ಎಲ್ಲ ಮೃತ ಆತ್ಮಗಳ ಸ್ಮರಣೆ

ಶನಿವಾರ, ನವೆಂಬರ್ 2, 2024

ಮೃತರಾದ ಎಲ್ಲ ವಿಶ್ವಾಸಿಗಳ ಸ್ಮರಣೆ (ಸಕಲ ಮೃತರ ದಿನ)

ಲುಕಾ ಜಿಯೋರ್ಡಾನೊ, ಸಾರ್ವಜನಿಕ ಸ್ವಾಮ್ಯ, Wikimedia Commons ಮೂಲಕ

“ಮಗನನ್ನು ನೋಡಿ ಆತನಲ್ಲಿ ವಿಶ್ವಾಸವಿಡುವ ಪ್ರತಿಯೊಬ್ಬನಿಗೂ ನಿತ್ಯಜೀವ ದೊರಕಬೇಕೆಂಬುದೇ ನನ್ನ ತಂದೆಯ ಚಿತ್ತ; ಮತ್ತು ನಾನು ಅವನನ್ನು ಅಂತಿಮ ದಿನದಂದು ಎಬ್ಬಿಸುವೆನು.” ಯೋಹಾನ 6:40

ನಿನ್ನೆಯ ಸಕಲ ಸಂತರ ಮಹೋತ್ಸವವು, ನಮಗಿಂತ ಮೊದಲು ಈ ಲೋಕವನ್ನು ಬಿಟ್ಟುಹೋದ ಅಸಂಖ್ಯಾತ ಜನರು ಈಗ ಸ್ವರ್ಗದ ಮಹಿಮೆಯನ್ನು ಆನಂದಿಸುತ್ತಿದ್ದಾರೆ ಎಂಬ ಸತ್ಯವನ್ನು ಆಚರಿಸಿ ಹರ್ಷಿಸಲು ನಮಗೆ ಅವಕಾಶ ನೀಡಿತು. ಈ ನಂಬಿಗಸ್ತ ಆತ್ಮಗಳು ದೇವರ ಅನುಗ್ರಹದಲ್ಲಿ ನೆಲೆಗೊಂಡ ಜೀವನವನ್ನು ನಡೆಸಿದರು ಮತ್ತು ಎಲ್ಲ ಪಾಪಗಳಿಂದ ಸಂಪೂರ್ಣವಾಗಿ ಶುದ್ಧೀಕರಿಸಲ್ಪಟ್ಟಿದ್ದಾರೆ. ಈಗ ಅವರು ನಮ್ಮ ಒಳ್ಳೆಯ ದೇವರನ್ನು ಮುಖಾಮುಖಿಯಾಗಿ ನೋಡುತ್ತಿದ್ದಾರೆ.

ಅನುಗ್ರಹದ ಸ್ಥಿತಿಯಲ್ಲಿ ಮರಣಹೊಂದುವ ಅನೇಕರಿಗೆ, ದೇವರ ಮಹಿಮಾಮಯ ಸಿಂಹಾಸನದ ಮುಂದೆ ನಿಂತು ಅವರನ್ನು ಮುಖಾಮುಖಿಯಾಗಿ ಕಾಣಲು ತಕ್ಷಣವೇ ಸಿದ್ಧತೆ ಇರುವುದಿಲ್ಲ ಎಂಬ ಸತ್ಯವನ್ನು ಇಂದು ನಾವು ಸ್ಮರಿಸುತ್ತೇವೆ. ನಮ್ಮ ಆತ್ಮಗಳಿಂದ ಪ್ರತಿಯೊಂದು ಪಾಪವೂ ಪಾಪದ ಪ್ರತಿಯೊಂದು ವ್ಯಾಮೋಹವೂ ನಿವಾರಣೆಯಾದಾಗ ಮಾತ್ರ ಇದು ಸಾಧ್ಯ. ನಾವು ಸ್ವರ್ಗದ ನಿತ್ಯ ಮಹಿಮೆಯನ್ನು ಪ್ರವೇಶಿಸಬೇಕಾದರೆ, ನಮ್ಮೊಳಗೆ ಶುದ್ಧ ಪ್ರೀತಿಯ ಹೊರತು ಬೇರೇನೂ ಜೀವಂತವಾಗಿರಬಾರದು. ಆದರೆ ಎಷ್ಟು ಜನರು ಇಂಥ ಸ್ಥಿತಿಯಲ್ಲಿ ಮರಣಹೊಂದುತ್ತಾರೆ?

