Nobyembre 12, 2021
Biyernes sa Ikakatloan ug Duha nga Semana sa Ordinaryong Panahon
Mga Pagbasa Karong Adlawa
San Josaphat, Obispo ug Martir—Handumanan
Paminaw sa Iningles
Miingon si Jesus sa iyang mga tinun-an: “Ingon sa nahitabo sa mga adlaw ni Noe, mao usab ang mahitabo sa mga adlaw sa Anak sa Tawo; nangaon sila ug nanginom, nangaminyo ug gipangminyo hangtod sa adlaw nga misulod si Noe sa arka, ug miabot ang lunop ug milaglag kanilang tanan.” Lucas 17:26–27
Samtang mosulod kita sa kataposang mga semana sa liturhikanhong tuig, magsugod kita sa pagpunting sa atong pagtagad ngadto sa kataposang pag-anhi ni Cristo. Sa Ebanghelyo karong adlawa, gihatag ni Jesus kanato ang panig-ingnan nila ni Noe ug Lot. Sa ilang duha ka sugilanon, ang mga tawo nangaon, nanginom, nangaminyo, namalit, namaligya, nananom ug nagtukod, hangtod gayod sa adlaw nga miabot ang lunop aron paglaglag sa yuta sa panahon ni Noe ug miulan og kalayo gikan sa langit sa panahon ni Lot. Naluwas si Noe ug si Lot, apan daghan sa ubang mga tawo nga buhi niadtong panahona ang kalit ug wala damhang nalaglag.
Miingon si Jesus nga ang “mga adlaw sa Anak sa Tawo” mahisama niining duha ka nangaging hitabo. Sa usa ka wala damhang panahon, mobalik si Jesus sa yuta, ug mosunod ang Kataposang Paghukom. Busa tin-aw ang Iyang mensahe: Pangandam sa tanang panahon.
Bisan tuod pamilyar kita niining pagtulon-an sa atong Ginoo, nga gisulti sa makadaghang higayon ug sa nagkalainlaing paagi diha sa mga Ebanghelyo, daghang tawo ang wala magtagad sa mensahe. Sayon ra ang pagtuo nga aduna ka pay ugma aron magbag-o, busa magpadala ka sa tentasyon karong adlawa. Unya moabot ang ugma, ug magpadala ka na usab sa tentasyon uban sa hunahuna nga paningkamotan nimo ang pagbag-o sa sunod nga adlaw, ug magpadayon kini. Sayon ra alang kanato nga padayon nga magpakasala ug modawat sa atong mga tentasyon samtang kanunay kitang adunay maayong tuyo nga magbag-o ugma. Sayop kini tungod sa duha ka hinungdan.
Una sa tanan, kanunayng posible nga moanhi gayod ang atong Ginoo karong adlawa ug nga karong adlawa na gayod ang kataposan sa kalibotan. O, kanunay usab nga posible nga ang imong kinabuhi matapos karong adlawa, sa kalit ug sa wala damhang paagi. Kon mahitabo kana, andam ka ba sa hingpit nga moatubang sa hukmanan ni Cristo? Kadaghanan sa mga tawo dili pa andam, o labing menos dili pa hingpit nga andam. Busa, igo na unta kini nga kadasig aron maningkamot nga walay kakapoy karong adlawa aron mahimong andam karon ug sa matag higayon nga mosunod.
Apan angay usab natong tan-awon kining panagna sa atong Ginoo nga magamit sa matag higayon sa matag adlaw. Si Jesus kanunayng moabot kanato, sa kalit ug walay pahimangno, nga nagdapit kanato sa pag-alagad Kaniya pinaagi sa grasya. Kining tudling sa Ebanghelyo nag-ingon nga “Bisan kinsa nga maningkamot sa pagtipig sa iyang kinabuhi mawad-an niini, apan ang mawad-an niini makaluwas niini.” Kini magamit sa kataposan sa atong kinabuhi ug sa kataposan sa kalibotan, apan magamit usab kini sa matag higayon sa matag adlaw. Kon kanunay kitang maningkamot nga wad-on ang atong kinabuhi, sa ato pa, pilion ang langitnong mga kamatuoran inay ang lumalabay nga kalibotanong mga kalipayan nga nagtintal kanato matag adlaw, nan matag adlaw usab natong masinati ang grasya sa kaluwasan, dinhi ug karon, sa matag higayon sa atong kinabuhi.
Pamalandongi karon kon kanunay ka bang naningkamot nga mawad-an sa imong kinabuhi alang sa Gingharian sa Dios. Kanunay ba nimong gipili ang grasya, kaluoy, Langit, pagkamasinugtanon, gugma, pagsakripisyo sa kaugalingon, pagkamabination, pagpasaylo ug uban pang susamang mga butang, sa matag gutlo sa matag adlaw sa imong kinabuhi? Kon mao kini, ang atong Ginoo kanunayng mohatag kanimo sa gasa sa Iyang makaluwas nga grasya dinhi ug karon, nga mag-andam kanimo alang sa kataposang gutlo sa paghukom. Kon dili, mas mahisama ka sa mga tawo sa panahon ni Noe ug ni Lot nga kalit lang nalaglag sa dihang wala gayod sila magdahom niini. Pagkinabuhi alang sa Dios karon, niining adlawa, niining gutloa, ug magmapasalamaton ka sa kahangturan nga gibuhat mo kini.
Ginoo kong kanunayng anaa, kanunay Kang moduol kanako, sa kalit ug sa wala damha, apan sa makadaghan wala ako makadungog Kanimo o makamatikod sa Imong presensya. Palihog tabangi ako nga magkinabuhi kanunay alang Kanimo ug pinaagi sa Imong grasya, nga mopili sa mga butang sa Langit inay sa lumalabay nga mga kalipayan. Hinaot nga kanunay akong magkinabuhi niining paagiha, nga makigtagbo Kanimo sa matag gutlo sa akong kinabuhi ug magpaabot sa mahimayaong kataposang pagpakigtagbo Kanimo sa panahon sa paghukom. Jesus, misalig ako Kanimo.
Nobena kang Kristo nga Hari
Nobyembre 12–20, 2021
Dugang nga mga Pamalandong sa Ebanghelyo
Mga Pamalandong sa Diosnong Kalooy
Santos sa Adlaw – San Josaphat, Obispo ug Martir
Mga Kapilian sa mga Basahon sa Misa
