ಸೆಪ್ಟೆಂಬರ್ 10, 2020
ಸಾಮಾನ್ಯ ಕಾಲದ ಇಪ್ಪತ್ತಮೂರನೆಯ ವಾರದ ಗುರುವಾರ
ಇಂದಿನ ವಾಚನಗಳು
ಯೇಸು ತಮ್ಮ ಶಿಷ್ಯರಿಗೆ ಹೇಳಿದರು: “ನನ್ನ ಮಾತನ್ನು ಕೇಳುವ ನಿಮಗೆ ನಾನು ಹೇಳುವುದೇನೆಂದರೆ, ನಿಮ್ಮ ಶತ್ರುಗಳನ್ನು ಪ್ರೀತಿಸಿರಿ, ನಿಮ್ಮನ್ನು ದ್ವೇಷಿಸುವವರಿಗೆ ಒಳ್ಳೆಯದನ್ನು ಮಾಡಿರಿ, ನಿಮ್ಮನ್ನು ಶಪಿಸುವವರನ್ನು ಆಶೀರ್ವದಿಸಿರಿ, ನಿಮ್ಮನ್ನು ಕೆಟ್ಟದಾಗಿ ನಡೆಸಿಕೊಳ್ಳುವವರಿಗಾಗಿ ಪ್ರಾರ್ಥಿಸಿರಿ.” ಲೂಕ 6:27-28
ಈ ಮಾತುಗಳನ್ನು ಹೇಳುವುದು ಸುಲಭ, ಆದರೆ ಪಾಲಿಸುವುದು ಕಷ್ಟ ಎಂಬುದು ಸ್ಪಷ್ಟ. ನಿಜವಾಗಿ ಇಂತಹ ಸಂದರ್ಭ ಎದುರಾದಾಗ, ಯಾರಾದರೂ ನಿಮ್ಮನ್ನು ದ್ವೇಷದಿಂದ ಕಂಡು ಕೆಟ್ಟದಾಗಿ ನಡೆಸಿಕೊಂಡಾಗ, ಅವರನ್ನು ಪ್ರೀತಿಸುವುದು, ಆಶೀರ್ವದಿಸುವುದು ಮತ್ತು ಅವರಿಗಾಗಿ ಪ್ರಾರ್ಥಿಸುವುದು ನಿಮಗೆ ಸ್ವಲ್ಪವೂ ಇಷ್ಟವಾಗುವುದಿಲ್ಲ. ಆದರೆ ನಾವು ಮಾಡಬೇಕೆಂದು ಕರೆಯಲ್ಪಟ್ಟಿರುವುದು ಇದನ್ನೇ ಎಂದು ಯೇಸು ಬಹಳ ಸ್ಪಷ್ಟವಾಗಿ ಹೇಳುತ್ತಾರೆ.
ನಾವು ನೇರವಾದ ಕಿರುಕುಳಕ್ಕೆ ಅಥವಾ ದುರುದ್ದೇಶದ ವರ್ತನೆಗೆ ಒಳಗಾದಾಗ, ಸುಲಭವಾಗಿ ಮನಸ್ಸಿಗೆ ನೋವಾಗಬಹುದು. ಈ ನೋವು ನಮ್ಮನ್ನು ಕೋಪಕ್ಕೆ, ಪ್ರತೀಕಾರದ ಬಯಕೆಗಳಿಗೆ ಮತ್ತು ದ್ವೇಷಕ್ಕೂ ಕೊಂಡೊಯ್ಯಬಹುದು. ನಾವು ಈ ಪ್ರಲೋಭನೆಗಳಿಗೆ ಮಣಿದರೆ, ನಮಗೆ ನೋವುಂಟುಮಾಡಿದವರಂತೆಯೇ ನಾವೂ ಆಗಿಬಿಡುತ್ತೇವೆ. ದುಃಖದ ಸಂಗತಿಯೆಂದರೆ, ನಮಗೆ ನೋವುಂಟುಮಾಡಿದವರನ್ನು ದ್ವೇಷಿಸುವುದರಿಂದ ಪರಿಸ್ಥಿತಿ ಇನ್ನಷ್ಟು ಕೆಡುತ್ತದೆಯಷ್ಟೆ.
