ಫೆಬ್ರವರಿ 21, 2024
ತಪಸ್ಸುಕಾಲದ ಮೊದಲ ವಾರದ ಬುಧವಾರ
ಇಂದಿನ ವಾಚನಗಳು
ಸಂತ ಪೇತ್ರ ದಾಮಿಯನ್, ಧರ್ಮಾಧ್ಯಕ್ಷ ಮತ್ತು ಧರ್ಮಸಭೆಯ ಪಂಡಿತ—ಐಚ್ಛಿಕ ಸ್ಮರಣೆ
ಜನರು ಇನ್ನೂ ಹೆಚ್ಚಿನ ಸಂಖ್ಯೆಯಲ್ಲಿ ಗುಂಪಾಗಿ ಸೇರುತ್ತಿದ್ದಾಗ, ಯೇಸು ಅವರಿಗೆ, “ಈ ಪೀಳಿಗೆಯು ದುಷ್ಟ ಪೀಳಿಗೆ; ಇದು ಒಂದು ಚಿಹ್ನೆಯನ್ನು ಕೇಳುತ್ತದೆ. ಆದರೆ ಯೋನನ ಚಿಹ್ನೆಯ ಹೊರತು ಬೇರೆ ಯಾವ ಚಿಹ್ನೆಯೂ ಇದಕ್ಕೆ ಕೊಡಲಾಗುವುದಿಲ್ಲ” ಎಂದು ಹೇಳಿದರು. ಲೂಕ 11:29
ಆ ಜನಸಮೂಹದಲ್ಲಿ ವಿವಿಧ ರೀತಿಯ ಜನರಿದ್ದಂತೆ ಕಾಣುತ್ತಿತ್ತು. ಮೊದಲನೆಯದಾಗಿ, ಯೇಸುವಿನಲ್ಲಿ ಪೂರ್ಣಹೃದಯದಿಂದ ವಿಶ್ವಾಸವಿಟ್ಟವರು ಅಲ್ಲಿದ್ದರು. ಉದಾಹರಣೆಗೆ, ಹನ್ನೆರಡು ಮಂದಿ ಅಪೊಸ್ತಲರು ಅವರನ್ನು ಹಿಂಬಾಲಿಸಲು ಎಲ್ಲವನ್ನೂ ಬಿಟ್ಟುಬಿಟ್ಟಿದ್ದರು. ಅವರ ತಾಯಿಯೂ ಇನ್ನೂ ಅನೇಕ ಪವಿತ್ರ ಮಹಿಳೆಯರೂ ಅವರಲ್ಲಿ ವಿಶ್ವಾಸವಿಟ್ಟು, ಅವರ ನಿಷ್ಠಾವಂತ ಅನುಯಾಯಿಗಳಾಗಿದ್ದರು. ಆದರೆ ಬೆಳೆಯುತ್ತಿದ್ದ ಆ ಜನಸಮೂಹದಲ್ಲಿ ಯೇಸುವನ್ನು ಪ್ರಶ್ನಿಸುತ್ತಿದ್ದ ಮತ್ತು ಅವರು ಯಾರೆಂಬುದಕ್ಕೆ ಯಾವುದಾದರೂ ಪುರಾವೆಯನ್ನು ಬಯಸುತ್ತಿದ್ದ ಅನೇಕರು ಇದ್ದಂತೆ ಕಾಣುತ್ತಿತ್ತು. ಹೀಗಾಗಿ, ಅವರು ಸ್ವರ್ಗದಿಂದ ಒಂದು ಚಿಹ್ನೆಯನ್ನು ಬಯಸಿದರು.
ಸ್ವರ್ಗದಿಂದ ಬರುವ ಚಿಹ್ನೆಯು ಯೇಸು ಯಾರೆಂಬುದನ್ನು ಹೊರನೋಟಕ್ಕೆ ಸ್ಪಷ್ಟವಾಗಿ ತೋರಿಸುವ ಪುರಾವೆಯಾಗಿರುತ್ತಿತ್ತು. ಯೇಸು ಆಗಲೇ ಅನೇಕ ಅದ್ಭುತಗಳನ್ನು ಮಾಡಿದ್ದರು ಎಂಬುದು ನಿಜ. ಆದರೆ ಇದು ಸಾಕಾಗಲಿಲ್ಲವೆಂದು ತೋರುತ್ತದೆ. ಅವರಿಗೆ ಇನ್ನೂ ಹೆಚ್ಚಿನದು ಬೇಕಾಗಿತ್ತು—ಆ ಬಯಕೆಯು ಹೃದಯದ ಹಠಮಾರಿತನ ಮತ್ತು ವಿಶ್ವಾಸದ ಕೊರತೆಯ ಸ್ಪಷ್ಟ ಸೂಚನೆಯಾಗಿದೆ. ಆದ್ದರಿಂದ ಯೇಸು ಅವರು ಬಯಸಿದ ಚಿಹ್ನೆಯನ್ನು ಕೊಡಲು ಸಾಧ್ಯವಿರಲಿಲ್ಲ, ಕೊಡಲು ಸಿದ್ಧರೂ ಇರಲಿಲ್ಲ.
