அருள்கொடைகளின் முழுப் பெருங்கடல்

ஏப்ரல் 16, 2023

இறை இரக்க ஞாயிறு (ஆண்டு A)
பாஸ்கா எண்கிழமையின் எட்டாம் நாள்

இறை இரக்க ஞாயிறைப் பற்றி இயேசு தம்மிடம் கூறியதைப் புனித ஃபவுஸ்தினா தமது நாள்குறிப்பில் பதிவு செய்கிறார்:

“என் மகளே, மனித அறிவுக்கு எட்டாத என் இரக்கத்தைப் பற்றி உலகம் முழுவதற்கும் சொல். இரக்கத்தின் திருவிழா எல்லா ஆன்மாக்களுக்கும், குறிப்பாகப் பரிதாபத்துக்குரிய பாவிகளுக்கும், புகலிடமாகவும் அடைக்கலமாகவும் இருக்க வேண்டுமென நான் விரும்புகிறேன். அந்நாளில் என் கனிவான இரக்கத்தின் ஆழங்கள் முழுவதும் திறந்திருக்கின்றன. என் இரக்கத்தின் ஊற்றை அணுகும் ஆன்மாக்கள்மீது அருள்கொடைகளின் முழுப் பெருங்கடலையே பொழிகிறேன். பாவசங்கீர்த்தனம் செய்து நற்கருணை உட்கொள்ளும் ஆன்மா, பாவங்களுக்கும் தண்டனைக்கும் முழுமையான மன்னிப்பைப் பெறும். அருள்கொடைகள் பாய்ந்தோடும் இறை மதகுகள் அனைத்தும் அந்நாளில் திறந்திருக்கின்றன” (நாள்குறிப்பு #699).

அந்த நாள் இன்றுதான்! இன்று இறை இரக்கத் திருவிழா! நம் திருஅவையில் அண்மைக் காலத்தில் ஏற்படுத்தப்பட்ட திருவிழாக்களில் இன்றைய திருவிழாவும் ஒன்று. பாஸ்காவின் எட்டாம் நாளில் இந்தத் திருவிழா கொண்டாடப்பட வேண்டும் என்ற இயேசுவின் விருப்பம், 1931-ஆம் ஆண்டிலேயே அருள்சகோதரி மரியா ஃபவுஸ்தினா கோவால்ஸ்காவுக்குத் தெரிவிக்கப்பட்டிருந்தாலும், 2000-ஆம் ஆண்டில்தான் இது முறைப்படி திருவிழாவாக நிறுவப்பட்டது. அந்த ஆண்டு ஏப்ரல் 30 அன்று, புனித திருத்தந்தை இரண்டாம் யோவான் பவுல், புனித ஃபவுஸ்தினாவைப் புனிதராக அறிவித்து, இறை இரக்கத் திருவிழாவை அனைத்துலகத் திருஅவையின் திருவிழாவாகத் தொடங்கி வைத்தார். திருஅவையில் இந்தத் திருவிழா மிக அண்மையில்தான் ஏற்படுத்தப்பட்டது என்பதால், இப்பெருவிழாவின் செய்தியைப் பற்றியும், இறைவனின் இரக்கத்தைக் குறித்து வெளிப்படுத்தப்பட்ட எண்ணற்ற செய்திகளைப் பற்றியும் நாம் இன்னும் கற்றுக்கொள்ள வேண்டியவை பல உள்ளன என்பது உறுதி. அந்தச் செய்திகள் இடம்பெற்றிருப்பது புனித ஃபவுஸ்தினாவின் நாள்குறிப்பில்.

அவரது நாள்குறிப்பில் இடம்பெற்றுள்ள பல செய்திகளுள், பாஸ்கா எண்கிழமையின் எட்டாவதும் இறுதியுமான நாளாகிய இந்த ஞாயிறு, வேறெந்த நாளையும் போன்றதல்ல என்பதை இயேசு நமக்கு வெளிப்படுத்தியுள்ளார். அருளும் இரக்கமும் விண்ணகத்திலிருந்து நம்மீது தொடர்ந்து பொழியப்பட்டாலும், இன்றைய நாள் தனித்துவமானது என்பதை இயேசு மிகத் தெளிவாகக் கூறுகிறார். இன்று, அவரது இரக்கத்தின் ஊற்றை அணுகும் ஆன்மாக்கள்மீது “அருள்கொடைகளின் முழுப் பெருங்கடல்” பொழியப்படுகிறது. இந்த உருவகத்தைச் சிறிது நேரம் அமைதியாகச் சிந்தித்துப் பாருங்கள். “அருள்கொடைகளின் முழுப் பெருங்கடல்.” இதன் பொருள் என்ன?