ಆದರೆ ಮತ್ತೊಬ್ಬರು ನಮಗೆ ಹಾನಿಮಾಡಿದಾಗ, ಪ್ರತಿಯಾಗಿ ಅವರನ್ನು ಪ್ರೀತಿಸಬೇಕೆಂಬ ಯೇಸುವಿನ ಆಜ್ಞೆಯನ್ನೂ ನಾವು ಎದುರಿಸಬೇಕಾಗುತ್ತದೆ. ಆಗ ನಮ್ಮೆಲ್ಲರೊಳಗೂ ಉಂಟಾಗುವ ಸಂಘರ್ಷವನ್ನು ನಿರಾಕರಿಸುವುದು ವಾಸ್ತವವನ್ನು ಅರಿಯದಂತಾಗುತ್ತದೆ. ನಾವು ಪ್ರಾಮಾಣಿಕರಾಗಿದ್ದರೆ, ಈ ಆಂತರಿಕ ಸಂಘರ್ಷವನ್ನು ಒಪ್ಪಿಕೊಳ್ಳಲೇಬೇಕು. ನಮ್ಮೊಳಗೆ ನೋವು ಮತ್ತು ಕೋಪದ ಭಾವನೆಗಳಿದ್ದರೂ, ಸಂಪೂರ್ಣ ಪ್ರೀತಿಯ ಆಜ್ಞೆಯನ್ನು ಸ್ವೀಕರಿಸಿ ಪಾಲಿಸಲು ಪ್ರಯತ್ನಿಸುವಾಗ ಈ ಸಂಘರ್ಷ ಉಂಟಾಗುತ್ತದೆ.
ನಾವು ಕೇವಲ ನಮ್ಮ ಭಾವನೆಗಳ ಆಧಾರದಲ್ಲಿ ಬದುಕುವುದಕ್ಕಿಂತಲೂ ಎಷ್ಟೋ ಹೆಚ್ಚಿನದನ್ನು ದೇವರು ನಮಗಾಗಿ ಬಯಸುತ್ತಾರೆ ಎಂಬುದು ಈ ಆಂತರಿಕ ಸಂಘರ್ಷವು ಬಯಲುಪಡಿಸುವ ಒಂದು ಸಂಗತಿ. ಕೋಪಗೊಂಡಿರುವುದು ಅಥವಾ ಮನನೊಂದಿರುವುದು ಅಷ್ಟೇನೂ ಹಿತಕರವಲ್ಲ. ವಾಸ್ತವವಾಗಿ, ಅದು ಬಹಳ ದುಃಖಕ್ಕೆ ಕಾರಣವಾಗಬಹುದು. ಆದರೆ ಹಾಗೆಯೇ ಆಗಬೇಕೆಂದೇನಿಲ್ಲ. ನಮ್ಮ ಶತ್ರುಗಳನ್ನು ಪ್ರೀತಿಸಬೇಕೆಂಬ ಯೇಸುವಿನ ಈ ಆಜ್ಞೆಯನ್ನು ನಾವು ಅರ್ಥಮಾಡಿಕೊಂಡರೆ, ದುಃಖದಿಂದ ಹೊರಬರುವ ದಾರಿ ಇದೇ ಎಂಬುದನ್ನು ಅರಿಯಲು ಪ್ರಾರಂಭಿಸುತ್ತೇವೆ. ನೊಂದ ಭಾವನೆಗಳಿಗೆ ಮಣಿದು, ಕೋಪಕ್ಕೆ ಪ್ರತಿಯಾಗಿ ಕೋಪವನ್ನೂ ದ್ವೇಷಕ್ಕೆ ಪ್ರತಿಯಾಗಿ ದ್ವೇಷವನ್ನೂ ತೋರಿಸುವುದರಿಂದ ಗಾಯ ಇನ್ನಷ್ಟು ಆಳವಾಗುತ್ತದೆಯಷ್ಟೆ ಎಂಬುದನ್ನು ಅರಿಯತೊಡಗುತ್ತೇವೆ. ಮತ್ತೊಂದೆಡೆ, ನಮ್ಮನ್ನು ಕೆಟ್ಟದಾಗಿ ನಡೆಸಿಕೊಂಡಾಗಲೂ ನಾವು ಪ್ರೀತಿಸಲು ಸಾಧ್ಯವಾದರೆ, ಇಂತಹ ಸಂದರ್ಭದಲ್ಲಿ ಪ್ರೀತಿಗೆ ಅಪಾರ ಶಕ್ತಿಯಿದೆ ಎಂಬುದನ್ನು ಅನಿರೀಕ್ಷಿತವಾಗಿ ಕಂಡುಕೊಳ್ಳುತ್ತೇವೆ. ಈ ಪ್ರೀತಿ ಯಾವುದೇ ಭಾವನೆಯನ್ನೂ ಬಹಳವಾಗಿ ಮೀರಿದ ಪ್ರೀತಿ. ಅದು ಶುದ್ಧೀಕರಿಸಲ್ಪಟ್ಟ, ದೇವರ ಕೊಡುಗೆಯಾಗಿ ಉಚಿತವಾಗಿ ನೀಡಲ್ಪಟ್ಟ ನಿಜವಾದ ಪ್ರೀತಿ. ಅದು ಅತ್ಯುನ್ನತ ಮಟ್ಟದ ನಿಷ್ಕಾಮ ಪ್ರೀತಿ; ನಮ್ಮನ್ನು ನಿಜವಾದ ಆನಂದದ ಸಮೃದ್ಧಿಯಿಂದ ತುಂಬಿಸುವ ಪ್ರೀತಿ.