ಬದಲಾಗಿ, ಅವರು ಪಡೆಯಲಿರುವ ಏಕೈಕ ಚಿಹ್ನೆ ಯೋನನ ಚಿಹ್ನೆಯೇ ಎಂದು ಯೇಸು ಹೇಳುತ್ತಾರೆ. ಯೋನನ ಚಿಹ್ನೆಯು ಅಷ್ಟೇನೂ ಆಕರ್ಷಕವಾಗಿರಲಿಲ್ಲ ಎಂಬುದನ್ನು ನೆನಪಿಸಿಕೊಳ್ಳಿ. ಅವನನ್ನು ದೋಣಿಯಿಂದ ಹೊರಕ್ಕೆ ಎಸೆಯಲಾಯಿತು ಮತ್ತು ಒಂದು ತಿಮಿಂಗಿಲವು ಅವನನ್ನು ನುಂಗಿತು. ನಿನೆವೆಯ ತೀರದಲ್ಲಿ ಅವನನ್ನು ಉಗುಳುವ ಮೊದಲು ಅವನು ಮೂರು ದಿನಗಳ ಕಾಲ ಅದರ ಹೊಟ್ಟೆಯಲ್ಲಿದ್ದನು.
ಯೇಸುವಿನ ಚಿಹ್ನೆಯೂ ಅದೇ ರೀತಿಯದ್ದಾಗಿರುತ್ತಿತ್ತು. ಅವರು ಧಾರ್ಮಿಕ ಮುಖಂಡರು ಮತ್ತು ನಾಗರಿಕ ಅಧಿಕಾರಿಗಳ ಕೈಯಲ್ಲಿ ಯಾತನೆಯನ್ನು ಅನುಭವಿಸಿ, ಕೊಲ್ಲಲ್ಪಟ್ಟು, ಸಮಾಧಿಯಲ್ಲಿ ಇಡಲ್ಪಡುತ್ತಿದ್ದರು. ಅನಂತರ, ಮೂರು ದಿನಗಳ ಬಳಿಕ, ಅವರು ಪುನರುತ್ಥಾನರಾಗುತ್ತಿದ್ದರು. ಆದರೆ ಅವರ ಪುನರುತ್ಥಾನವು ಎಲ್ಲರೂ ನೋಡುವಂತೆ ಅವರು ಬೆಳಕಿನ ಕಿರಣಗಳೊಂದಿಗೆ ಹೊರಬಂದ ಘಟನೆಯಾಗಿರಲಿಲ್ಲ; ಬದಲಾಗಿ, ಪುನರುತ್ಥಾನದ ಬಳಿಕ ಅವರು ಕಾಣಿಸಿಕೊಂಡದ್ದು ಆಗಲೇ ವಿಶ್ವಾಸವನ್ನು ವ್ಯಕ್ತಪಡಿಸಿದ್ದ ಮತ್ತು ಆಗಲೇ ನಂಬಿದ್ದವರಿಗೆ.
ನಮಗಿರುವ ಪಾಠವೇನೆಂದರೆ, ದೇವರು ತಮ್ಮ ಮಹಿಮೆಯನ್ನು ಹಾಲಿವುಡ್‌ ಚಲನಚಿತ್ರಗಳಲ್ಲಿರುವಂತೆ ಪ್ರಬಲವಾಗಿ, ಸಾರ್ವಜನಿಕವಾಗಿ ಪ್ರದರ್ಶಿಸುವ ಮೂಲಕ ವಿಶ್ವಾಸದ ವಿಷಯಗಳನ್ನು ನಮಗೆ ಮನದಟ್ಟು ಮಾಡುವುದಿಲ್ಲ. ಬದಲಾಗಿ, ನಮಗೆ ನೀಡಲಾಗಿರುವ “ಚಿಹ್ನೆ” ಕ್ರಿಸ್ತನೊಂದಿಗೆ ಸಾಯುವ ಆಹ್ವಾನವಾಗಿದೆ; ಹೀಗೆ ನಾವು ವೈಯಕ್ತಿಕವಾಗಿ ಪುನರುತ್ಥಾನದ ಹೊಸ ಜೀವನವನ್ನು ಅನುಭವಿಸಲು ಆರಂಭಿಸಬಹುದು. ವಿಶ್ವಾಸದ ಈ ಕೊಡುಗೆಯು ಆಂತರಿಕವಾದದ್ದು, ಹೊರಗೆ ಸಾರ್ವಜನಿಕವಾಗಿ ಕಾಣುವಂಥದ್ದಲ್ಲ. ಪಾಪಕ್ಕೆ ಸಾಯುವುದು ನಾವು ವೈಯಕ್ತಿಕವಾಗಿ ಮತ್ತು ಆಂತರಿಕವಾಗಿ ಮಾಡುವಂಥದ್ದು; ನಾವು ಪಡೆಯುವ ಹೊಸ ಜೀವನವನ್ನು ಇತರರು ಕಾಣಲು ಸಾಧ್ಯವಾಗುವುದು ಬದಲಾದ ನಮ್ಮ ಜೀವನದ ಸಾಕ್ಷ್ಯದ ಮೂಲಕ ಮಾತ್ರ.
