ನಿಮ್ಮ ಕುಟುಂಬಕ್ಕೆ ಬೋಧಿಸುವುದು

ಭಾನುವಾರ, ಫೆಬ್ರವರಿ 3, 2019

ಸಾಮಾನ್ಯ ಕಾಲದ ನಾಲ್ಕನೆಯ ಭಾನುವಾರ, ವರ್ಷ C

ಇಂದಿನ ವಾಚನಗಳು

ಸಂತ ಬ್ಲೇಸ್, ಧರ್ಮಾಧ್ಯಕ್ಷರು ಮತ್ತು ರಕ್ತಸಾಕ್ಷಿ, ಅಥವಾ ಸಂತ ಅನ್ಸ್‌ಗಾರ್, ಧರ್ಮಾಧ್ಯಕ್ಷರು – ಐಚ್ಛಿಕ ಸ್ಮರಣೆ

ಅವರು ಹೀಗೆಂದರು: “ಆಮೆನ್, ನಾನು ನಿಮಗೆ ಹೇಳುತ್ತೇನೆ, ಯಾವ ಪ್ರವಾದಿಗೂ ತನ್ನ ಸ್ವಂತ ಊರಿನಲ್ಲಿ ಸ್ವೀಕಾರ ದೊರೆಯುವುದಿಲ್ಲ.”  ಲೂಕ 4:24

ನಿಮ್ಮ ಕುಟುಂಬದವರೊಂದಿಗೆ ಸುವಾರ್ತೆಯನ್ನು ಹಂಚಿಕೊಳ್ಳುವುದು ಅಪರಿಚಿತರೊಂದಿಗೆ ಹಂಚಿಕೊಳ್ಳುವಷ್ಟು ಸುಲಭವಾಗಿರುವುದಿಲ್ಲ.  ಅದೇ ರೀತಿ, ಕುಟುಂಬದ ಸದಸ್ಯರೊಬ್ಬರಿಂದ ಸುವಾರ್ತೆಯ ಸಂದೇಶವನ್ನು ಆಲಿಸುವುದು ಬೇರೆಯವರಿಂದ ಕೇಳುವಷ್ಟು ಸುಲಭವಾಗಿರುವುದಿಲ್ಲ.  ಇದು ಏಕೆ ಹೀಗೆ? 

ಕುಟುಂಬದವರೊಂದಿಗೆ ನಮಗಿರುವ ಸಲಿಗೆಯಂಥ ಆಪ್ತತೆಯು, ಅವರ ದೃಢನಂಬಿಕೆಗಳಲ್ಲಿಯೂ ಕ್ರೈಸ್ತ ಸಾಕ್ಷ್ಯದಲ್ಲಿಯೂ ಸಾಕಷ್ಟು ಭರವಸೆ ಇಡದಿರುವಂತೆ ನಮ್ಮನ್ನು ಪ್ರೇರೇಪಿಸಬಹುದು.  ಇದು ಖಂಡಿತವಾಗಿಯೂ ನಮ್ಮ ಪ್ರತಿಯೊಂದು ಸಂಬಂಧಕ್ಕೂ ಅನ್ವಯಿಸದಿದ್ದರೂ, ಕೆಲವು ಸಂಬಂಧಗಳಲ್ಲಿ ಹೀಗಿರಬಹುದು.  ಮಕ್ಕಳು ಕೆಲವೊಮ್ಮೆ ಬೇರೆಯವರ ಮಾತುಗಳಲ್ಲಿ ಇಡುವಷ್ಟು ಭರವಸೆಯನ್ನು ತಂದೆ ಅಥವಾ ತಾಯಿಯ ಮಾತುಗಳಲ್ಲಿ ಇಡುವುದಿಲ್ಲ.  ಒಡಹುಟ್ಟಿದವರು ಬೇರೆಯವರ ಸಲಹೆಗಳಿಗೆ ತೆರೆದುಕೊಳ್ಳುವಷ್ಟು ಪರಸ್ಪರರ ಸಲಹೆಗಳಿಗೆ ತೆರೆದುಕೊಳ್ಳದಿರಬಹುದು. 