ಇಂದು ನಿಮ್ಮ ಅಂತರಂಗದಲ್ಲಿರುವ ಯಾವುದೇ ಗಾಯಗಳ ಕುರಿತು ಚಿಂತಿಸಿರಿ. ಈ ಗಾಯಗಳನ್ನು ರೂಪಾಂತರಿಸಲು ದೇವರಿಗೆ ಅವಕಾಶಕೊಟ್ಟರೆ ಮತ್ತು ನಿಮ್ಮನ್ನು ಕೆಟ್ಟದಾಗಿ ನಡೆಸಿಕೊಂಡ ಪ್ರತಿಯೊಬ್ಬರ ಮೇಲಿನ ಪ್ರೀತಿಯಿಂದ ನಿಮ್ಮ ಹೃದಯವನ್ನು ತುಂಬಲು ದೇವರಿಗೆ ಅವಕಾಶಕೊಟ್ಟರೆ, ಈ ಗಾಯಗಳೇ ನಿಮ್ಮ ಪಾವಿತ್ರ್ಯ ಮತ್ತು ಸಂತೋಷದ ಮೂಲವಾಗಬಲ್ಲವು ಎಂಬುದನ್ನು ಅರಿತುಕೊಳ್ಳಿರಿ.
ಪ್ರಭುವೇ, ನನ್ನ ಶತ್ರುಗಳನ್ನು ಪ್ರೀತಿಸಲು ನಾನು ಕರೆಯಲ್ಪಟ್ಟಿದ್ದೇನೆಂದು ನನಗೆ ತಿಳಿದಿದೆ. ನನ್ನನ್ನು ಕೆಟ್ಟದಾಗಿ ನಡೆಸಿಕೊಂಡ ಎಲ್ಲರನ್ನೂ ಪ್ರೀತಿಸಲು ನಾನು ಕರೆಯಲ್ಪಟ್ಟಿದ್ದೇನೆಂದು ನನಗೆ ತಿಳಿದಿದೆ. ನನ್ನಲ್ಲಿರುವ ಕೋಪ ಅಥವಾ ದ್ವೇಷದ ಯಾವುದೇ ಭಾವನೆಗಳನ್ನು ನಿಮಗೆ ಸಮರ್ಪಿಸಿ, ಆ ಭಾವನೆಗಳ ಬದಲಿಗೆ ನಿಜವಾದ ನಿಷ್ಕಾಮ ಪ್ರೀತಿಯನ್ನು ಹೊಂದಲು ನನಗೆ ಸಹಾಯಮಾಡಿ. ಯೇಸುವೇ, ನಾನು ನಿಮ್ಮಲ್ಲಿ ಭರವಸೆಯಿಡುತ್ತೇನೆ.
Advertisement
ಚಿತ್ರ: ಸಂತ ಜಸ್ಟಿನಾರ ರಕ್ತಸಾಕ್ಷಿ ಮರಣ — ಚಿತ್ರಕಾರ: ಪಾವೊಲೊ ವೆರೊನೇಸೆ