ಒಬ್ಬ ವ್ಯಕ್ತಿಯು ಕಡಿಮೆ ಗಂಭೀರವಾದ ಪಾಪದ ವ್ಯಾಮೋಹ ಇನ್ನೂ ಉಳಿದಿರುವಾಗ ಈ ಲೋಕದಿಂದ ಪರಲೋಕಕ್ಕೆ ತೆರಳಿದರೆ, ಸ್ವರ್ಗವನ್ನು ಪ್ರವೇಶಿಸಲು ಅವರು ಸಂಪೂರ್ಣವಾಗಿ ಶುದ್ಧೀಕರಿಸಲ್ಪಡಬೇಕು ಎಂದು ಧರ್ಮಸಭೆಯು ತನ್ನ ಜ್ಞಾನ ಮತ್ತು ಪವಿತ್ರತೆಯಲ್ಲಿ ಶತಮಾನಗಳಿಂದ ಸ್ಪಷ್ಟವಾಗಿ ಬೋಧಿಸುತ್ತಾ ಬಂದಿದೆ. ಇದೇ ಶುದ್ಧಿಸ್ಥಳ. ಕಥೋಲಿಕ ಧರ್ಮಸಭೆಯ ಧರ್ಮೋಪದೇಶ ಗ್ರಂಥವು ಹೀಗೆ ಹೇಳುತ್ತದೆ: “ದೇವರ ಅನುಗ್ರಹ ಮತ್ತು ಸ್ನೇಹದಲ್ಲಿ ಮರಣಹೊಂದಿದರೂ, ಇನ್ನೂ ಸಂಪೂರ್ಣವಾಗಿ ಶುದ್ಧೀಕರಿಸಲ್ಪಡದ ಎಲ್ಲರಿಗೂ ನಿತ್ಯ ರಕ್ಷಣೆ ನಿಶ್ಚಿತವಾಗಿಯೂ ಖಚಿತವಾಗಿದೆ; ಆದರೆ ಸ್ವರ್ಗದ ಆನಂದವನ್ನು ಪ್ರವೇಶಿಸಲು ಅಗತ್ಯವಾದ ಪವಿತ್ರತೆಯನ್ನು ಪಡೆಯುವುದಕ್ಕಾಗಿ ಅವರು ಮರಣಾನಂತರ ಶುದ್ಧೀಕರಣಕ್ಕೆ ಒಳಗಾಗುತ್ತಾರೆ. ಆಯ್ಕೆಯಾದವರ ಈ ಅಂತಿಮ ಶುದ್ಧೀಕರಣಕ್ಕೆ ಧರ್ಮಸಭೆಯು ಶುದ್ಧಿಸ್ಥಳ ಎಂಬ ಹೆಸರನ್ನು ನೀಡುತ್ತದೆ; ಇದು ಶಾಶ್ವತ ದಂಡನೆಗೆ ಗುರಿಯಾದವರ ಶಿಕ್ಷೆಯಿಂದ ಸಂಪೂರ್ಣವಾಗಿ ಭಿನ್ನವಾಗಿದೆ” (#1030–31a).

