Disyembre 1, 2022
Huwebes sa Unang Semana sa Adbiyento
Mga Pagbasa Karong Adlawa
Paminaw sa Iningles
“Dili ang tanan nga moingon Kanako, ‘Ginoo, Ginoo,’ makasulod sa Gingharian sa langit, kondili kadto lamang nga nagtuman sa kabubut-on sa Akong Amahan nga anaa sa langit.” Matthew 7:21
Makahadlok hunahunaon ang mga tawo nga gipasabot ni Jesus. Handurawa nga sa imong pagbiya niining yutan-ong kinabuhi, miabot ka sa atubangan sa trono sa Diyos ug mituaw Kaniya, “Ginoo, Ginoo!” Nagpaabot ka nga mopahiyom Siya ug modawat kanimo, apan hinuon, moatubang ka sa kamatuoran sa imong padayon ug gahig-ulong pagsupak sa kabubut-on sa Diyos sa tibuok nimong kinabuhi. Kalit nimong maamgohan nga nagpakaaron-ingnon ka nga Kristohanon, apan pakitang-tawo lamang diay kadto. Ug karon, sa adlaw sa paghukom, ang kamatuoran madayag kanimo ug makita sa tanan. Makahahadlok gayod kini nga kahimtang.
Kang kinsa kini mahitabo? Siyempre, ang atong Ginoo lamang ang nahibalo. Siya ang bugtong Matarong nga Maghuhukom. Siya ug Siya lamang ang nahibalo sa kasingkasing sa usa ka tawo, ug ang paghukom gitugyan lamang Kaniya. Apan ang kamatuoran nga gisultihan kita ni Jesus nga “Dili ang tanan” nga naglaom nga makasulod sa Langit makasulod gayod, angay natong hatagan og pagtagad.
Angay unta nga ang atong kinabuhi gimandoan sa lawom ug putli nga gugma sa Diyos, ug kini nga gugma ug kini lamang ang naggiya sa atong kinabuhi. Apan kon ang putli nga gugma sa Diyos dili tin-aw nga makita diha kanato, ang sunod nga labing maayong makapadasig kanato tingali mao ang balaang kahadlok. Ang mga pulong nga gisulti ni Jesus angayng mopukaw niining “balaang kahadlok” diha sa matag usa kanato.
Sa pulong nga “balaan,” nagpasabot kita nga adunay usa ka matang sa kahadlok nga makapadasig kanato sa tinuod nga pag-usab sa atong kinabuhi. Mahimong malimbongan nato ang uban, ug tingali bisan ang atong kaugalingon, apan dili nato malimbongan ang Diyos. Nakakita ug nahibalo ang Diyos sa tanang butang, ug nahibalo Siya sa tubag sa bugtong pangutana nga mahinungdanon sa adlaw sa paghukom: “Gituman ko ba ang kabubut-on sa Amahan nga anaa sa Langit?”
Usa ka naandang buhat, nga balikbalik nga girekomendar ni San Ignacio de Loyola, mao ang pagsusi sa tanan natong mga desisyon ug binuhatan karon gikan sa panglantaw sa adlaw sa paghukom. Nianang higayona, unsa kaha ang akong pangandoy nga nabuhat unta nako? Ang tubag nianang pangutanaha mahinungdanon kaayo sa paagi sa atong pagkinabuhi karon.
Pamalandongi karon kanang mahinungdanong pangutana sa imong kaugalingong kinabuhi. “Gituman ko ba ang kabubut-on sa Amahan nga anaa sa Langit?” Sa akong pagbarog sa atubangan sa hukmanan ni Kristo, unsa kaha ang akong pangandoy nga nabuhat unta nako dinhi ug karon? Bisan unsa pay mosantop sa imong hunahuna, paggahin og panahon sa pagpamalandong niini ug paningkamoti nga molig-on pa ang imong determinasyon sa pagtuman sa bisan unsang ipadayag sa Diyos kanimo. Ayaw pagpanuko. Ayaw paghulat. Pangandam karon aron ang adlaw sa Paghukom mahimo usab nga adlaw sa hilabihang kalipay ug himaya!
Diyos nga akong Manluluwas, nag-ampo ako nga hatagan Mo ako og hait nga pagsabot sa akong kinabuhi. Tabangi ako nga makita ang akong kinabuhi ug ang tanan kong binuhatan diha sa kahayag sa Imong kabubut-on ug sa Imong Kamatuoran. Akong mahigugmaong Amahan, nagtinguha ako nga magkinabuhi nga hingpit nga nahiuyon sa Imong hingpit nga kabubut-on. Hatagi ako sa grasya nga akong gikinahanglan aron matul-id ang akong kinabuhi ug ang adlaw sa paghukom mahimong adlaw sa labing dakong himaya. Jesus, nagsalig ako Kanimo.
Nobena sa Imakulada Concepcion
Nobyembre 29-Disyembre 7
Tan-awa ang tanan namong mga Kapanguhaan alang sa Adbiyento
Nobena sa Pasko ni San Andres
Ang pag-ampo sa Nobena sa Pasko ni San Andres sa ubos naandang ampoan og 15 ka higayon matag adlaw gikan sa Nobyembre 30, ang Pista ni San Andres, hangtod sa Bisperas sa Pasko.
Dugang nga mga Pamalandong sa Ebanghelyo
Mga Pamalandong sa Diosnong Kalooy
Mga Pamalandong sa Balaang Kasulatan alang sa Adbiyento
Mga Santos/Kasaulogan Karong Adlawa
Mga Kapilian sa mga Basahon sa Misa
Gipasiugdang hulagway sa ibabaw: Cristo Pantocrator ni Petar Milošević, pinaagi sa Wikimedia Commons
.jpg){kind=link}