong Akong tinun-an.” Busa, sa unang pagbasa, daw gitawag kita dili lamang sa pagbiya sa tanan natong kabtangan kondili usab sa pagdumot sa mga sakop sa atong kaugalingong pamilya. Apan mao ba gayod kini ang gipasabot sa atong Ginoo? Sugdan nato sa ideya sa “pagdumot” sa mga sakop sa atong pamilya ug bisan sa atong kaugalingong kinabuhi.
Klaro nga ang pulong nga “pagdumot” niining tudling sa Ebanghelyo dili pareho sa sala sa pagdumot ug kasuko. Sa pagkomentaryo niining tudling, usa ka Amahan sa Simbahan nagpasabot nga adunay mga kahimtang diin ang labing maayong paagi sa paghigugma sa uban mao ang usa ka matang sa pagdumot. Sa ato pa, kon adunay tawo nga mahimong babag sa atong pagduol sa Diyos, nga maningkamot sa pagpahilayo kanato gikan sa kabubut-on sa atong Ginoo, kinahanglan ipahayag nato nga lig-on ang atong “pagdumot” sa iyang mga binuhatan. Apan gugma kini. Ang pagdumili sa pagtalikod sa Diyos, pinaagi sa pagsalikway sa dili matarong nga mga binuhatan sa uban, usa ka paagi sa pagpaambit sa Ebanghelyo kanila. Atong tan-awon ang usa ka grabeng pananglitan.
Handurawa nga nagpuyo ka sa usa ka panahon ug kahimtang diin ang pagkahimong Kristohanon usa ka krimen. Gidakop ka ug gimandoan nga isalikway sa atubangan sa publiko ang imong pagtuo. Apan, hinuon, gisalikway nimo kana nga sugo sa tibuok kusog sa imong kalag. Niining kahimtanga, nagpakita ka og usa ka matang sa balaang “pagdumot” sa pagpanggukod nga gipahamtang kanimo nianang tawhana. Apan usa usab kini ka buhat sa gugma ngadto kaniya, kay hingpit nimong gisalikway ang iyang binuhatan pinaagi sa pagdumili sa iyang sugo.
O palandonga usab kon giunsa nimo pagdumot bisan ang imong “kaugalingong kinabuhi.” Pananglitan, balikbalik kang mahulog sa bug-at nga sala. Ang hustong tubag dili lamang ang paghinulsol kondili usab ang pagbaton og usa ka matang sa balaang pagdumot sa bisyong imong naandan. Tinuod kini nga pagdumot sa imong kaugalingon sa diwa nga gidumtan nimo ang nahimo nimong pagkatawo tungod sa imong sala. Apan ang kataposang tumong niining balaang pagdumot mao ang pagbuntog sa imong sala sa tibuok kadasig, ug busa usa kini ka tinuod nga buhat sa gugma alang sa imong kaugalingon.
Ang kataposang linya sa Ebanghelyo karon nga gihisgotan sa ibabaw nagtawag kanato sa pagsalikway sa tanan natong kabtangan. Sa laing pagkasulti, kinahanglan natong isalikway ang bisan unsang atong gikahigotan sa paagi nga supak sa kabubut-on sa Diyos. Siyempre, diha sa pag-atiman sa Diyos, kadaghanan sa mga tawo (gawas niadtong naghimo og panaad sa kakabos) gidapit Niya sa pagbaton og nagkalainlaing kabtangan aron matubag ang materyal nga mga panginahanglan sa kinabuhi. Apan bisan niini nga kahimtang, kinahanglan natong “isalikway” ang tanan natong gipanag-iya, nga nagpasabot nga dili nato tugotan ang atong kaugalingon nga mahigot sa bisan unsa gawas sa Diyos. Apan kini mao ang kagawasan sa labing tinuod nga kahulogan niini. Bisan pag daghan ka og kabtangan, kinahanglan nimong masabtan nga dili kadtong mga butanga ang makahatag kanimo og kalipay. Ang Diyos lamang ug ang Iyang kabubut-on ang makahatag kanimo og kahingpitan. Wala nay lain. Busa, kinahanglan kitang makat-on sa pagkinabuhi nga daw ang Diyos ug ang Diyos lamang igo na. Ug kon kabubut-on sa Diyos nga makabaton ka og balay, sakyanan, kompyuter, telebisyon ug uban pang modernong mga kahimanan nga makapasayon sa kinabuhi, nan mao kana ang matuman. Apan ang tinuod nga “pagsalikway” niining tanang kabtangan nagpasabot lamang nga kon mawala man kini kanimo sa bisan unsang higayon, madawat ra nimo kini. Anaa niana ang hingpit nga pagkalingkawas gikan sa pagkahigot sa mga butang. Ang pagkawala sa usa ka materyal nga butang dili gayod makababag kanimo sa paghigugma ug pag-alagad sa Diyos ug sa Iyang balaang kabubut-on.
Pamalandongi karon kining mga pulong ni Jesus nga nangayo og hingpit nga pagtugyan. Paningkamoti nga madungog kini sumala sa gipasabot sa atong Ginoo. Paningkamoti nga makalingkawas ka sa pagkahigot sa tanang supak sa kabubut-on sa Diyos ug sa tanang nahimong babag sa Diyos diha sa imong kinabuhi. Sa kataposan, ang pagbaton sa Diyos lamang labaw pa sa bisan unsang imong malaoman. Ug kon hingpit ka nang nakabaton sa atong maluluy-ong Diyos, diha lamang niana ka makahigugma sa imong kaugalingon ug sa uban uban sa putli nga kasingkasing ug gugma ni Jesus nga atong Ginoo.
Akong Ginoo nga dako og gipangayo, gitawag Mo kaming tanan ngadto sa kinabuhi sa hingpit nga pagkabalaan. Gitinguha Mo nga higugmaon Ko Ikaw labaw sa tanan uban sa tibuok kong kasingkasing. Palihog hatagi ako sa grasya ug kaalam nga akong gikinahanglan aron isalikway ang tanang babag sa akong paghigugma ug pag-alagad Kanimo. Hinaot nga Ikaw ug Ikaw lamang ang mahimaya sa akong kinabuhi. Jesus, nagsalig ako Kanimo.
Dugang nga mga Pamalandong sa Ebanghelyo
Mga Pamalandong sa Diosnong Kalooy
Santos sa Adlaw – San Martin de Porres, Relihiyoso
Mga Kapilian sa mga Basahon sa Misa
_-_Google_Art_Project.jpg){kind=link}