மார்ச் 10, 2020
தவக்காலத்தின் இரண்டாம் வாரம் — செவ்வாய்க்கிழமை
இன்றைய வாசகங்கள்
“தம்மைத்தாமே உயர்த்துவோர் தாழ்த்தப்படுவர்; தம்மைத்தாமே தாழ்த்துவோர் உயர்த்தப்படுவர்.” மத்தேயு 23:12
தாழ்மை என்பது முரண்பாடான ஒன்றாகவே தோன்றுகிறது. நாம் சிறப்பாகச் செய்யும் அனைத்தையும் எல்லாருக்கும் தெரியப்படுத்துவதுதான் மேன்மை அடைவதற்கான வழி என்று நினைக்க நாம் எளிதில் தூண்டப்படுகிறோம். தங்களிடம் உள்ள சிறந்தவற்றை மட்டுமே வெளிக்காட்டி, பிறர் அவற்றைக் கண்டு பாராட்ட வேண்டும் என்று எதிர்பார்க்கும் சோதனை பெரும்பாலானோருக்கு எப்போதும் இருக்கிறது. பிறர் நம்மைக் கவனிக்கவும் புகழவும் வேண்டும் என்று விரும்புகிறோம். நாம் செய்யும், பேசும் சிறுசிறு காரியங்களின் வழியாக அதை அடைய அடிக்கடி முயல்கிறோம். பல வேளைகளில் நாம் உண்மையில் இருப்பதைவிட நம்மை மிகைப்படுத்திக் காட்டவும் முனைகிறோம்.
மறுபுறம், யாராவது நம்மைக் குறைகூறி, நம்மைப் பற்றித் தவறாக நினைத்தால், அது நம்மை நிலைகுலையச் செய்யக்கூடும். நம்மைப் பற்றி ஒருவர் எதிர்மறையாக ஏதோ சொன்னார் என்று கேள்விப்பட்டால், வீட்டிற்குச் சென்ற பிறகும் அன்றைய நாள் முழுவதும், ஏன் அந்த வாரம் முழுவதும்கூட, அதை நினைத்து மனச்சோர்விலோ கோபத்திலோ இருக்கக்கூடும்! ஏன்? நம் ஆணவம் காயப்பட்டுவிட்டது; அந்தக் காயம் வலியைத் தரக்கூடும். தாழ்மை என்னும் வியத்தகு கொடையை நாம் கண்டறியாதவரை, அது நம்மை வதைக்கக்கூடும்.
தாழ்மை என்பது நாம் உண்மையாக இருக்க உதவும் ஒரு நற்பண்பு. நாம் அணிந்திருக்கக்கூடிய எந்தப் போலி முகமூடியையும் அகற்றிவிட்டு, நாம் நாமாகவே இருக்க அது உதவுகிறது. நம் நல்ல பண்புகளையும் நம் தோல்விகளையும் ஏற்று மன அமைதியுடன் இருக்க அது உதவுகிறது. நம் வாழ்க்கையைப் பற்றி நேர்மையாகவும் உண்மையாகவும் இருந்து, நாம் யாராக இருக்கிறோமோ அதை மன அமைதியுடன் ஏற்றுக்கொள்வதே தாழ்மை; அது வேறொன்றுமல்ல.
மேலே உள்ள நற்செய்திப் பகுதியில் இயேசு நமக்கு ஓர் அருமையான பாடத்தைத் தருகிறார். அதை வாழ்வில் கடைப்பிடிப்பது மிகவும் கடினம்; ஆனால் மகிழ்ச்சியான வாழ்க்கை வாழ்வதற்கு அது முற்றிலும் இன்றியமையாதது. நாம் உயர்த்தப்பட வேண்டும் என்று அவர் விரும்புகிறார்! பிறர் நம்மைக் கவனிக்க வேண்டும் என்று அவர் விரும்புகிறார். நம்மிடமுள்ள நன்மையின் ஒளி எல்லாரும் காணும்படி சுடர்விடவும், அந்த ஒளி ஒரு மாற்றத்தை ஏற்படுத்தவும் அவர் விரும்புகிறார். ஆனால் அது ஒரு போலித் தோற்றத்தை வெளிப்படுத்துவதன் வழியாக அல்ல, உண்மையின் அடிப்படையில் நிகழ வேண்டும் என்று அவர் விரும்புகிறார். உண்மையான “நான்” ஒளிர வேண்டும் என்று அவர் விரும்புகிறார். அதுவே தாழ்மை.
தாழ்மை என்பது உள்ளார்ந்த நேர்மையும் உண்மைத்தன்மையும் ஆகும். இந்தப் பண்பை மக்கள் நம்மில் காணும்போது, அது அவர்களைக் கவர்கிறது. உலகப் போக்கின்படி அல்ல, உண்மையான மனிதப் பண்பின் அடிப்படையில் அவர்கள் கவரப்படுகிறார்கள். அவர்கள் நம்மைப் பார்த்துப் பொறாமைப்பட மாட்டார்கள்; மாறாக, நம்மைப் பார்த்து நம்மிடமுள்ள உண்மையான பண்புகளைக் கண்டுணர்ந்து, அவற்றில் மகிழ்ந்து, அவற்றைப் பாராட்டி, தாங்களும் அவற்றைப் பின்பற்ற விரும்புவார்கள். உங்களின் உண்மையான இயல்பு ஒளிரத் தாழ்மை உதவுகிறது. நீங்கள் நம்பினாலும் நம்பாவிட்டாலும், நீங்கள் உண்மையில் யாராக இருக்கிறீர்களோ, அப்படிப்பட்ட உங்களைத்தான் பிறர் சந்திக்கவும் அறிந்துகொள்ளவும் விரும்புகிறார்கள்.
நீங்கள் எந்த அளவுக்கு உண்மையாக இருக்கிறீர்கள் என்பதை இன்று சிந்தித்துப் பாருங்கள். ஆணவத்தின் மதியீனம் தகர்க்கப்படும் காலமாக இந்தத் தவக்காலத்தை ஆக்குங்கள். உங்களின் உண்மையான இயல்பு ஒளிரும்படி, உங்களைப் பற்றிய ஒவ்வொரு போலித் தோற்றத்தையும் கடவுள் அகற்ற அனுமதியுங்கள். இவ்வாறு உங்களைத் தாழ்த்திக்கொள்ளுங்கள்; அப்போது உங்களைச் சுற்றியிருப்பவர்கள் உங்கள் உள்ளத்தைக் கண்டுணர்ந்து அன்பு செய்யும்படி, கடவுள் உங்களை ஏற்று, தமது வழியில் உங்களை உயர்த்துவார்.
ஆண்டவரே, என்னைத் தாழ்மையுள்ளவனாக்கும். நான் யார் என்பதைப் பற்றி உள்ளார்ந்த நேர்மையுடனும் உண்மையுடனும் இருக்க எனக்கு உதவியருளும். அந்த நேர்மையில், என் இதயத்தில் வாழும் உமது இதயம் பிறர் காணும்படி என்னில் ஒளிர இடமளிக்க எனக்கு உதவியருளும். இயேசுவே, உம்மில் நம்பிக்கை வைக்கிறேன்.
சிலுவையடியில் 40 நாள்கள் – பதின்மூன்றாம் சிந்தனை – ஓர் அன்னையின் ஆழ்ந்த சிந்தனைகள்
இன்றைய புனிதர்கள்/திருவிழாக்கள்
திருப்பலி வாசிப்புகளுக்கான தெரிவுகள்
