ಮಾರ್ಚ್ 10, 2020
ತಪಸ್ಸುಕಾಲದ ಎರಡನೆಯ ವಾರದ ಮಂಗಳವಾರ
ಇಂದಿನ ವಾಚನಗಳು
“ತನ್ನನ್ನು ತಾನೇ ಉನ್ನತಿಗೇರಿಸಿಕೊಳ್ಳುವವನು ತಗ್ಗಿಸಲ್ಪಡುವನು; ಆದರೆ ತನ್ನನ್ನು ತಾನೇ ತಗ್ಗಿಸಿಕೊಳ್ಳುವವನು ಉನ್ನತಿಗೇರಿಸಲ್ಪಡುವನು.” ಮತ್ತಾಯ 23:12
ವಿನಮ್ರತೆ ಎಷ್ಟೊಂದು ವಿರೋಧಾಭಾಸದಂತೆ ತೋರುತ್ತದೆ. ನಾವು ಚೆನ್ನಾಗಿ ಮಾಡುವ ಎಲ್ಲವನ್ನೂ ಎಲ್ಲರಿಗೂ ತಿಳಿಸುವುದೇ ಶ್ರೇಷ್ಠತೆಯನ್ನು ಸಾಧಿಸುವ ಮಾರ್ಗ ಎಂದು ಭಾವಿಸುವ ಪ್ರಲೋಭನೆಗೆ ನಾವು ಸುಲಭವಾಗಿ ಒಳಗಾಗುತ್ತೇವೆ. ತಮ್ಮ ಅತ್ಯುತ್ತಮ ಮುಖವನ್ನೇ ತೋರಿಸಿ, ಇತರರು ಅದನ್ನು ಗಮನಿಸಿ ಮೆಚ್ಚಲಿ ಎಂದು ಆಶಿಸುವ ಪ್ರಲೋಭನೆ ಹೆಚ್ಚಿನ ಜನರಲ್ಲಿ ನಿರಂತರವಾಗಿ ಇರುತ್ತದೆ. ಇತರರು ನಮ್ಮನ್ನು ಗಮನಿಸಬೇಕು, ಹೊಗಳಬೇಕು ಎಂದು ನಾವು ಬಯಸುತ್ತೇವೆ. ಹಾಗಾಗುವಂತೆ ಮಾಡಲು ನಾವು ಮಾಡುವ ಮತ್ತು ಹೇಳುವ ಚಿಕ್ಕಚಿಕ್ಕ ಸಂಗತಿಗಳ ಮೂಲಕ ಆಗಾಗ ಪ್ರಯತ್ನಿಸುತ್ತೇವೆ. ಅನೇಕ ಬಾರಿ ನಾವು ನಮ್ಮನ್ನು ಇರುವುದಕ್ಕಿಂತ ಹೆಚ್ಚಾಗಿ ತೋರಿಸಿಕೊಳ್ಳಲು ಒಲವು ತೋರುತ್ತೇವೆ.
ಇದಕ್ಕೆ ವಿರುದ್ಧವಾಗಿ, ಯಾರಾದರೂ ನಮ್ಮನ್ನು ಟೀಕಿಸಿದರೆ ಮತ್ತು ನಮ್ಮ ಬಗ್ಗೆ ಕೆಟ್ಟದಾಗಿ ಭಾವಿಸಿದರೆ, ಅದು ನಮ್ಮನ್ನು ತೀವ್ರವಾಗಿ ಕುಗ್ಗಿಸಬಹುದು. ಯಾರಾದರೂ ನಮ್ಮ ಬಗ್ಗೆ ಕೆಟ್ಟ ಮಾತು ಆಡಿದ್ದಾರೆಂದು ಕೇಳಿದರೆ, ನಾವು ಮನೆಗೆ ಹೋಗಿ ಉಳಿದ ಇಡೀ ದಿನ, ಅಥವಾ ಉಳಿದ ಇಡೀ ವಾರವೂ ಅದರ ಬಗ್ಗೆ ಖಿನ್ನರಾಗಬಹುದು ಅಥವಾ ಕೋಪಗೊಂಡಿರಬಹುದು! ಏಕೆ? ಏಕೆಂದರೆ ನಮ್ಮ ಅಹಂಕಾರಕ್ಕೆ ಗಾಯವಾಗಿದೆ; ಆ ಗಾಯ ನೋವುಂಟುಮಾಡಬಲ್ಲದು. ವಿನಮ್ರತೆಯ ಅದ್ಭುತ ಕೊಡುಗೆಯನ್ನು ನಾವು ಕಂಡುಕೊಳ್ಳದಿದ್ದರೆ ಅದು ನೋವುಂಟುಮಾಡಬಲ್ಲದು.
