Pagsalakay sa mga Kaaway ng Kaluluwa

Disyembre 14, 2023

Paggunita kay San Juan de la Cruz, Pari at Pantas ng Simbahan

Mga Pagbasa Ngayon
Mga Pagbasa para sa Huwebes ng Ikalawang Linggo ng Adbiyento

“Mula noong mga araw ni Juan Bautista hanggang ngayon, ang Kaharian ng Langit ay dumaranas ng karahasan, at inaagaw ito ng mga mararahas.” Matthew 11:12

Kabilang ka ba sa mga “mararahas” na kumukuha sa Kaharian ng Langit “sa pamamagitan ng dahas?” Sana nga!

Paminsan-minsan, mahirap unawain ang mga salita ni Hesus. Isa sa mga ganitong pagkakataon ang sipi sa itaas. Tungkol sa siping ito, sinabi ni San Josemaría Escrivá na ang mga “mararahas” ay mga Kristiyanong may “katatagan” at “lakas ng loob” kapag ang kapaligirang kanilang kinaroroonan ay salungat sa pananampalataya (Tingnan ang Christ is Passing By, 82). Sinabi ni San Clemente ng Alejandria na ang Kaharian ng Langit ay para “sa mga nakikipaglaban sa kanilang sarili” (Quis dives salvetur, 21). Sa madaling salita, ang mga “mararahas” na kumukuha sa Kaharian ng Langit ay yaong buong-sigasig na nakikipaglaban sa mga kaaway ng kanilang kaluluwa upang makamit ang Kaharian ng Langit.

Ano ang mga kaaway ng kaluluwa? Ayon sa tradisyon, tinutukoy natin ang mundo, ang laman, at ang diyablo. Ang tatlong kaaway na ito ay nagdulot ng matinding karahasan sa kalooban ng mga Kristiyanong nagsisikap mamuhay sa loob ng Kaharian ng Diyos. Kaya paano tayo nakikipaglaban para sa Kaharian? Sa pamamagitan ng dahas! Sinasabi ng ilang salin na kinukuha ng mga “sumasalakay” ang Kaharian sa pamamagitan ng dahas. Nangangahulugan ito na ang buhay-Kristiyano ay hindi maaaring maging puro pagsasawalang-kibo lamang. Hindi tayo makararating sa Langit sa pamamagitan lamang ng pagngiti. Totoo ang mga kaaway ng ating kaluluwa, at mabagsik ang kanilang pagsalakay. Kaya dapat din tayong maging masigasig sa pakikipaglaban, sa diwang dapat nating tuwirang harapin ang mga kaaway na ito taglay ang katatagan at lakas ng loob ni Kristo.

Paano natin ito gagawin? Hinaharap natin ang kaaway na laman sa pamamagitan ng pag-aayuno at pagtanggi sa sarili. Hinaharap natin ang mundo sa pamamagitan ng pananatiling nakaugat sa Katotohanan ni Kristo, sa Katotohanan ng Ebanghelyo, at pagtangging umayon sa “karunungan” ng kasalukuyang panahon. At hinaharap natin ang diyablo sa pamamagitan ng pagkilala sa kanyang masasamang balak na linlangin tayo, lituhin tayo, at iligaw tayo sa lahat ng bagay, upang masaway natin siya at matanggihan ang kanyang mga gawain sa ating buhay.

Pagnilayan mo ngayon ang panawagan sa iyo na lumago sa katatagan at lakas ng loob upang malabanan ang mga kaaway na sumasalakay sa iyong kalooban. Walang silbi ang takot sa labanang ito. Ang pagtitiwala sa kapangyarihan at awa ng ating Panginoong Hesukristo ang tanging sandatang kailangan natin. Umasa ka sa Kanya at huwag magpadaig sa maraming paraang ginagamit ng mga kaaway na ito upang agawin sa iyo ang kapayapaan ni Kristo.

Aking maluwalhati at matagumpay na Panginoon, nagtitiwala ako na ibubuhos Mo ang Iyong biyaya upang makatayo akong matatag laban sa mundo, sa mga tukso ng aking laman, at sa diyablo mismo. Pagkalooban Mo ako ng tapang, lakas ng loob, at katatagan upang maipaglaban ko ang mabuting laban ng pananampalataya at hindi kailanman matinag sa paghahanap sa Iyo at sa Iyong kabanal-banalang kalooban para sa aking buhay. Hesus, nagtitiwala ako sa Iyo.