உங்கள் குடும்பத்தினருக்குப் போதித்தல்

ஞாயிறு, பிப்ரவரி 3, 2019

பொதுக்காலத்தின் நான்காம் ஞாயிறு, ஆண்டு C

இன்றைய வாசகங்கள்

புனித பிளாசியார், ஆயரும் மறைசாட்சியும், அல்லது புனித அன்ஸ்கார், ஆயர் – விருப்ப நினைவு

அவர், “உறுதியாக உங்களுக்குச் சொல்கிறேன்: இறைவாக்கினர் எவரும் தமது சொந்த ஊரில் ஏற்றுக்கொள்ளப்படுவதில்லை” என்றார்.  லூக்கா 4:24

முன்பின் அறியாத ஒருவரிடம் நற்செய்தியைப் பகிர்ந்துகொள்வதுபோல் உங்கள் குடும்பத்தினரிடம் அதைப் பகிர்ந்துகொள்வது எப்போதும் எளிதாக இருப்பதில்லை. அதேபோல், வேறொருவர் வழியாக நற்செய்திச் செய்தியைக் கேட்பதுபோல் குடும்ப உறுப்பினர் ஒருவர் வழியாக அதைக் கேட்பதும் எப்போதும் எளிதாக இருப்பதில்லை. அது ஏன்?

நம் குடும்ப உறுப்பினர்களோடு நமக்குள்ள நெருங்கிய பழக்கத்தைப் போன்றே, ஒருவரோடு நமக்குள்ள பழக்கம், அவரது உறுதியான நம்பிக்கைகள் மீதும் கிறிஸ்தவச் சாட்சியம் மீதும் போதிய நம்பிக்கை வைக்காதிருக்க நம்மைத் தூண்டக்கூடும். நம் உறவுகள் அனைத்திலும் நிச்சயமாக இந்நிலை இருப்பதில்லை என்றாலும், சில உறவுகளில் இப்படி இருக்கலாம். சில வேளைகளில், குழந்தைகள் மற்றொருவரின் சொற்கள்மீது வைக்கும் அளவுக்கு, தங்கள் தந்தை அல்லது தாயின் சொற்கள்மீது நம்பிக்கை வைப்பதில்லை. உடன்பிறந்தவர்கள், பிறருடைய அறிவுரைகளை ஏற்றுக்கொள்ளும் அளவுக்கு ஒருவருக்கொருவர் வழங்கும் அறிவுரைகளை ஏற்றுக்கொள்ள மனம் திறந்தவர்களாக இல்லாமல் இருக்கலாம்.

நமக்கு அறிமுகமில்லாதவர்களைவிட, நன்கு அறிமுகமானவர்களிடம் நாம் பெரும்பாலும் மிக அதிகமாகக் குறை காண்பது இந்த அனுபவத்திற்கான காரணங்களில் ஒன்றாக இருக்கலாம்.  நீண்டகாலத் தனிப்பட்ட அனுபவங்கள், குடும்பத்தினரைத் திறந்த மனதுடன் அணுகுவதற்குத் தடையாக இருக்க நாம் எளிதில் இடமளித்துவிடுகிறோம்.  பல ஆண்டுகளாக நமக்கு ஏற்பட்ட கசப்பான அனுபவங்களைப் பொறுத்தவரை இது குறிப்பாக உண்மை.  பல வேளைகளில், கசப்பான அனுபவங்களையும் மனக்காயங்களையும் ஆண்டுக்கணக்கில் பிடித்துக்கொண்டிருக்கிறோம்; குடும்ப உறுப்பினர் ஒருவர் சொல்லும் அல்லது செய்யும் எதையும் அந்த அனுபவங்களின் வழியாகவே பார்க்க இடமளிக்கிறோம்.

“இறைவாக்கினர் எவரும் தம் சொந்த ஊரில் ஏற்றுக்கொள்ளப்படுவதில்லை” என்ற இயேசுவின் இந்தக் கூற்று, நாமும் இத்தகைய மனப்போக்கிற்கு இடமளிக்காதபடி பார்த்துக்கொள்ள நமக்குச் சவால் விடுக்க வேண்டும். நம் சொந்தக் குடும்ப உறுப்பினர்கள் நம்முடன் பகிர்ந்துகொள்ளும் இறைவாக்குச் சாட்சியத்தை நாம் உண்மையாகவே ஏற்றுக்கொள்கிறோம் என்பதை உறுதிசெய்ய நம்மால் இயன்றதைச் செய்ய வேண்டும்.

இதற்கான சிறந்த வழி, அந்த உறவுகளில் நாம் சுமந்துகொண்டிருக்கும் எந்தவொரு “மனச்சுமையையும்” அகற்றத் தொடர்ந்து முயல்வதாகும். பல வேளைகளில், நம்மை அறியாமலேயே மனக்காயம், கோபம், மனக்கசப்பு ஆகிய சுமைகளைச் சுமந்துகொண்டிருக்கிறோம். குடும்ப உறுப்பினர்களுடன் நெருக்கமாக இருப்பதால், அவர்களுடைய பலவீனங்களை நாம் எளிதில் காண்கிறோம்; இதனால் அந்தப் பலவீனங்களிலேயே நம் கவனத்தைச் செலுத்திவிடுவதும் எளிதாகிறது.

இன்று உங்கள் குடும்பத்தினரைக் குறித்துச் சிந்தியுங்கள்.  குறிப்பாக, அவர்களுடைய வாழ்வில் கடவுளின் நன்மைத்தனம் செயல்படுவதைக் காணும் பொருட்டு, அவர்களுடைய பலவீனங்களையும் பாவங்களையும் கடந்து பார்க்க நீங்கள் முன்வருகிறீர்களா என்று சிந்தியுங்கள்.  அவர்கள் வழியாகக் கடவுள் உங்களுக்குச் சொல்ல விரும்புபவை ஏராளம் உள்ளன.  அந்தக் கதவை நீங்கள் மூடிவிடவில்லை என்பதையும், அவர்களை நற்செய்தியின் தூதர்களாக ஏற்றுக்கொள்ளத் தயாராக இருக்கிறீர்கள் என்பதையும் உறுதிசெய்துகொள்ளுங்கள்.

ஆண்டவரே, என் குடும்பத்திற்காக உமக்கு நன்றி கூறுகிறேன். என் வாழ்வில் அவர்கள் ஒரு கொடையாக இருப்பதற்காக உமக்கு நன்றி கூறுகிறேன். ஒவ்வொரு நாளும் அவர்களுக்குத் தேவைப்படும் இரக்கத்தையும் மன்னிப்பையும் காட்ட எனக்கு உதவியருளும். அவர்கள் வழியாகப் பேசும் உமது குரலுக்கு ஒவ்வொரு நாளும் மனம் திறந்திருக்க எனக்கு உதவியருளும். இயேசுவே, உம்மில் நம்பிக்கை வைக்கிறேன்.

மேலும் நற்செய்திச் சிந்தனைகள்

இறை இரக்கச் சிந்தனைகள்

இன்றைய புனிதர்கள் – புனித பிளாசியார் – புனித அன்ஸ்கார்