Bulahan Ka Ba?

Oktubre 8, 2022
Sabado sa Ika-27 nga Semana sa Ordinaryong Panahon
Mga Pagbasa alang Karong Adlawa

Paminaw sa Iningles

Samtang nagsulti si Jesus, usa ka babaye gikan sa panon misinggit ug miingon Kaniya, “Bulahan ang sabakan nga nagdala Kanimo ug ang mga dughan nga Imong gisus-an.” Siya mitubag, “Hinuon, bulahan kadtong naminaw sa pulong sa Diyos ug nagtuman niini.” Lucas 11:27-28

Nagpaminaw ka ba sa Pulong sa Diyos? Ug kon nakadungog ka niini, gituman ba nimo kini? Kon mao, mahimo nimong isipon ang imong kaugalingon nga usa niadtong tinuod nga bulahan sa atong Ginoo.

Makapainteres nga ang babayeng nakigsulti kang Jesus niining tekstoha nagpasidungog sa Iyang inahan pinaagi sa pag-ingon nga bulahan siya tungod kay iyang gisabak ug gipasuso si Jesus. Apan mas labaw pa ang pagpasidungog ni Jesus sa Iyang inahan pinaagi niining Iyang gipahayag. Gipasidunggan Niya siya ug gitawag nga bulahan kay, labaw kang bisan kinsa, siya naminaw sa Pulong sa Diyos ug nagtuman niini sa hingpit.

Ang pagpaminaw ug ang pagbuhat duha ka lahi kaayong butang. Ang duha nagkinahanglan ug dakong pagpahinungod sa espirituhanong kinabuhi. Una sa tanan, ang pagpaminaw sa Pulong sa Diyos dili lamang kay pagkadungog niini sa atong mga dalunggan o pagbasa sa Bibliya. Ang “pagpaminaw” dinhi nagpasabot nga ang Diyos nakigsulti sa atong mga kalag. Nagpasabot kini nga nakigrelasyon kita sa usa ka Persona, si Jesus mismo, ug gitugotan nato Siya sa pagsulti kanato sa bisan unsang buot Niyang ipaabot.

Bisan tuod mahimong lisod ang pagpaminaw kang Jesus nga nagsulti ug ang pagsilsil sa atong kasingkasing sa Iyang gisulti, mas lisod pa gayod ang pagtugot nga ang Iyang Pulong magbag-o kanato hangtod nga atong ikinabuhi ang Iyang gipamulong. Kasagaran, maayo kaayo ang atong mga tuyo apan mapakyas kita sa pagpatuman niini pinaagi sa pagkinabuhi sa Pulong sa Diyos.

Pamalandongi karong adlawa ang pagpaminaw ug ang pagtuman. Sugdi sa pagpaminaw ug pamalandongi kon matag adlaw ba nimong gitugotan si Jesus nga makigrelasyon kanimo. Gikan niana, pamalandongi kon imong gikinabuhi ang nahibaloan nimong Iyang gipamulong. Ipahinungod pag-usab ang imong kaugalingon niining prosesoha ug imong makita nga ikaw usab tinuod nga bulahan!

Walay Kataposang Pulong sa Diyos, hinaot nga makadungog ako Kanimo nga nakigsulti kanako. Hinaot nga makatagbo ko Ikaw sulod sa akong kalag ug madawat ang Imong balaang Pulong. Hinaot usab nga akong ikinabuhi kana nga Pulong aron masinati ko ang mga panalangin nga Imong giandam alang kanako. Jesus, nagsalig ako Kanimo.

BAG-O!

Ang Sulodnong Panaw Padulong sa Dios:
Mga Pamalandong gikan kang Santa Teresa sa Ávila