உருவகமாகப் பார்க்கும்போது, ஒரு முழுப் பெருங்கடல் என்பது எல்லையற்றதைக் குறிக்கிறது. பெருங்கடல் முழுவதும் உங்கள்மீது பொழியப்பட்டால் எப்படி இருக்கும் என்று கற்பனை செய்து பாருங்கள்—அது நம் புரிதலுக்கு அப்பாற்பட்டது! இவ்வாறு, எல்லையற்ற அருள் இன்று வழங்கப்படுகிறது என்று இறைவன் கூறுகிறார். நாம் அனைவரும் சிந்திக்க வேண்டிய கேள்வி இதுதான்: எல்லையற்ற அந்த அருள்கொடைகளை ஏற்றுக்கொள்ள நான் எந்த அளவுக்கு மனம் திறந்திருக்கிறேன்?

ஓர் ஒப்புமையாக, உங்கள் வாழ்க்கை தைக்கும்போது விரலில் அணியும் ஒரு சிறு கவசத்தைப் போன்றது என்றும், ஒரு பெருங்கடலின் நீர் உங்கள்மீது பொழியப்படுகிறது என்றும் கற்பனை செய்து பாருங்கள். அந்தச் சிறு விரற்கவசத்தால், கொடுக்கப்பட்ட அனைத்தையும் கொள்ள முடியாது. ஆகவே, இரக்கத்திற்கான நமது உள்ளத்தின் கொள்ளளவை விரிவாக்குவதன் வழியாக, தமது இரக்கத்தை இன்னும் மிகுதியாகப் பெற்றுக்கொள்ளும் நம் திறனைப் பெருக்க இறைவன் விரும்புகிறார் என்பதை நாம் உணர வேண்டும். உங்கள் ஆன்மா ஒரு பெரிய குளத்தைப் போல இருந்தால்? அப்போதும் பெருங்கடலின் நீரை அந்தக் குளத்திற்குள் அடக்க முடியாது. இரக்கத்தின் முழுப் பெருங்கடலையும் பெற்றுக்கொள்ளக்கூடியது எது? ஒரு பெருங்கடலை மற்றொரு பெருங்கடலால் மட்டுமே கொள்ள முடியும். அதனால்தான், நம்மை எல்லையற்ற கொள்ளளவுள்ள பாத்திரங்களாக மாற்றுவதன் வழியாக, எல்லையற்ற இரக்கத்தைப் பெற்றுக்கொள்ள முதலில் நம் ஆன்மாக்களைத் தயாரிக்க இறைவன் விரும்புகிறார்.

புனித அவிலா தெரேசா, ஆன்மிகச் செவ்விலக்கியமான தமது “அகக் கோட்டைகள்” என்னும் நூலில், இறைவன் ஆன்மாவிற்குள் குடியிருக்கிறார் என்ற எளிய உண்மையால், ஆன்மா உண்மையிலேயே எல்லையற்ற கொள்ளளவைக் கொண்டிருக்க முடியும் என்று நமக்குக் கற்பிக்கிறார். ஆன்மா என்பது ஒன்றோடொன்று இணைந்த பல உறைவிடங்களைக் கொண்ட ஓர் அகக் கோட்டையைப் போன்றது; அதன் மைய அறையை அடைய நாம் இந்த உறைவிடங்களைக் கடந்து செல்ல வேண்டும். எல்லையற்ற இறைவன் குடியிருக்கும் நம் ஆன்மாவின் மையத்தை நோக்கி இந்தப் பல்வேறு உறைவிடங்களின் வழியாகப் பயணித்து, அங்கே அவரது திருமுன் இருப்பதே ஆன்மிக வாழ்வின் இலக்கு என்று அவர் கற்பிக்கிறார். ஆகவே, இரக்கத்தின் எல்லையற்ற நீரைப் பெற்றுக்கொள்ளும் திறன் நம் ஆன்மாக்களுக்கு உண்மையிலேயே உண்டு என்பதை நாம் புரிந்துகொள்ள வேண்டும்; ஏனெனில், நமக்குள் வாழ இறைவன் தேர்ந்துகொண்டபோது, இந்தத் திறனுடனேயே நம்மைப் படைத்தார். இரக்கத்தின் இந்த நிறைவை முழுமையாகப் பெற்றுக்கொள்வதற்கான திறவுகோல், நமக்குள் குடியிருக்கும் எல்லையற்ற இறைவனைத் தேடுவதே. இதை எப்படிச் செய்வது?