ಕೆಲವರಿಗೆ ಶುದ್ಧಿಸ್ಥಳದ ವಿಚಾರವು ಭಯ ಹುಟ್ಟಿಸುವ ಮತ್ತು ಗೊಂದಲ ಉಂಟುಮಾಡುವ ವಿಚಾರವಾಗಿರಬಹುದು. ದೇವರು ತಮ್ಮ ಅಪರಿಮಿತ ಕರುಣೆಯಲ್ಲಿ, ತಮ್ಮನ್ನು ಅನುಸರಿಸಿದ ನಮ್ಮ ಪ್ರೀತಿಪಾತ್ರರೆಲ್ಲರನ್ನೂ ನೇರವಾಗಿ ಸ್ವರ್ಗಕ್ಕೆ ಏಕೆ ಕರೆದೊಯ್ಯುವುದಿಲ್ಲ? ಉತ್ತರ ಸರಳವಾಗಿದೆ. ಅವರು ಕರೆದೊಯ್ಯುತ್ತಾರೆ! ಸ್ವರ್ಗಕ್ಕೆ ಅವರ ಮಾರ್ಗವು, ಅವರ ಅಂತಿಮ ಶುದ್ಧೀಕರಣವೆಂಬ ಈ ಅದ್ಭುತ ಕರುಣೆಯೇ ಆಗಿದೆ.

