Usa ka Tibuok Kadagatan sa mga Grasya

Abril 16, 2023

Domingo sa Diosnong Kalooy (Tuig A)
Ang Ikawalong Adlaw sa Oktaba sa Pasko sa Pagkabanhaw

Giasoy ni Santa Faustina sa iyang Talaarawan ang gisulti ni Jesus kaniya mahitungod sa Dominggo sa Balaang Kalooy:

“Anak Ko, isulti sa tibuok kalibotan ang Akong dili matugkad nga kalooy. Buot Ko nga ang Kapistahan sa Kalooy mahimong dalangpanan ug kapasilongan sa tanang kalag, ilabina sa makaluluoy nga mga makasasala. Nianang adlawa, bukas ang kinahiladman sa Akong malumong kalooy. Akong ibubo ang usa ka tibuok kadagatan sa mga grasya sa mga kalag nga moduol sa tuboran sa Akong kalooy. Ang kalag nga mokumpisal ug modawat sa Balaang Komunyon makabaton sa hingpit nga kapasayloan sa mga sala ug sa silot niini. Nianang adlawa, bukas ang tanang balaang ganghaan nga giagian sa nagaagay nga mga grasya” (Talaarawan #699).

Karon na kana nga adlaw! Kapistahan kini sa Balaang Kalooy! Ang kapistahan karong adlawa usa sa mas bag-ong mga kapistahan sa atong Simbahan. Bisan tuod gisulti na ni Jesus kang Sister Maria Faustina Kowolska niadtong 1931 ang Iyang tinguha nga saulogon kini nga kapistahan sa ikawalong adlaw sa Pasko sa Pagkabanhaw, sa tuig 2000 pa kini pormal ug solemne nga gitukod. Niadtong Abril 30 sa maong tuig, gideklarar ni Santo Papa Juan Pablo II nga santa si Santa Faustina ug iyang gitukod ang Kapistahan sa Balaang Kalooy isip kapistahan alang sa tibuok Simbahan. Tungod kay bag-o pa kaayo kini nga Kapistahan sa Simbahan, makaseguro kita nga daghan pa kitag angay makat-onan mahitungod sa mensahe niining Solemnidad, ingon man sa daghang mensahe mahitungod sa kalooy sa Diyos nga gipadayag sa Talaarawan ni Santa Faustina.

Lakip sa daghang mensahe nga anaa sa iyang Talaarawan, gipadayag ni Jesus kanato nga kining Dominggo, ang ikawalo ug kataposang adlaw sa Oktaba sa Pasko sa Pagkabanhaw, usa ka adlaw nga walay sama. Bisan tuod ang grasya ug kalooy padayong gibubo gikan sa Langit ngari kanato, tin-aw kaayo ang giingon ni Jesus nga talagsaon kining adlawa. Karong adlawa, “usa ka tibuok kadagatan sa mga grasya” ang gibubo sa mga kalag nga moduol sa tuboran sa Iyang kalooy. Pamalandongi kadiyot kana nga hulagway. “Usa ka tibuok kadagatan sa mga grasya.” Unsay kahulogan niini?

Sa simbolikong pagkasulti, ang usa ka tibuok kadagatan naghulagway sa walay kinutoban. Sulayi paghanduraw kon unsa kaha kon ibubo kanimo ang tibuok kadagatan—dili gayod kini matugkad sa hunahuna! Busa, ang giingon sa Diyos mao nga ang walay kinutobang grasya gihatag karong adlawa. Ang pangutana nga angay natong tanan pamalandongan mao kini: Unsa ako kaandam sa pagdawat niadtong walay kinutobang mga grasya?

Isip pagtandi, handurawa nga ang imong kinabuhi sama sa usa ka didal, ug gibubo kanimo ang usa ka kadagatan sa tubig. Isip didal, dili nimo masulod ang tanan nga gihatag. Busa, angay natong sabton nga buot sa Diyos nga palapdan ang atong katakos sa pagdawat sa Iyang kalooy aron mas madagayaon nato kining madawat. Unsa kaha kon ang imong kalag sama sa usa ka dakong lim-aw? Bisan pa niana, dili gihapon masulod sa maong lim-aw ang tubig sa kadagatan. Unsa man ang makahimo sa pagdawat sa usa ka tibuok kadagatan sa kalooy? Kadagatan lamang ang makasulod sa usa ka kadagatan. Tungod niana, buot sa Diyos nga andamon una ang atong mga kalag sa pagdawat sa walay kinutobang kalooy pinaagi sa pag-usab kanato ngadto sa mga sudlanan nga walay kinutoban ang kapasidad.