ವಿನಮ್ರತೆಯು ನಾವು ನೈಜವಾಗಿ ಇರಲು ನೆರವಾಗುವ ಸದ್ಗುಣವಾಗಿದೆ. ನಾವು ಧರಿಸಿಕೊಂಡಿರಬಹುದಾದ ಯಾವುದೇ ಸುಳ್ಳು ಮುಖವಾಡವನ್ನು ಕಳಚಿ, ಸರಳವಾಗಿ ನಾವಾಗಿಯೇ ಇರಲು ಅದು ನೆರವಾಗುತ್ತದೆ. ನಮ್ಮ ಒಳ್ಳೆಯ ಗುಣಗಳನ್ನೂ ನಮ್ಮ ವೈಫಲ್ಯಗಳನ್ನೂ ಸಹಜವಾಗಿ ಸ್ವೀಕರಿಸಲು ಅದು ನಮಗೆ ನೆರವಾಗುತ್ತದೆ. ವಿನಮ್ರತೆ ಎಂದರೆ ನಮ್ಮ ಬದುಕಿನ ಬಗ್ಗೆ ಪ್ರಾಮಾಣಿಕರೂ ಸತ್ಯವಂತರೂ ಆಗಿರುವುದು ಮತ್ತು ನಾವು ನಿಜವಾಗಿ ಯಾರಾಗಿದ್ದೇವೆಯೋ ಅದನ್ನು ನೆಮ್ಮದಿಯಿಂದ ಒಪ್ಪಿಕೊಳ್ಳುವುದೇ ಹೊರತು ಬೇರೇನೂ ಅಲ್ಲ.
ಮೇಲಿನ ಸುವಾರ್ತೆಯ ಭಾಗದಲ್ಲಿ ಯೇಸು ನಮಗೆ ಒಂದು ಅದ್ಭುತ ಪಾಠವನ್ನು ನೀಡುತ್ತಾರೆ. ಅದನ್ನು ಜೀವನದಲ್ಲಿ ಅನುಸರಿಸುವುದು ಬಹಳ ಕಷ್ಟವಾದರೂ, ಸಂತೋಷದ ಜೀವನಕ್ಕೆ ಅದು ಅತ್ಯಂತ ಅಗತ್ಯವಾಗಿದೆ. ನಾವು ಉನ್ನತಿಗೇರಿಸಲ್ಪಡಬೇಕೆಂದು ಅವರು ಬಯಸುತ್ತಾರೆ! ಇತರರು ನಮ್ಮನ್ನು ಗಮನಿಸಬೇಕೆಂದು ಅವರು ಬಯಸುತ್ತಾರೆ. ನಮ್ಮ ಒಳ್ಳೆಯತನದ ಬೆಳಕು ಎಲ್ಲರಿಗೂ ಕಾಣುವಂತೆ ಪ್ರಕಾಶಿಸಬೇಕೆಂದೂ, ಆ ಬೆಳಕು ಒಳಿತಿನ ಬದಲಾವಣೆಯನ್ನು ತರಬೇಕೆಂದೂ ಅವರು ಬಯಸುತ್ತಾರೆ. ಆದರೆ ಅದು ಸುಳ್ಳು ಮುಖವಾಡವನ್ನು ತೋರಿಸುವುದರಿಂದಲ್ಲ, ಸತ್ಯದಲ್ಲಿ ನಡೆಯಬೇಕೆಂದು ಅವರು ಬಯಸುತ್ತಾರೆ. ನಿಜವಾದ “ನಾನು” ಪ್ರಕಾಶಿಸಬೇಕೆಂದು ಅವರು ಬಯಸುತ್ತಾರೆ. ಅದೇ ವಿನಮ್ರತೆ.