ದೇವರು ನಿಮಗೆ ನೀಡಿರುವ ನಿಜವಾದ ಚಿಹ್ನೆಯನ್ನು ಕುರಿತು ಇಂದು ಚಿಂತಿಸಿ. ನಮ್ಮ ಪ್ರಭುವಿನಿಂದ ಯಾವುದಾದರೂ ಸ್ಪಷ್ಟವಾದ ಚಿಹ್ನೆಗಾಗಿ ನೀವು ಕಾಯುತ್ತಿರುವಂತಿದ್ದರೆ, ಇನ್ನು ಕಾಯಬೇಡಿ. ಶಿಲುಬೆಯ ಮೇಲಿರುವ ಯೇಸುವಿನ ಪ್ರತಿಮೆಯನ್ನು ನೋಡಿ, ಅವರ ಯಾತನೆ ಮತ್ತು ಮರಣವನ್ನು ಗಮನಿಸಿ, ಎಲ್ಲ ಪಾಪ ಮತ್ತು ಸ್ವಾರ್ಥಕ್ಕೆ ಸಾಯುವ ಮೂಲಕ ಅವರನ್ನು ಹಿಂಬಾಲಿಸಲು ನಿರ್ಧರಿಸಿ. ಅವರೊಂದಿಗೆ ಸಾಯಿರಿ, ಅವರೊಂದಿಗೆ ಸಮಾಧಿಯನ್ನು ಪ್ರವೇಶಿಸಿ ಮತ್ತು ಈ ತಪಸ್ಸುಕಾಲದಲ್ಲಿ ಅವರು ನಿಮ್ಮನ್ನು ಆಂತರಿಕವಾಗಿ ನವೀಕರಿಸಿ ಹೊರತರಲು ಅವಕಾಶ ನೀಡಿ; ಹೀಗೆ ಸ್ವರ್ಗದಿಂದ ಬಂದ ಈ ಏಕೈಕ ಚಿಹ್ನೆಯಿಂದ ನೀವು ರೂಪಾಂತರಗೊಳ್ಳಬಹುದು.
ಶಿಲುಬೆಗೇರಿಸಲ್ಪಟ್ಟ ನನ್ನ ಪ್ರಭುವೇ, ಶಿಲುಬೆಯ ಮೇಲಿರುವ ನಿಮ್ಮ ಪ್ರತಿಮೆಯನ್ನು ನಾನು ದಿಟ್ಟಿಸಿ ನೋಡುತ್ತೇನೆ ಮತ್ತು ನಿಮ್ಮ ಮರಣದಲ್ಲಿ ಹಿಂದೆಂದೂ ಕಂಡರಿಯದ ಅತ್ಯಂತ ಮಹಾನ್ ಪ್ರೀತಿಯ ಕಾರ್ಯವನ್ನು ಕಾಣುತ್ತೇನೆ. ನಿಮ್ಮ ಮರಣವು ನನ್ನ ಪಾಪಗಳ ಮೇಲೆ ಜಯ ಸಾಧಿಸುವಂತೆ, ಸಮಾಧಿಯವರೆಗೂ ನಿಮ್ಮನ್ನು ಹಿಂಬಾಲಿಸಲು ನನಗೆ ಅಗತ್ಯವಾದ ಅನುಗ್ರಹವನ್ನು ದಯಪಾಲಿಸಿ. ಪ್ರಿಯ ಪ್ರಭುವೇ, ತಪಸ್ಸುಕಾಲದ ಈ ಪಯಣದಲ್ಲಿ ನನ್ನನ್ನು ಮುಕ್ತಗೊಳಿಸಿ; ಆಗ ನಾನು ನಿಮ್ಮ ಪುನರುತ್ಥಾನದ ಹೊಸ ಜೀವನದಲ್ಲಿ ಪೂರ್ಣವಾಗಿ ಪಾಲುಗೊಳ್ಳಲು ಸಾಧ್ಯವಾಗುತ್ತದೆ. ಯೇಸುವೇ, ನಾನು ನಿಮ್ಮಲ್ಲಿ ಭರವಸೆಯಿಡುತ್ತೇನೆ.
ಏಳನೆಯ ದಿನದ ಧ್ಯಾನಗಳು:
ಮರುಭೂಮಿಯಲ್ಲಿ 40 ದಿನಗಳು & ಶಿಲುಬೆಯ ಬಳಿಯಲ್ಲಿ 40 ದಿನಗಳು
ತಪಸ್ಸುಕಾಲಕ್ಕಾಗಿ ಪವಿತ್ರ ಗ್ರಂಥದ ಧ್ಯಾನಗಳು
ಇಂದಿನ ಸಂತರು – ಸಂತ ಪೇತ್ರ ದಾಮಿಯನ್, ಧರ್ಮಾಧ್ಯಕ್ಷ ಮತ್ತು ಧರ್ಮಸಭೆಯ ಪಂಡಿತ
