Pebrero 15, 2022
Martes sa Ikaunom nga Semana sa Ordinaryong Panahon
Mga Pagbasa Karong Adlawa
Paminaw sa Iningles
Gipasidan-an sila ni Jesus, “Pagbantay kamo, likayi ang patubo sa mga Pariseo ug ang patubo ni Herodes.” Marcos 8:15
Unsa kining “patubo” nga gihisgotan ni Jesus? Human Niya hatagi og pasidaan ang Iyang mga tinun-an, gipatin-aw ni Jesus kanila kon unsa ang Iyang gipasabot ug unsa ang dili Niya gipasabot. Apan bisan ang Iyang pagpatin-aw daw wala gihapon nila masabti. Busa gitapos Niya kini sa pag-ingon, “Wala pa ba gihapon kamo makasabot?” Hangtod karong adlawa, gipangutana gihapon ni Jesus ang matag usa kanato niini.
Tin-aw nga gipaningkamotan ni Jesus nga mapahunahuna sila, maminaw, ug mosusi pag-ayo. Gipasidan-an Niya sila, “Pagbantay kamo!” Pagbantay niining patubo. Usa kini ka pasidaan nga nagagikan sa gugma aron matabangan sila nga makakita ug makasabot sa usa ka tinuod gayod nga peligro.
Ang matag magluluto og pan nahibalo sa epekto sa bisan gamay lang nga patubo (sama sa lebadura) diha sa minasa. Butangi lang og gamay ug maapektuhan niini ang tibuok pan. Kon adunay bata nga motabang sa pagluto, basin magbalikbalik siya sa pagtan-aw sa minasa samtang kini hinayhinay nga moburot. Makalingaw gayod kini nga tan-awon. Ug kining tanan resulta lamang niining gamay nga lebadura.
Busa unsa man kining patubo sa mga Pariseo ug ni Herodes? Mao kini ang daotang mga pulong, daotang tuyo, ug mga sayop nga ilang gipakaylap. Alang sa mga Pariseo, tingali gamay lang kini nga sayop nga pagsabot o pagtuis sa gisulti o gibuhat ni Jesus. Mahimong ilang tuison ang Iyang mga pulong o ipadayag lang ngadto sa uban ang ilang mga opinyon nga walay gisulti. Makatakod kini ug mahimong makaapekto sa tanan. Sa hinayhinay, ang gagmay nilang mga binhi sa pagduhaduha ug pagsupak makadaot sa uban.
Tingali ang atong mahunahunaan mao kadtong tanang “tawhana” nga atong nailhan nga nagbuhat niini. Apan masayang ang usa ka mahinungdanong higayon sa pagtubo kon dili una nato susihon ang atong kaugalingon. Nagbuhat ba usab ako niini usahay? Nagsulti ba ako og mga butang nga makapahisalaag sa gagmay o dili dayon mamatikdang paagi? O gipahisalaag ko ba ang uban pinaagi sa akong negatibong mga tinamdan nga walay gisulti? Usa ba ako ka “negatibong tawo” usahay?
Dili kinahanglan nga mabug-atan kita sa pagbati sa pagkasad-an o pakamenoson ang atong kaugalingon kon maamgohan nato nga sad-an kita niini. Hinuon, angay natong pamalandongan kining mubo nga leksiyon ni Jesus aron masabtan ang dakong gahom sa atong mga pulong. Bisan ang labing gagmay nga mga pulong mahimong makapahinabog dakong kadaot sa paglabay sa panahon.
Apan dili lang kana ang angay natong tutokan. Sama usab ka mahinungdanon ang pagkaamgo nga ang gagmayng mahigugmaong mga pulong nga atong isulti mahimong makahatag og dakong kausaban sa paglabay sa panahon. Tingali mao lamang kini ang gamayng pahiyom nga atong ihatag o usa ka maayong buhat nga sa atong hunahuna wala mamatikdi. Kining gagmayng mga buhat ug pulong mao ang patubo sa Ebanghelyo. Makahatag gayod kini og kausaban ug mahimo usab kining makatakod.
Pamalandongi karon ang gagmayng mga butang sa kinabuhi. Ilha nga kining gagmayng mga sala ug gagmayng mga buhat sa gugma adunay dakong epekto sa kataposan.
Akong matinagdanong Ginoo, tabangi ako nga magmatinud-anon ug makakita kon unsang matang sa patubo ang akong gipugas matag adlaw. Tabangi ako nga mahinloan sa daotan ug mapuno sa maayo. Hinaot nga dasigon Mo ako nga mahimong maayong patubo sa tanan nakong adlaw-adlaw nga pakig-uban sa uban. Jesus, misalig ako Kanimo.
Dugang nga mga Pamalandong sa Ebanghelyo
Mga Pamalandong sa Diosnong Kalooy
Mga Pamalandong sa Balaang Kasulatan alang sa Panahon sulod sa Tuig
Mga Santos/Kasaulogan Karong Adlawa
Mga Kapilian sa mga Basahon sa Misa
