Oktubre 30, 2023
Lunes sa Ikakatloan nga Semana sa Ordinaryong Panahon
Mga Pagbasa alang Karong Adlawa
Paminaw sa Iningles
Apan ang pangulo sa sinagoga, nga nasuko tungod kay nang-ayo si Jesus sa adlaw nga Igpapahulay, miingon sa panon sa katawhan, “Adunay unom ka adlaw nga angay trabahuan. Nianang mga adlawa kamo anhi aron magpaayo, dili sa adlaw nga Igpapahulay.” Mitubag kaniya ang Ginoo, “Mga tigpakaaron-ingnon! Dili ba ang matag usa kaninyo maghubad sa higot sa iyang baka o asno gikan sa pasungan sa adlaw nga Igpapahulay ug motultol niini aron paimnon?” Lucas 13:14–15
Nganong “nasuko” man ang pangulo sa sinagoga tungod kay giayo ni Jesus ang usa ka babaye sa adlaw nga Igpapahulay? Napulo ug walo ka tuig na siyang bakol! Hunahunaa ilabina ang iyang pamilya. Nasaksihan nila ang iyang pag-antos sulod sa daghang katuigan ug nakig-ambit niini uban kaniya pinaagi sa ilang dugayng pagmaluluy-on. Kon didto sila sa dihang giayo siya ni Jesus sa adlaw nga Igpapahulay, mosantop ba dayon sa ilang hunahuna, “Nganong nangahas man si Jesus sa pag-ayo sa among inahan, asawa o igsoong babaye sa adlaw nga Igpapahulay?” Siyempre dili! Magmaya unta sila ug mapuno sa kahingangha, pagpasalamat, ug bisan sa mga luha. Kining natural nga reaksiyon nga mabati unta sa iyang pamilya sa pagsaksi niining milagro mao ang hustong tubag. Ug siyempre, ang reaksiyon sa pangulo sa sinagoga layo kaayo sa hustong panghunahuna.
Nganong nagbuhat man niini ang pangulo sa sinagoga? Bisan tuod siya ug ang daghang ubang mga eskriba, Saduseo, Pariseo ug mga batid sa balaod nakigbisog sa kasina ug pagpakaaron-ingnon, ang ubang tawo usahay mahimong mosanong sama niining pangulo sa sinagoga tungod sa laing mga hinungdan. Usa niini mao ang iskrupulosidad.
Ang iskrupulosidad mao ang kalagmitan sa pagtan-aw sa Diyos ug sa Iyang balaang kabubut-on pinaagi sa legalismo. Ang “legalismo” dili lamang ang pagkamatinud-anon sa Balaod sa Diyos, kay maayo man kana. Ang legalismo usa ka sayop nga pagsabot sa Balaod sa Diyos diin mas gitutokan sa tawo ang iyang kaugalingon kay sa Diyos. Ang tawo nga adunay iskrupulosidad hilabihan nga nagpunting sa iyang kaugalingon. Mas nabalaka siya bahin sa sala kay sa Diyos mismo. Ug bisan tuod importante kaayo ang pagtagad sa sala, kon ang kahadlok sa pagpakasala mahimong usa ka obsesyon, kining obsesyona makapalubog sa tin-aw nga pagsabot sa putli nga kabubut-on sa Diyos ug magbilin sa tawo nga nabug-atan pag-ayo ug dili na malipayong makakinabuhi sumala sa tinuod nga kabubut-on sa Diyos.
Si Santa Thérèse sa Lisieux usa sa mga santos nga dayag nga mipaambit sa iyang mga pakigbisog sa iskrupulosidad diha sa iyang sinulat bahin sa kaugalingong kinabuhi. Bahin niining pakigbisog, nga iyang gitawag og “sobrang pagkasensitibo,” miingon siya, “Kinahanglang maagian mismo sa usa ka tawo kining pagkamartir aron masabtan kini pag-ayo, ug alang kanako imposible nga mapahayag ang akong nasinati sulod sa usa ka tuig ug tunga.” Apan sa ulahi nasinati niya ang iyang gitawag og “hingpit nga pagkakabig,” diin natangtang ang bug-at nga palas-anon sa sobrang pagkasensitibo. Bisan tuod kining sobrang pagkasensitibo nagpaguol kaniya sa nagkalainlaing paagi, usa sa mga epekto niini mao ang iyang kahadlok nga bisan ang pipila sa mga hunahuna nga kalit lang mosantop sa iyang hunahuna mga salang mortal, ug nga mahukman siya sa silot tungod niini.
Bisan tuod lagmit nga ang pangulo sa sinagoga wala makigbisog sa “sobrang pagkasensitibo” sa samang paagi ni Santa Thérèse, naglihok siya uban sa hilabihang iskrupulosidad nga mitultol kaniya sa mapintas nga paghukom ug pagkondenar sa atong Ginoo tungod sa Iyang maayong buhat alang niining bakol nga babaye.
Pamalandongi karon ang bisan unsang hilig nimo nga mahimong hinungdan sa ingon niining bug-at nga mga palas-anon. Mabalaka ka ba bahin sa sala nga walay igong katarongan? Usahay ba dili ka makahunong sa paghunahuna bahin sa mga desisyon, kay nabalaka ka nga basin masayop ka sa imong pagpili? Mas labaw ba nimo nga gihunahuna ang imong kaugalingon kay sa Diyos ug sa uban? Kon mao, basin nagdala ka usab og susamang bug-at nga palas-anon nga buot tangtangon sa atong Ginoo. Ang pag-alagad sa Diyos ug ang pagtuman sa Iyang balaang kabubut-on kinahanglan mahimong kinahiladman nga kalipay sa atong kinabuhi, dili usa ka bug-at nga palas-anon. Kon alang kanimo ang imong Kristohanong pagkinabuhi mas usa ka palas-anon, ibalhin ang imong panan-aw gikan sa imong kaugalingon ngadto sa maluluy-ong Diyos. Dagan ngadto Kaniya uban sa hingpit nga pagsalig sa usa ka bata, sama sa gibuhat ni Santa Thérèse sa ulahi, ug tugoti ang imong kaugalingon nga mahigugma Kaniya sa mas tinuod nga paagi, nga gawasnon na sa mga palas-anong naggikan sa sobrang pagkakonsensiyoso ug sa imong kaugalingong pagpahamtang.
Akong maluluy-ong Ginoo, buot Mo akong gawason gikan sa tanan nga nagpabug-at kanako. Buot Mo nga modangop ako Kanimo uban sa pagsalig sa usa ka bata. Palihog, hinigugmang Ginoo, gawasa ako gikan sa bisan unsang paagi nga gipabug-atan ko ang akong kaugalingon pinaagi sa akong dili mapugngang paghunahuna ug mga kabalakang walay igong katarongan. Hinaot kanunay kong masabtan ang Imong walay kinutobang gugma alang kanako ug kanunay kong subayon ang Imong mga dalan nga gawasnon ug malipayon. Hesus, misalig ako Kanimo.
Dugang nga mga Pamalandong sa Ebanghelyo
Mga Pamalandong sa Diosnong Kalooy
Mga Pamalandong sa Balaang Kasulatan alang sa Panahon sulod sa Tuig
Mga Santos/Kasaulogan Karong Adlawa
Mga Kapilian sa mga Basahon sa Misa
