Abril 9, 2022
Sabado sa Ikalimang Semana sa Kwaresma
Mga Pagbasa alang Karong Adlawa
Paminaw sa Iningles
Apan ang usa kanila, si Caifas, nga mao ang labawng saserdote niadtong tuiga, miingon kanila, “Wala gayod kamoy nahibaloan, ni makahunahuna nga mas maayo alang kaninyo nga usa ka tawo ang mamatay alang sa katawhan, aron dili malaglag ang tibuok nasod.” Juan 11:49–50
Sama sa pamalandong sa miaging adlaw, importante nga sugdan nato ang pagpunting sa atong pagtagad sa pag-antos ug kamatayon ni Hesus. Magsugod ang Semana Santa karong Dominggo, busa mao kini ang panahon sa tuig nga gusto sa Dios nga tutokan nato pag-ayo ang Iyang Krus. Importante nga tan-awon kini gikan sa tanang anggulo, aron masabtan kon unsay nahitabo, unsay nasinati ni Hesus, unsay nasinati sa mga tinun-an, ug bisan unsay nasinati sa mga Pariseo ug sa mga punoang saserdote.
Sa Ebanghelyo karong adlawa nga gikutlo sa ibabaw, makita nato ang panghunahuna ni Caifas, ang labawng saserdote. Makapainteres ang iyang mga pulong kay makapasubo kini ug sa samang higayon matagnaon. Siya, uban sa ubang punoang mga saserdote ug sa mga Pariseo, nagsugod na sa pagplano ug paglaraw sa kamatayon ni Hesus. Apan ang makahatag kanatog pagsabot mao ang dayag nga motibo ni Caifas ug sa uban.
Nagkadaghan ang midapig kang Hesus, ug nahadlok sila nga kini makapahinabog kagubot sa ilang relasyon sa mga Romano. Nangabugho usab sila tungod kay daghan kaayo ang nadani ni Hesus. Busa gipahayag ni Caifas ang hiwi nga pangatarongan nga mas maayo nga usa ka tawo ang mamatay kay sa tanang katawhan. Sa laing pagkasulti, daw naghunahuna siya nga tungod kay nagkadaghan ang midapig kang Hesus, ug ang katawhan mas naminaw kang Hesus kay sa mga punoang saserdote ug mga Pariseo, mas maayo nga wagtangon ang “problema” aron mobalik ang tanan sa naandang kahimtang.
Gipadayag niini nga mas nabalaka ang mga Pariseo sa ilang kaugalingon ug sa ilang kahimtang kay sa Kamatuoran. Makapatingala nga usa sa ilang mga pagsaway kang Hesus mao nga daghan ra kaayo Siyag gihimong mga timailhan ug mga kahibulongan. Pagkatalagsaon gayod. Kon interesado pa ang mga punoang saserdote ug ang mga Pariseo sa Kamatuoran, makita usab unta nila ang himaya ug diosnong awtoridad ni Hesus ug motuo sila Kaniya ug mosunod Kaniya. Apan dili nila matulon ang ilang garbo ug dawaton ang tawag sa pagsunod sa laing tawo imbes nga sa ilang kaugalingon. Dili nila mabuhian ang ilang katungdanan nga may awtoridad.
Kanunay natong makita kining mao rang kasinatian sa atong adlaw-adlaw nga kinabuhi. Gusto natong kita ang sentro sa pagtagad. Ug kasagaran, kon makita nato nga adunay laing tawo nga nagmalampuson o gidayeg, mahimo kitang mangabugho. Ug ang atong pangabugho sagad mahimong usa ka matang sa kasina. Ang kasina nagpasabot nga masuko ug masubo kita tungod sa kaayohan sa uban. Mahimong maghunos-hunos kita niini ug magtinguha nga mapakyas sila.
Ang angay natong tinguhaon mao ang pagkahimong usa sa matinud-anong mga sumusunod ni Hesus. Labing importante nga pamalandongon kini karong umaabot nga semana samtang imong masaksihan ang nagkagrabeng pagdumot batok sa atong Ginoo. Unsay imong buhaton kon didto ka? Magpadayon ka ba sa pagdapig kang Hesus bisan pa sa mga pag-atake sa uban? Samtang nagkagrabe ang pagdumot batok kang Hesus, mopalayo ka ba Kaniya o mas moduol pa Kaniya uban sa gugma ug matinud-anong pagtugyan?
Pamalandongi karong adlawa ang umaabot nga paghandum sa paglutos sa atong Ginoo. Sugdi sa pagpamalandong sa daghang mga reaksyon ug kasinatian sa mga tawo niadtong unang Semana Santa. Ibutang ang imong kaugalingon sa ilang kahimtang ug paningkamoti nga masinati kini uban ni Hesus. Ang tumong mao nga makaplagan nato ang atong kaugalingon didto sa tiilan sa Krus uban Kaniya sa Biyernes Santo, nga puno sa gugma ug kaisog, nagdapig Kaniya ug nahigugma Kaniya sa matag lakang sa dalan.
Akong Ginoo nga gilutos, hinaot mosunod ako Kanimo karong umaabot nga Semana Santa. Hinaot maangkon ko ang gugma nga akong gikinahanglan aron mahigugma Kanimo bisan pa sa pagsalikway ug kasakit nga Imong giantos. Tabangi ako nga isalikway ang tanang kasina ug kahakog ug makita Ka ilabina diha sa mga pag-antos sa uban ug sa ilang kaayo. Hesus, misalig ako Kanimo.
(Sabado sa Ikalimang Semana sa Kwaresma)
Dugang nga mga Pamalandong sa Ebanghelyo
Mga Pamalandong sa Diosnong Kalooy
Mga Kapanguhaan alang sa Kwaresma
Mga Pamalandong sa Balaang Kasulatan alang sa Kwaresma
Mga Santos/Mga Kasaulogan Karong Adlawa
Mga Kapilian sa mga Basahon sa Misa