புனித ஃபவுஸ்தினாவின் நாள்குறிப்பில் காட்டப்பட்டுள்ள பாதையின் மையம் இதுவே: பாவங்களுக்கும் தண்டனைக்கும் முழுமையான மன்னிப்பைப் பெறும்படி பாவசங்கீர்த்தனம் செய்து நற்கருணை உட்கொள்ளுங்கள். இருப்பினும், புனித அவிலா தெரேசா போன்ற மாபெரும் ஆன்மிக எழுத்தாளர்கள் பலரும் விளக்குவதுபோல், இறைவனை அவரது நிறைவில் சந்திக்க இயலுமாறு நம் ஆன்மிகப் பயணத்தில் நாம் கடந்து செல்ல வேண்டிய நிலைகள் பல உள்ளன. நற்கருணையிலும் பாவசங்கீர்த்தனத்திலும் நமக்கு வழங்கப்படும் இறைவனின் இரக்கத்தைச் சந்திப்பதும் இதில் அடங்கும் என்பது தெளிவு. எடுத்துக்காட்டாக, தொடக்க உறைவிடங்களில் மட்டுமே தங்கியிருந்து இந்த அருளடையாளங்களைப் பெறுவோர், அரசர் தமது நிறைவில் குடியிருக்கும் ஏழாவதும் மையமானதுமான மாளிகையில் வாழ்பவர்கள் பெறும் அளவுக்கு இவற்றின் பயனை ஒருபோதும் பெற மாட்டார்கள். இவ்வாறு, இரக்கம் அதன் நிறைவில் வழங்கப்படுகிறது. ஆனால், மனமாற்றத்தின் வழியாகவும் நம் ஆன்மாக்களின் தூய்மைப்படுத்துதலின் வழியாகவும் இறைவனை நோக்கி நம்மை உருமாற்றும் பயணத்தை நாம் மேற்கொள்ளாவிட்டால், இறைவன் வழங்கும் அருள்கொடைகளின் பெருங்கடலை நாம் ஒருபோதும் பெற்றுக்கொள்ள இயலாது.

உங்கள்மீது பொழியப்படும் இந்தப் பெருங்கடலைப் பற்றி இன்று சிந்தியுங்கள். இந்த இரக்கத்தில் எவ்வளவை இப்போது உங்கள் வாழ்வில் உங்களால் பெற்றுக்கொள்ள முடிகிறது? கடவுளின் அருளை ஏற்கும் உங்கள் மனத்திறப்பு குறைவாக இருப்பதைத் தாழ்மையுடன் ஒப்புக்கொள்ளும்போது, கடவுள் தமது முழுமையில் உங்கள் உள்ளத்தின் ஆழத்தில் குடிகொண்டு, நீங்கள் அவரை நோக்கிப் பயணம் செய்யப் பொறுமையுடன் காத்திருக்கிறார் என்பதை அறிந்துகொள்ளுங்கள். இறைவேண்டல், நோன்பு, தவம், திருவிவிலிய வாசிப்பு, அருளடையாளக் கொண்டாட்டம், ஆன்மிக வாசிப்பு ஆகியவற்றின் வழியாக இந்தப் பயணத்தில் உங்களை அர்ப்பணித்துக்கொள்ளுங்கள். வாழ்வின் நிறைவு என்னும் பெருங்கடல் உங்களுக்காகக் காத்திருக்கிறது. அதில் மூழ்குங்கள்; அவரை மிக முழுமையாகப் பெற்றுக்கொள்ளும் உங்கள் திறனை அவரது இரக்கம் ஆழப்படுத்த அனுமதியுங்கள்.

என் ஆண்டவரே, நீரே இறை இரக்கம்; எல்லா அருளுக்கும் ஊற்றும், இந்த அருளை அளவுக்கு மிகுதியாக வழங்குபவரும் நீரே. உமது எல்லையற்ற தாராளத்திற்காக உமக்கு நன்றி கூறுகிறேன்; உம்மைப் பெற்றுக்கொள்ள என் ஆன்மா இன்னும் முழுமையாக ஆயத்தமாக வேண்டுமென்று மன்றாடுகிறேன். தூய்மையடைதலும் மனமாற்றமும் கொண்ட எனது தொடர்ச்சியான பயணத்தின் வழியாக என் ஆன்மாவின் கொள்ளளவை விரிவுபடுத்தியருளும்; அப்போது நீர் வழங்க விரும்பும் அனைத்தையும் நான் பெற்றுக்கொள்வேன். இயேசுவே, உம்மீது நம்பிக்கை வைக்கிறேன்.

+++

கடவுளின் இறை இரக்கத்தில் நம்பிக்கை வைப்பதற்கான செபம்

மிகுந்த இரக்கமுள்ள இயேசுவே,

என் தேவையில் உம்மை நாடி வருகிறேன்.

என் முழு நம்பிக்கைக்கும் தகுதியானவர் நீரே.

எல்லாவற்றிலும் நீர் உண்மையுள்ளவராக இருக்கிறீர்.

என் வாழ்வு குழப்பத்தால் நிறைந்திருக்கும்போது, எனக்குத் தெளிவையும் விசுவாசத்தையும் தந்தருளும்.

நம்பிக்கையிழக்க நான் சோதிக்கப்படும்போது, என் ஆன்மாவை நம்பிக்கையால் நிரப்பியருளும்.

மிகுந்த இரக்கமுள்ள இயேசுவே,

எல்லாவற்றிலும் உம்மீது நம்பிக்கை வைக்கிறேன்.

என் வாழ்வுக்கான உமது நிறைவான திட்டத்தின்மீது நம்பிக்கை வைக்கிறேன்.

உமது தெய்வீகத் திருவுளத்தை என்னால் புரிந்துகொள்ள இயலாதபோதும் உம்மீது நம்பிக்கை வைக்கிறேன்.