ನಮ್ಮ ಆತ್ಮದಲ್ಲಿರುವ ಪಾಪದ ಎಲ್ಲ ವ್ಯಾಮೋಹಗಳಿಂದ ಶುದ್ಧೀಕರಿಸಲ್ಪಡುವುದು, ನಮ್ಮ ಕಲ್ಪನೆಗೂ ಮೀರಿದ ಕರುಣೆಯಾಗಿದೆ. ಈ ಅಂತಿಮ ಶುದ್ಧೀಕರಣದ ಮೂಲಕ, ಮರಣಹೊಂದಿದ ಪವಿತ್ರ ಆತ್ಮಗಳನ್ನು ದೇವರು ನಿತ್ಯ ಆನಂದಕ್ಕಾಗಿ ಸಿದ್ಧಪಡಿಸುತ್ತಾರೆ. ಆದರೆ ಈ ಶುದ್ಧೀಕರಣ ಅಗತ್ಯವಾಗಿದೆ; ಏಕೆಂದರೆ ದೇವರು ತಮ್ಮ ಪ್ರೀತಿಯಲ್ಲಿ, ಯಾವ ಆತ್ಮವೂ ಪಾಪದ ಅಲ್ಪ ವ್ಯಾಮೋಹವನ್ನಾದರೂ ಹೊಂದಿಕೊಂಡು ನಿತ್ಯವಾಗಿ ಜೀವಿಸುವುದನ್ನು ಬಯಸುವುದಿಲ್ಲ. ನಾವೆಲ್ಲರೂ ಸ್ವತಂತ್ರರಾಗಿರಬೇಕೆಂದು ದೇವರು ಬಯಸುತ್ತಾರೆ. ನಮ್ಮ ಆತ್ಮದ ಮೇಲಿರುವ ಪ್ರತಿಯೊಂದು ಪಾಪವೂ, ಅತಿ ಚಿಕ್ಕ ಪಾಪವೂ ಸಹ, ನಮ್ಮನ್ನು ಸ್ವರ್ಗದಿಂದ ಹೊರಗಿಡಲು ಸಾಕಾದ ಕಾರಣವಾಗಿದೆ ಎಂಬುದು ಸತ್ಯ. ಆದ್ದರಿಂದ ಶುದ್ಧಿಸ್ಥಳವನ್ನು ದೇವರಿಂದ ದೊರೆಯುವ ಅಂತಿಮ ಕರುಣೆಯಾಗಿ ಕಾಣಬೇಕು. ಅದರ ಮೂಲಕ ಅವರು ಪರಿಪೂರ್ಣ ಪ್ರೀತಿಗೆ ನಮ್ಮನ್ನು ತಡೆಯುವ ಕೊನೆಯ ಹೊರೆಯನ್ನೂ ತೆಗೆದುಹಾಕುತ್ತಾರೆ; ಹೀಗೆ ನಮ್ಮ ನಿತ್ಯ ಜೀವನವು ಅತ್ಯುನ್ನತ ಸ್ವಾತಂತ್ರ್ಯ ಮತ್ತು ಪರಮಾನಂದದಿಂದ ಕೂಡಿರುತ್ತದೆ. ನಾವು ಸದಾಕಾಲ ಪ್ರೀತಿಯ ಪರಿಶುದ್ಧತೆಯಿಂದ ಮಾತ್ರ ತುಂಬಿರಬೇಕೆಂದು ದೇವರು ಬಯಸುತ್ತಾರೆ. ಹೀಗಾಗಿ, ನಮ್ಮ ಮರಣದ ಸಂದರ್ಭದಲ್ಲಿ, ಪ್ರತಿಯೊಂದು ಲಘುಪಾಪದ ಅಂತಿಮ ಮತ್ತು ತೀವ್ರ ಶುದ್ಧೀಕರಣವನ್ನು ಪ್ರವೇಶಿಸುವ ಅನುಗ್ರಹವು ನಮಗೆ ದೊರೆಯುತ್ತದೆ. ಆಗ ನಾವು ದೇವರನ್ನು ಅವರ ಸಕಲ ಮಹಿಮೆಯಲ್ಲಿ ಕಾಣುವಾಗ, ನಾವು ಯಾವ ಪರಿಪೂರ್ಣತೆಗೆ ಕರೆಯಲ್ಪಟ್ಟಿದ್ದೇವೆಯೋ ಆ ಪರಿಪೂರ್ಣತೆಯೊಂದಿಗೆ ಅವರನ್ನು ಕಾಣುತ್ತೇವೆ. ಶುದ್ಧಿಸ್ಥಳವು ಒಂದು ಕೊಡುಗೆ, ಒಂದು ಅನುಗ್ರಹ, ಒಂದು ಕರುಣೆ. ಯಾವುದೇ ಪಾಪವನ್ನು ಜಯಿಸುವುದು ನೋವುಂಟುಮಾಡುವಂತೆ, ಈ ಶುದ್ಧೀಕರಣಕ್ಕೆ ಒಳಗಾಗುವುದೂ ನೋವುಂಟುಮಾಡುತ್ತದೆ. ಆದರೆ ಪಾಪದಿಂದ ಮುಕ್ತಿ ಎಂಬ ಉತ್ತಮ ಫಲವು, ನಾವು ಸಹಿಸಬೇಕಾದ ಪ್ರತಿಯೊಂದು ಅಂತಿಮ ಶುದ್ಧೀಕರಣವನ್ನೂ ನೂರರಷ್ಟು ಮತ್ತು ಅದಕ್ಕಿಂತಲೂ ಹೆಚ್ಚು ಸಾರ್ಥಕಗೊಳಿಸುತ್ತದೆ.