ಬಹುಶಃ ಈ ಅನುಭವಕ್ಕೆ ಒಂದು ಕಾರಣವೇನೆಂದರೆ, ನಮಗೆ ಅಷ್ಟಾಗಿ ಪರಿಚಯವಿಲ್ಲದವರಿಗಿಂತ ಚೆನ್ನಾಗಿ ಪರಿಚಯವಿರುವವರನ್ನು ನಾವು ಹೆಚ್ಚಾಗಿ ಟೀಕಿಸುತ್ತೇವೆ.  ನಮ್ಮ ವೈಯಕ್ತಿಕ ಅನುಭವಗಳ ದೀರ್ಘ ಇತಿಹಾಸವು ಕುಟುಂಬದ ಸದಸ್ಯರ ಮಾತುಗಳನ್ನು ಮುಕ್ತ ಮನಸ್ಸಿನಿಂದ ಸ್ವೀಕರಿಸಲು ಅಡ್ಡಿಯಾಗುವಂತೆ ಬಿಡುವುದು ಸುಲಭ.  ಹಲವು ವರ್ಷಗಳಲ್ಲಿ ನಮಗಾದ ಕಹಿ ಅನುಭವಗಳ ವಿಷಯದಲ್ಲಿ ಇದು ವಿಶೇಷವಾಗಿ ಸತ್ಯ.  ಅನೇಕ ಬಾರಿ ನಾವು ವರ್ಷದಿಂದ ವರ್ಷಕ್ಕೆ ಕಹಿ ಅನುಭವಗಳನ್ನೂ ಮನಸ್ಸಿನ ಗಾಯಗಳನ್ನೂ ಹಿಡಿದಿಟ್ಟುಕೊಳ್ಳುತ್ತೇವೆ; ಕುಟುಂಬದ ಸದಸ್ಯರು ಹೇಳುವ ಅಥವಾ ಮಾಡುವ ಪ್ರತಿಯೊಂದನ್ನೂ ಆ ಅನುಭವಗಳ ಮೂಲಕವೇ ಅಳೆಯಲು ಬಿಡುತ್ತೇವೆ.

“ಯಾವ ಪ್ರವಾದಿಯೂ ತನ್ನ ಸ್ವಂತ ಊರಿನಲ್ಲಿ ಸ್ವೀಕರಿಸಲ್ಪಡುವುದಿಲ್ಲ” ಎಂಬ ಯೇಸುವಿನ ಈ ಮಾತು, ನಾವು ಈ ಪ್ರವೃತ್ತಿಗೆ ಒಳಗಾಗದಂತೆ ಎಚ್ಚರ ವಹಿಸಲು ನಮಗೆ ಸವಾಲಾಗಬೇಕು.  ನಮ್ಮದೇ ಕುಟುಂಬದವರು ನಮ್ಮೊಂದಿಗೆ ಹಂಚಿಕೊಳ್ಳುವ ಪ್ರವಾದನಾತ್ಮಕ ಸಾಕ್ಷ್ಯವನ್ನು ನಾವು ಸ್ವೀಕರಿಸುವಂತೆ ನಮ್ಮಿಂದಾದುದನ್ನು ಮಾಡಬೇಕು. 

ಇದನ್ನು ಮಾಡಲು ಅತ್ಯುತ್ತಮ ಮಾರ್ಗವೆಂದರೆ, ಆ ಸಂಬಂಧಗಳಲ್ಲಿ ನಾವು ಹೊತ್ತುಕೊಂಡಿರುವ ಯಾವುದೇ “ಹೊರೆ”ಯನ್ನು ತೊಡೆದುಹಾಕಲು ನಿಯಮಿತವಾಗಿ ಪ್ರಯತ್ನಿಸುವುದು.  ಅನೇಕ ಬಾರಿ ನಮಗೆ ಅರಿವಿಲ್ಲದೆಯೇ ನೋವು, ಕೋಪ ಮತ್ತು ಅಸಮಾಧಾನದ ಹೊರೆಯನ್ನು ಹೊತ್ತುಕೊಂಡಿರುತ್ತೇವೆ.  ಕುಟುಂಬದವರಿಗೆ ನಾವು ಆಪ್ತರಾಗಿರುವುದರಿಂದ ಅವರ ದೌರ್ಬಲ್ಯಗಳು ನಮಗೆ ಸುಲಭವಾಗಿ ಕಾಣಿಸುತ್ತವೆ; ಹಾಗಾಗಿ ಅವುಗಳ ಮೇಲೆಯೇ ನಮ್ಮ ಗಮನವನ್ನು ಕೇಂದ್ರೀಕರಿಸುವುದೂ ಸುಲಭವಾಗುತ್ತದೆ. 

