Nobyembre 11, 2021
Huwebes sa Ikakatloan ug Duha nga Semana sa Ordinaryong Panahon
Mga Pagbasa Karong Adlawa
San Martin sa Tours, Obispo—Handumanan
Paminaw sa Iningles
Sa dihang gipangutana Siya sa mga Pariseo kon kanus-a moabot ang Gingharian sa Diyos, mitubag si Jesus, “Ang pag-abot sa Gingharian sa Diyos dili makita pinaagi sa pagpaniid, ug walay moingon, ‘Tan-awa, ania kini,’ o, ‘Atua kini didto.’ Kay tan-awa, ang Gingharian sa Diyos anaa sa inyong taliwala.” Lucas 17:20–21
Nganong nangutana man ang mga Pariseo niini kang Jesus? Nganong buot man nilang mahibaloan kon kanus-a moabot ang Gingharian sa Diyos? Aron matubag kini nga pangutana, kinahanglan una natong tan-awon ang tibuok konteksto sa nagkalainlaing panag-istoryahanay tali ni Jesus ug sa mga Pariseo. Kon buhaton nato kini ug tan-awon ang daghang paagi nga gisulayan sa mga Pariseo nga lit-agon si Jesus sa Iyang mga pulong ug ang mga higayon nga hugot silang gibadlong sa atong Ginoo, daw klaro nga wala sila mangutana kang Jesus uban sa walay daotang tuyo ug bukas nga kasingkasing. Hinuon, gisulayan na usab nila Siya sa paglit-ag. Nangutana sila sa paagi nga morag nagtuo sila sa mga pagtulon-an ni Jesus nga moabot ang Gingharian sa Diyos, apan nangutana sila dili tungod sa pagtuo kondili aron magbiaybiay ug mosulay sa pagpasayop kang Jesus sa Iyang tubag.
Misteryoso ang tubag ni Jesus. Gamay ra kaayo ang kahigayonan nga magamit sa mga Pariseo ang Iyang mga pulong batok Kaniya. Tingali naglaom ang mga Pariseo nga moingon si Jesus nga ang Gingharian moabot sa dili madugay, o sa sunod bulan, o sulod sa tuig. Apan ang tubag ni Jesus nagbilin kanila nga naglibog atubangan niining misteryo nga “ang Gingharian sa Diyos anaa sa inyong taliwala.”
Daghan sa gisulti ni Jesus ang hingpit lamang masabtan pinaagi sa pagtuo. Kasagaran, tinuyo Niyang dili dayagon ang Iyang mga pulong, kay ang bugtong paagi aron mapadayag ug mailhan ang kahulogan sa Iyang mga pagtulon-an mao ang pagsalig sa gasa sa pagtuo nga dinasig sa Diyos. Ang pagtuo sama sa usa ka yawi nga moabli sa mga tinago sa mga misteryo sa Diyos. Ang pagtuo mahimong lente nga pinaagi niini masabtan ang matag sambingay, matag mahulagwayong pahayag, ug matag misteryo nga gitudlo sa atong Ginoo. Apan kon wala kining gasa sa pagtuo nga dinasig sa Diyos, ang mga pagtulon-an ni Jesus magpabiling misteryoso ug dili masabtan.
Sa imong pagpamalandong niining mga pulonga nga “ang Gingharian sa Diyos anaa sa inyong taliwala,” unsa ang imong nasabtan? Nagamit ba nimo ang gasa sa pagtuo aron matugkad ang kahulogan niining balaang pagtulon-an? Makapainteres nga ang pagbasa sa mga pulong ni Hesus, nga gipahayag sa dili dayag nga paagi, naghatag kanato og kahigayonan sa pagsusi sa atong kaugalingong pagtuo. Kon atong basahon ang Iyang mga pulong ug magpabilin kitang naglibog, kini usa ka tin-aw nga timailhan nga kinahanglan natong pangayoon sa pag-ampo ang gasa sa pagtuo ug ablihan ang atong kasingkasing sa pagdawat niini. Apan kon atong basahon ang misteryosong mga pagtulon-an ni Hesus ug hatagan kita sa kahayag sa pagsabot, kini usa ka tin-aw nga hinungdan sa pagmaya, kay kining pagsabot mahimo lamang pinaagi sa gasa sa pagtuo.
Pamalandongi karong adlawa kining balaang pagtulon-an sa atong Ginoo: “Ang Gingharian sa Diyos anaa sa inyong taliwala.” Palandonga kining mga pulonga ug pag-ampo alang sa mas lawom nga panan-aw ug pagsabot. Tinuod ang mga pulong ni Jesus. Ang Iyang Gingharian anaa gayod bisan asa, sa atong palibot ug sa atong sulod. Kini buhi ug mauswagon. Nakita ba nimo kini? Nailhan ba nimo kini? Nakita ba nimo ang imong tahas sa pagtukod niini? Gamita kining mga pangutanaha aron masulayan kon unsa kalalom ang imong pagtuo, ug hibaloi nga buot sa Diyos nga ipadayag kanimo kining mga misteryo nga masabtan lamang pinaagi sa Iyang grasya.
Akong Ginoo nga puno sa misteryo, ang Imong Gingharian anaa sa tanang dapit, sa among palibot ug sa among sulod. Nagtuo gayod ako. Hatagi ako sa mga mata sa pagtuo aron padayon kong makita ang Imong kamot nga naglihok. Hinaot kanunay akong matinagdanon sa tanan nga buot Nimong ipadayag kanako ug bukas sa lawom nga kahulogan sa mga misteryo nga Imong gipadayag. Palamboa ang akong pagtuo, minahal nga Ginoo, aron mailhan ko Ikaw ug makaambit sa pagtukod sa Imong mahimayaong Gingharian. Jesus, nagsalig ako Kanimo.
Dugang nga mga Pamalandong sa Ebanghelyo
Mga Pamalandong sa Diosnong Kalooy
Santos sa Adlaw – San Martin sa Tours, Obispo
Mga Kapilian sa mga Basahon sa Misa
