Kuwashambulia Maadui wa Roho

14 Desemba 2023

Kumbukumbu ya Mtakatifu Yohane wa Msalaba, Padri na Mwalimu wa Kanisa

Masomo ya Leo
Masomo ya Alhamisi ya Juma la Pili la Majilio

Sikiliza kwa Kiingereza

“Tangu siku za Yohane Mbatizaji mpaka sasa, Ufalme wa mbinguni unafanyiwa nguvu, na wenye kutumia nguvu wanautwaa kwa nguvu.” Mathayo 11:12

Je, wewe ni miongoni mwa wale “wenye kutumia nguvu” wanaoutwaa Ufalme wa Mbinguni “kwa nguvu?” Tunatumaini kwamba ndivyo ulivyo!

Mara kwa mara, maneno ya Yesu huwa magumu kueleweka. Kifungu kilicho hapo juu ni mojawapo ya mifano hiyo. Kuhusu kifungu hiki, Mtakatifu Josemaría Escrivá anaeleza kwamba “wenye kutumia nguvu” ni Wakristo wenye “uthabiti” na “ujasiri” wanapokuwa katika mazingira yenye uadui dhidi ya imani (Tazama Kristo Anapita, 82). Mtakatifu Klementi wa Aleksandria anasema kwamba Ufalme wa Mbinguni ni “wa wale wanaopigana dhidi yao wenyewe” (Quis dives salvetur, 21). Kwa maneno mengine, “wenye kutumia nguvu” wanaoutwaa Ufalme wa Mbinguni ni wale wanaopigana kwa nguvu dhidi ya maadui wa roho zao ili kuupata Ufalme wa Mbinguni.

Maadui wa roho ni akina nani? Kwa mapokeo, tunazungumza juu ya ulimwengu, mwili na shetani. Maadui hawa watatu wamesababisha vurugu nyingi ndani ya roho za Wakristo wanaojitahidi kuishi katika Ufalme wa Mungu. Basi, tunapiganiaje Ufalme huo? Kwa nguvu! Tafsiri fulani zinasema kwamba “washambuliaji” wanautwaa Ufalme kwa nguvu. Hii ina maana kwamba maisha ya Kikristo hayawezi kuwa maisha ya kukaa tu bila kuchukua hatua yoyote. Hatuwezi kuingia Mbinguni kwa kutabasamu tu. Maadui wa roho zetu ni halisi, nao hushambulia kwa nguvu. Kwa hiyo, sisi pia tunapaswa kuwashambulia kwa nguvu, kwa maana ya kukabiliana nao moja kwa moja kwa uthabiti na ujasiri wa Kristo.

Tunafanyaje hivyo? Tunakabiliana na adui ambaye ni mwili kwa kufunga na kujinyima. Tunakabiliana na ulimwengu kwa kubaki imara katika Ukweli wa Kristo, Ukweli wa Injili, tukikataa kufuata “hekima” ya zama hizi. Nasi tunakabiliana na shetani kwa kutambua mipango yake miovu ya kutudanganya, kutuchanganya na kutupotosha katika mambo yote, ili tumkemee na kuzikataa kazi zake katika maisha yetu.

Tafakari leo juu ya wito wako wa kukua katika uthabiti na ujasiri ili kupambana na maadui hao wanaokushambulia ndani ya nafsi yako. Hofu haina faida katika vita hivi. Kutumainia nguvu na huruma ya Bwana wetu Yesu Kristo ndiyo silaha pekee tunayohitaji. Umtegemee Yeye, wala usikubali kushindwa na njia nyingi ambazo maadui hawa wanatumia kujaribu kukunyang’anya amani ya Kristo.

Bwana wangu mwenye utukufu na ushindi, nakutumainia unimiminie neema Yako ili niweze kusimama imara dhidi ya ulimwengu, vishawishi vya mwili wangu na shetani mwenyewe. Nipe ujasiri, uthubutu na ustahimilivu ili niweze kupiga vita vizuri vya imani na kamwe nisiyumbe katika kukutafuta Wewe na mapenzi Yako matakatifu kabisa kwa maisha yangu. Yesu, nakutumainia.