ಇಂದು ನಿಮ್ಮ ಕುಟುಂಬದ ಬಗ್ಗೆ ಚಿಂತಿಸಿ.  ವಿಶೇಷವಾಗಿ, ಅವರ ದೌರ್ಬಲ್ಯಗಳನ್ನೂ ಪಾಪಗಳನ್ನೂ ಮೀರಿ ನೋಡಿ, ಅವರ ಜೀವನದಲ್ಲಿ ಕಾರ್ಯನಿರತವಾಗಿರುವ ದೇವರ ಒಳ್ಳೆಯತನವನ್ನು ಕಾಣಲು ನೀವು ಸಿದ್ಧರಿದ್ದೀರೋ ಎಂದು ಚಿಂತಿಸಿ.  ಅವರ ಮೂಲಕ ದೇವರು ನಿಮಗೆ ಹೇಳಬಯಸುವ ವಿಷಯಗಳು ಬಹಳಷ್ಟಿವೆ.  ನೀವು ಆ ಬಾಗಿಲನ್ನು ಮುಚ್ಚಿಲ್ಲವೆಂದೂ, ಅವರನ್ನು ಸುವಾರ್ತೆಯ ಸಂದೇಶವಾಹಕರಾಗಿ ಸ್ವೀಕರಿಸಲು ಸಿದ್ಧರಿದ್ದೀರೆಂದೂ ಖಚಿತಪಡಿಸಿಕೊಳ್ಳಿ.

ಪ್ರಭುವೇ, ನನ್ನ ಕುಟುಂಬಕ್ಕಾಗಿ ನಿಮಗೆ ಕೃತಜ್ಞತೆ ಸಲ್ಲಿಸುತ್ತೇನೆ.  ನನ್ನ ಜೀವನದಲ್ಲಿ ಅವರು ವರದಾನವಾಗಿರುವುದಕ್ಕಾಗಿ ನಿಮಗೆ ಕೃತಜ್ಞತೆ ಸಲ್ಲಿಸುತ್ತೇನೆ.  ಅಗತ್ಯವಿದ್ದಾಗಲೆಲ್ಲ ಅವರಿಗೆ ಕರುಣೆ ಮತ್ತು ಕ್ಷಮೆಯನ್ನು ತೋರಿಸಲು ಪ್ರತಿದಿನ ನನಗೆ ಸಹಾಯಮಾಡಿ.  ಅವರ ಮೂಲಕ ಮಾತನಾಡುವ ನಿಮ್ಮ ಧ್ವನಿಗೆ ಪ್ರತಿದಿನ ತೆರೆದ ಮನಸ್ಸಿನಿಂದ ಕಿವಿಗೊಡಲು ನನಗೆ ಸಹಾಯಮಾಡಿ.  ಯೇಸುವೇ, ನಾನು ನಿಮ್ಮಲ್ಲಿ ಭರವಸೆಯಿಡುತ್ತೇನೆ.

ಇನ್ನಷ್ಟು ಸುವಾರ್ತಾ ಚಿಂತನೆಗಳು

ದೈವಿಕ ಕರುಣೆಯ ಧ್ಯಾನಗಳು

ಇಂದಿನ ಸಂತರು – ಸಂತ ಬ್ಲೇಸ್ – ಸಂತ ಅನ್ಸ್‌ಗಾರ್