Agosto 20, 2022
Sabado sa Ikakawhaang Semana sa Panahon sulod sa Tuig
Mga Pagbasa alang Karong Adlawa
San Bernardo sa Clairvaux, Abad ug Doktor sa Simbahan—Paghandum
Paminaw sa Iningles
“Ang mga eskriba ug ang mga Pariseo milingkod sa lingkoranan ni Moises. Busa, buhata ug tumana ang tanan nilang isulti kaninyo, apan ayaw sunda ang ilang panig-ingnan. Kay nagsangyaw sila apan wala nila kini buhata. Nagbugkos sila ug bug-at nga mga lulan nga lisod pas-anon ug ilang ipapas-an sa abaga sa mga tawo, apan dili gani sila motandog niini bisan sa usa ka tudlo aron sa pagtabang. Ang tanan nilang buhat gihimo aron makita sa mga tawo. Ilang gipadak-an ang ilang mga pilakterya ug gipataas ang mga borlas sa ilang mga sapot. Ganahan sila sa mga dapit nga dungganon sa mga kombira, sa mga lingkoranan nga dungganon sa mga sinagoga, sa mga pagtimbaya sa mga tiyanggihan, ug sa pagtawag kanila nga ‘Rabbi.’” Mateo 23:2-7
Sa tradisyon, ang mga Sabado gipahinungod sa pagpasidungog sa atong Bulahang Inahan. Pagkadako sa kalainan tali sa mga Pariseo ug sa atong Bulahang Inahan, Rayna sa Langit ug sa Yuta!
Una, magsugod kita sa mga Pariseo. Kanunay silang gisaway ni Jesus tungod sa ilang garbo ug pagpakamatarong sa kaugalingon. Nag-ampo sila ngadto sa ilang kaugalingon, nangita sa mga dapit nga dungganon, nangayo sa pagtahod sa uban ug hingpit nga natugob sa ilang kaugalingon. Ang kanunayng pagsaway ni Jesus kanila maoy usa ka buhat sa Iyang kalooy. Usa kini ka paagi sa pagpaningkamot nga mahigawas sila sa ilang garbo ug matabangan sila nga makakita sa kahayag sa kamatuoran.
Ikaduha, itandi nato kini sa atong Bulahang Inahan. Ang iyang pagkamapainubsanon labaw pa sa atong mahunahuna. Siya ang Imakulada Konsepsiyon…hingpit sa tanang paagi. Anaa sa iyang kalag ang matag hiyas. Siya ang Bag-ong Eva, ang bag-ong Inahan sa tanang Buhi. Ug siya gipasidunggan hangtod sa kahangtoran isip Rayna sa Langit ug sa Yuta.
Makita ang dakong kalainan sa paagi sa iyang pagkinabuhi. Makita kini sa kamatuoran nga aduna siyay bug-os nga katungod sa pagbayaw sa iyang kaugalingon ug sa pagdahom ug dungog ug pagtahod sa tibuok niyang kinabuhi. Apan, sa iyang pagkamapainubsanon, wala niya angkona ang maong katungod. Gitugotan niya nga magpabilin siyang tago ug gani biaybiayon tungod sa pagmabdos nga dili minyo. Lahi siya sa mga Pariseo sa tanang paagi.
Apan karon, hangtod sa kahangtoran, gibayaw siya sa Diyos. Sa walay kataposan ilhon siya nga Rayna ug pasidunggan ug higugmaon sa tanan. Ang tanan niyang hiyas mosidlak sa walay kataposan kay siya gigantihan ug gibayaw aron makita sa tanan.
Pamalandongi karong adlawa kon kinsa ang imong mas nahisama. Mas nahisama ka ba sa mga Pariseo nga nagtinguha sa pagbayaw sa ilang kaugalingon? O mas nahisama ka ba sa atong Bulahang Inahan nga nagpaubos sa iyang kaugalingon? Pilia ang pagsundog sa atong Bulahang Inahan ug ang Diyos moganti usab kanimo hangtod sa kahangtoran!
Ginoo, hinaot nga makita ko ang katahom ug kahalangdon sa kalag sa Imong inahan. Hinaot nga higugmaon ug pasidunggan ko siya. Ug diha nianang gugma ug pagpasidungog, hinaot nga masundog ko siya sa tanang paagi. Jesus, nagsalig ako Kanimo.
Nobena kang Santa Monica
Agosto 18–26
Dugang nga mga Pamalandong sa Ebanghelyo
Mga Pamalandong sa Diosnong Kalooy
Santos sa Adlaw – San Bernardo sa Clairvaux, Abad ug Doktor sa Simbahan
Mga Kapilian sa mga Basahon sa Misa
Gipiling Hulagway: Ang Pagpahibalo sa Anghel diha sa Bildo – Maria, pinaagi sa flickr