ವಿನಮ್ರತೆ ಎಂದರೆ ನಿಷ್ಕಪಟತೆ ಮತ್ತು ನೈಜತೆ. ಜನರು ನಮ್ಮಲ್ಲಿ ಈ ಗುಣವನ್ನು ಕಂಡಾಗ ಪ್ರಭಾವಿತರಾಗುತ್ತಾರೆ. ಅದು ಲೌಕಿಕ ರೀತಿಯ ಮೆಚ್ಚುಗೆಯಾಗಿರದೆ, ನೈಜ ಮಾನವೀಯ ಮೆಚ್ಚುಗೆಯಾಗಿರುತ್ತದೆ. ಅವರು ನಮ್ಮನ್ನು ನೋಡಿ ಅಸೂಯೆಪಡುವುದಿಲ್ಲ; ಬದಲಾಗಿ, ನಮ್ಮಲ್ಲಿರುವ ನಿಜವಾದ ಗುಣಗಳನ್ನು ಕಂಡು ಅವುಗಳಲ್ಲಿ ಸಂತೋಷಪಡುತ್ತಾರೆ, ಅವುಗಳನ್ನು ಮೆಚ್ಚುತ್ತಾರೆ ಮತ್ತು ಅನುಕರಿಸಲು ಬಯಸುತ್ತಾರೆ. ವಿನಮ್ರತೆಯು ನಿಮ್ಮ ನಿಜಸ್ವರೂಪ ಬೆಳಗಲು ನೆರವಾಗುತ್ತದೆ. ನೀವು ನಂಬಿದರೂ ನಂಬದಿದ್ದರೂ, ನಿಮ್ಮ ನಿಜಸ್ವರೂಪವನ್ನೇ ಇತರರು ಭೇಟಿಯಾಗಿ ಪರಿಚಯಮಾಡಿಕೊಳ್ಳಲು ಬಯಸುತ್ತಾರೆ.
ನೀವು ಎಷ್ಟು ನೈಜವಾಗಿದ್ದೀರಿ ಎಂಬುದನ್ನು ಇಂದು ಮನನ ಮಾಡಿ. ಅಹಂಕಾರದ ಮೂರ್ಖತನವು ನುಚ್ಚುನೂರಾಗುವ ಸಮಯವಾಗಿ ಈ ತಪಸ್ಸುಕಾಲವನ್ನು ರೂಪಿಸಿಕೊಳ್ಳಿ. ನಿಮ್ಮ ನಿಜಸ್ವರೂಪ ಬೆಳಗುವಂತೆ, ನಿಮ್ಮ ಬಗ್ಗೆ ನೀವು ಕಟ್ಟಿಕೊಂಡಿರುವ ಪ್ರತಿಯೊಂದು ಸುಳ್ಳು ಪ್ರತಿಬಿಂಬವನ್ನೂ ದೇವರು ತೆಗೆದುಹಾಕಲು ಅವಕಾಶ ನೀಡಿ. ಈ ರೀತಿಯಲ್ಲಿ ನಿಮ್ಮನ್ನು ತಗ್ಗಿಸಿಕೊಳ್ಳಿ; ಆಗ ನಿಮ್ಮ ಸುತ್ತಲಿರುವವರು ನಿಮ್ಮ ಹೃದಯವನ್ನು ಅರಿತು ಪ್ರೀತಿಸುವಂತೆ ದೇವರು ನಿಮ್ಮನ್ನು ತಮ್ಮ ವಶಕ್ಕೆ ತೆಗೆದುಕೊಂಡು, ತಮ್ಮದೇ ರೀತಿಯಲ್ಲಿ ಉನ್ನತಿಗೇರಿಸುವರು.
ಪ್ರಭುವೇ, ನನ್ನನ್ನು ವಿನಮ್ರನನ್ನಾಗಿ ಮಾಡಿರಿ. ನಾನು ನಿಜವಾಗಿ ಯಾರು ಎಂಬುದರ ಬಗ್ಗೆ ನಿಷ್ಕಪಟನೂ ಪ್ರಾಮಾಣಿಕನೂ ಆಗಿರಲು ನನಗೆ ಸಹಾಯ ಮಾಡಿರಿ. ಆ ಪ್ರಾಮಾಣಿಕತೆಯಲ್ಲಿ, ನನ್ನ ಹೃದಯದಲ್ಲಿ ಜೀವಿಸುವ ನಿಮ್ಮ ಹೃದಯವು ಇತರರಿಗೆ ಕಾಣುವಂತೆ ನನ್ನ ಮೂಲಕ ಪ್ರಕಾಶಿಸಲು ಅವಕಾಶ ನೀಡಲು ನನಗೆ ಸಹಾಯ ಮಾಡಿರಿ. ಯೇಸುವೇ, ನಾನು ನಿಮ್ಮಲ್ಲಿ ಭರವಸೆಯಿಡುತ್ತೇನೆ.
ಶಿಲುಬೆಯ ಬುಡದಲ್ಲಿ 40 ದಿನಗಳು – ಹದಿಮೂರನೆಯ ಮನನ – ಒಬ್ಬ ತಾಯಿಯ ಚಿಂತನೆಗಳು