Si Santa Teresa sa Ávila, sa iyang bantog nga sinulat sa espirituhanong kinabuhi, “Mga Kastilyo sa Sulod,” nagtudlo kanato nga ang kalag, sa pagkatinuod, adunay walay kinutobang kapasidad tungod lamang kay ang Diyos nagpuyo sa sulod niini. Ang kalag sama sa usa ka kastilyo sa sulod nga adunay daghang nagkadugtong nga mga puloy-anan nga kinahanglan natong agian aron makaabot sa lawak nga anaa sa taliwala. Nagtudlo siya nga ang tumong sa espirituhanong kinabuhi mao ang pagpanaw niining nagkalainlaing mga puloy-anan padulong sa kinataliwad-an sa atong mga kalag diin nagpuyo ang walay kinutobang Diyos, aron kita makauban Niya didto. Busa, kinahanglan natong sabton nga ang atong mga kalag makahimo gayod sa pagdawat sa walay kinutobang katubigan sa kalooy, kay gilalang kita sa Diyos uban niining katakos sa dihang Iyang gipili nga mopuyo sa atong sulod. Ang yawe aron hingpit nga madawat kining kahingpitan sa kalooy mao ang pagpangita sa walay kinutobang Diyos nga nagpuyo sa atong sulod. Unsaon man kini pagbuhat?

Ang kinauyokan sa dalan nga gilatid sa Talaarawan ni Santa Faustina mao kini: Mangumpisal ug modawat sa Balaang Komunyon aron makabaton sa hingpit nga kapasayloan sa mga sala ug sa silot. Apan, sumala sa gipasabot sa daghang bantog nga magsusulat sa espirituhanong kinabuhi, sama ni Santa Teresa sa Ávila, adunay daghang ang-ang nga kinahanglan natong agian sa atong espirituhanong panaw aron makahibalag sa Diyos sa Iyang kahingpitan. Siyempre, naglakip kini sa pagsinati sa kalooy sa Diyos nga gihatag kanato diha sa Balaang Komunyon ug Kumpisal. Pananglitan, kadtong modawat niining mga Sakramento samtang nagpuyo pa lamang sa unang mga puluy-anan dili gayod makapahimulos niini sa samang sukod niadtong nagpuyo sa ikapito ug sentrong mansyon diin nagpuyo ang Hari sa Iyang kahingpitan. Busa, ang kalooy gihatag sa tibuok nga kahingpitan niini, apan kon dili kita mosubay sa makapausab nga panaw ngadto sa Diyos pinaagi sa pagkakabig ug pagputli sa atong mga kalag, dili gayod nato madawat ang kadagatan sa mga grasya nga gihatag sa Diyos.

Pamalandongi karon kining kadagatan nga gibubo diha kanimo. Unsa kadaghan niining kalooy ang imong madawat karon sa imong kinabuhi? Samtang mapaubsanon mong giangkon nga limitado pa ang imong pagkabukas sa grasya sa Diyos, hibaloi nga ang Diyos mapailobong naghulat kanimo, nagpuyo sa Iyang kahingpitan sa kinahiladman sa imong pagkatawo, naghulat nga mosubay ka sa panaw padulong Kaniya. Itugyan ang imong kaugalingon niining panaw pinaagi sa pag-ampo, pagpuasa, penitensiya, pagbasa sa Balaang Kasulatan, pagsaulog sa mga Sakramento ug espirituhanong pagbasa. Adunay usa ka kadagatan sa kahingpitan sa kinabuhi nga naghulat kanimo. Salom ug tugoti ang Iyang kalooy sa pagpalawom sa imong katakos sa pagdawat Kaniya sa labing hingpit nga paagi.

Ginoo ko, Ikaw ang Balaang Kalooy, ang tinubdan sa tanang grasya ug ang Maghahatag niining grasya sa hilabihang kadagaya. Nagpasalamat ako Kanimo tungod sa walay kinutoban Mong pagkamanggihatagon ug nag-ampo nga ang akong kalag mahimong mas hingpit nga andam sa pagdawat Kanimo. Palihog palapda ang katakos sa akong kalag pinaagi sa akong padayon nga panaw sa pagputli ug pagkakabig aron madawat ko ang tanan nga buot Mong ihatag. Hesus, misalig ako Kanimo.

+++

Pag-ampo alang sa Pagsalig sa Diosnong Kalooy sa Dios

Labing maloloy-ong Jesus,

Modangop ako Kanimo sa akong panginahanglan.

Takos Ka sa akong bug-os nga pagsalig.

Matinumanon Ka sa tanang butang.

Kon mapuno sa kalibog ang akong kinabuhi, hatagi ako og katin-aw ug pagtuo.

Kon matintal ako sa pagkawalay paglaom, pun-a ang akong kalag sa paglaom.

Labing maloloy-ong Jesus,

Nagsalig ako Kanimo sa tanang butang.

Nagsalig ako sa Imong hingpit nga laraw alang sa akong kinabuhi.

Nagsalig ako Kanimo kon dili ko masabtan ang Imong diosnong kabubut-on.