Pagsulong Batok sa mga Kaaway sa Kalag

Disyembre 14, 2023

Handumanan ni San Juan de la Cruz, Pari ug Doktor sa Simbahan

Mga Pagbasa Karong Adlawa
Mga Pagbasa alang sa Huwebes sa Ikaduhang Semana sa Adbiyento

Paminaw sa Iningles

“Sukad sa mga adlaw ni Juan Bautista hangtod karon, ang Gingharian sa langit nag-antos sa kapintas, ug ang mga mapintas nag-ilog niini pinaagi sa kusog.” Mateo 11:12

Usa ka ba niadtong mga “mapintas” nga nag-ilog sa Gingharian sa Langit “pinaagi sa kusog?” Hinaot nga mao ka!

Usahay, lisod sabton ang mga pulong ni Jesus. Ang tudling sa ibabaw maoy usa ka pananglitan niini. Mahitungod niini nga tudling, si San Josemaría Escrivá nag-ingon nga ang mga “mapintas” mao ang mga Kristohanon nga adunay “kalig-on” ug “kaisog” kon ang ilang palibot masukihon sa pagtuo (Tan-awa ang Christ is Passing By, 82). Si San Clemente sa Alejandria nag-ingon nga ang Gingharian sa Langit iya “niadtong nakigbisog batok sa ilang kaugalingon” (Quis dives salvetur, 21). Sa laing pagkasulti, ang mga “mapintas” nga nag-ilog sa Gingharian sa Langit mao kadtong kusganong nakigbisog batok sa mga kaaway sa ilang kalag aron makab-ot ang Gingharian sa Langit.

Unsa man ang mga kaaway sa kalag? Sumala sa tradisyon, kini mao ang kalibotan, ang unod ug ang yawa. Kining tulo ka kaaway nakapahinabo og dakong kapintas sulod sa mga kalag sa mga Kristohanon nga naningkamot sa pagpuyo sulod sa Gingharian sa Dios. Busa unsaon man nato pagpakigbisog alang sa Gingharian? Pinaagi sa kusog! Ang ubang mga hubad nag-ingon nga ang mga “tig-atake” nag-ilog sa Gingharian pinaagi sa kusog. Kini nagpasabot nga ang Kristohanong kinabuhi dili mahimong puro lang pagpasagad ug walay paglihok. Dili kita makaabot sa Langit pinaagi lamang sa pagpahiyom. Tinuod ang mga kaaway sa atong kalag, ug mapugsanon sila sa pagsulong. Busa, kinahanglan usab kitang mahimong mapugsanon sa diwa nga kinahanglan natong direktang atubangon kining mga kaaway uban sa kalig-on ug kaisog ni Cristo.

Unsaon nato kini pagbuhat? Atong atubangon ang kaaway nga mao ang unod pinaagi sa pagpuasa ug pagdumili sa kaugalingon. Atong atubangon ang kalibotan pinaagi sa pagpabiling nakagamot sa Kamatuoran ni Cristo, sa Kamatuoran sa Ebanghelyo, nga nagdumili sa pagpahiuyon sa “kaalam” niining panahona. Ug atong atubangon ang yawa pinaagi sa pag-ila sa iyang daotang mga laraw sa paglimbong kanato, paglibog kanato ug pagpahisalaag kanato sa tanang butang, aron atong mabuyag siya ug masalikway ang iyang mga buhat sa atong kinabuhi.

Pamalandongi karong adlawa ang imong tawag sa pagtubo sa kalig-on ug kaisog aron mabuntog ang mga kaaway nga nag-atake sa imong sulod. Walay kapuslanan ang kahadlok niining gubata. Ang pagsalig sa gahom ug kalooy sa atong Ginoong Jesu-Cristo mao lamang ang hinagiban nga atong gikinahanglan. Salig Kaniya ug ayaw pagpadaog sa daghang paagi nga gigamit niining mga kaaway aron kawaton gikan kanimo ang kalinaw ni Cristo.

Akong mahimayaon ug madaogong Ginoo, nagsalig ako Kanimo nga ibubo Mo ang Imong grasya aron makabarog ako nga lig-on batok sa kalibotan, sa mga tintasyon sa akong unod ug sa yawa mismo. Hatagi ako og kadasig, kaisog ug kalig-on aron makigbisog ako sa maayong pakigbisog sa pagtuo ug dili gayod magduhaduha sa pagpangita Kanimo ug sa Imong labing balaan nga kabubut-on alang sa akong kinabuhi. Jesus, nagsalig ako Kanimo.