ನೀವು ಸಂತರಾಗಬೇಕೆಂದು ದೇವರು ಬಯಸುತ್ತಾರೆ ಎಂಬ ಆಧ್ಯಾತ್ಮಿಕ ಸತ್ಯವನ್ನು ಇಂದು ಧ್ಯಾನಿಸಿ. ಪ್ರತಿಯೊಂದು ಪಾಪದಿಂದಲೂ ಶುದ್ಧೀಕರಿಸಲ್ಪಟ್ಟ ಸ್ಥಿತಿಯಲ್ಲಿ ಮರಣಹೊಂದುವ ಕೆಲವೇ ಜನರಲ್ಲಿ ನೀವು ಒಬ್ಬರಾಗಿದ್ದರೆ, ಭೂಮಿಯ ಮೇಲೆಯೇ ನಿಮ್ಮ ಶುದ್ಧಿಸ್ಥಳದ ಶುದ್ಧೀಕರಣವನ್ನು ಈಗಾಗಲೇ ಪೂರ್ಣಗೊಳಿಸಿದ್ದೀರಿ ಎಂಬ ಭರವಸೆ ಹೊಂದಿರಿ. ಆದರೆ ಮರಣದ ಸಮಯದಲ್ಲಿ ಪಾಪದ ಅಲ್ಪ ವ್ಯಾಮೋಹವನ್ನು ಇನ್ನೂ ಉಳಿಸಿಕೊಂಡಿರುವ ಅನೇಕರಲ್ಲಿ ನೀವಾಗಲಿ ನಿಮ್ಮ ಪ್ರೀತಿಪಾತ್ರರಾಗಲಿ ಸೇರಿದ್ದರೆ, ನಿಮ್ಮಲ್ಲಿ ದೇವರ ಕಾರ್ಯವು ಇನ್ನೂ ಮುಗಿದಿಲ್ಲವೆಂದು ಹರ್ಷಿಸಿರಿ. ನಿಮಗಾಗಿ ಕಾಯುತ್ತಿರುವ ಅಂತಿಮ ಶುದ್ಧೀಕರಣವನ್ನು ಅಪಾರ ಕೃತಜ್ಞತೆಯಿಂದ ನಿರೀಕ್ಷಿಸಿರಿ ಮತ್ತು ಆ ಶುದ್ಧೀಕರಣದಿಂದ ಅಂತಿಮವಾಗಿ ದೊರೆಯುವ ಸ್ವಾತಂತ್ರ್ಯವನ್ನು ಎದುರುನೋಡಿರಿ.

ನನ್ನ ಕರುಣಾಮಯ ಪ್ರಭುವೇ, ನನ್ನ ಆತ್ಮವೂ ನಿಮ್ಮ ಎಲ್ಲ ವಿಶ್ವಾಸಿಗಳ ಆತ್ಮಗಳೂ ಪ್ರತಿಯೊಂದು ಪಾಪದಿಂದ, ಅತಿ ಚಿಕ್ಕ ಅಪೂರ್ಣತೆಯಿಂದಲೂ ಶುದ್ಧೀಕರಿಸಲ್ಪಡಬೇಕೆಂದು ನೀವು ಬಯಸುತ್ತೀರಿ. ಶುದ್ಧಿಸ್ಥಳದ ಕರುಣೆಗಾಗಿ ನಾನು ನಿಮಗೆ ಕೃತಜ್ಞತೆ ಸಲ್ಲಿಸುತ್ತೇನೆ ಮತ್ತು ಇಲ್ಲಿಯೇ, ಈಗಲೇ ಆ ಶುದ್ಧೀಕರಣಕ್ಕಾಗಿ ನಿರಂತರವಾಗಿ ಶ್ರಮಿಸುವಂತೆ ಪ್ರಾರ್ಥಿಸುತ್ತೇನೆ. ನನಗಿಂತ ಮೊದಲು ಈ ಲೋಕವನ್ನು ಬಿಟ್ಟುಹೋಗಿರುವ ಮತ್ತು ಈ ಶುದ್ಧೀಕರಿಸುವ ಅಗ್ನಿಯ ಅಗತ್ಯ ಇನ್ನೂ ಇರುವ ಎಲ್ಲರಿಗಾಗಿಯೂ ನಾನು ಪ್ರಾರ್ಥಿಸುತ್ತೇನೆ. ಅವರು ಸ್ವರ್ಗದ ಸಂತರ ನಡುವೆ ಎಣಿಸಲ್ಪಡುವಂತೆ ಅವರ ಮೇಲೆ ನಿಮ್ಮ ಕರುಣೆಯನ್ನು ಸುರಿಸಿರಿ. ಯೇಸುವೇ, ನಾನು ನಿಮ್ಮಲ್ಲಿ ಭರವಸೆಯಿಡುತ್ತೇನೆ.