ദൃഢനിശ്ചയത്തോടെ നിലകൊള്ളുക

2020 മേയ് 25
ഉയിർപ്പുകാലം ഏഴാം വാരത്തിലെ തിങ്കളാഴ്ച
ഇന്നത്തെ വായനകൾ

“അങ്ങ് എല്ലാം അറിയുന്നുവെന്നും ആരും അങ്ങയോട് ചോദിക്കേണ്ട ആവശ്യമില്ലെന്നും ഇപ്പോൾ ഞങ്ങൾ മനസ്സിലാക്കുന്നു. അതിനാൽ, അങ്ങ് ദൈവത്തിൽനിന്നു വന്നതാണെന്നു ഞങ്ങൾ വിശ്വസിക്കുന്നു.” യേശു അവരോട് ഉത്തരം പറഞ്ഞു: “നിങ്ങൾ ഇപ്പോൾ വിശ്വസിക്കുന്നുവോ? ഇതാ, നിങ്ങൾ ഓരോരുത്തരും സ്വന്തം ഭവനത്തിലേക്കു ചിതറിപ്പോകുകയും എന്നെ തനിച്ചാക്കുകയും ചെയ്യുന്ന സമയം വരുന്നു; അതു വന്നുകഴിഞ്ഞു.” യോഹന്നാൻ 16:30–32

നിങ്ങൾ യേശുവിൽ വിശ്വസിക്കാൻ തുടങ്ങിയിട്ടുണ്ടോ? ആ വിശ്വാസം എത്ര ആഴമുള്ളതാണ്? എന്തുകൊണ്ടാണ് നിങ്ങൾ വിശ്വസിക്കുന്നത്? എന്തുതന്നെ നേരിട്ടാലും ആ വിശ്വാസത്തിൽ ഉറച്ചുനിൽക്കാൻ നിങ്ങൾ ഒരുക്കവും സന്നദ്ധതയും ഉള്ളവരാണോ? അവിടുത്തെ അനുഗമിക്കുന്നത് പ്രയാസകരവും മറ്റുള്ളവരുടെ അംഗീകാരം ലഭിക്കാത്തതുമായിരുന്നാലും അതിനു നിങ്ങൾ തയ്യാറാണോ? നിങ്ങളുടെ വിശ്വാസത്തിന്റെ പേരിൽ സഹിക്കാൻ നിങ്ങൾ തയ്യാറാണോ? ഇവ പ്രധാനപ്പെട്ട ചോദ്യങ്ങളാണ്. ഒരു ക്രൈസ്തവനായി ജീവിക്കുന്നത് എളുപ്പമായിരിക്കുമ്പോഴും പ്രയാസമായിരിക്കുമ്പോഴും നാം ഉത്തരം നൽകേണ്ട ചോദ്യങ്ങളാണിവ.

മറ്റെല്ലാവരും അങ്ങനെ ചെയ്യുമ്പോൾ ഒരു ക്രൈസ്തവനായിരിക്കാനും യേശുവിനെ അനുഗമിക്കാനും എളുപ്പമാണ്. ഉദാഹരണത്തിന്, ഒരു മാമ്മോദീസയിലോ വിവാഹത്തിലോ പങ്കെടുക്കുമ്പോൾ, അതിന്റെ ഭാഗമായിരിക്കാനും അവർ ചെയ്യുന്ന കാര്യത്തോടുള്ള നമ്മുടെ പിന്തുണയും വിശ്വാസവും മറ്റുള്ളവരെ അറിയിക്കാനും ആഗ്രഹിക്കുന്നത് സ്വാഭാവികമാണ്. എന്നാൽ നിങ്ങളുടെ വിശ്വാസം പരിഹസിക്കപ്പെടുകയോ ഇകഴ്ത്തപ്പെടുകയോ ചെയ്യുന്ന നിമിഷങ്ങളിലോ? അല്ലെങ്കിൽ, ചുറ്റുമുള്ള സംസ്കാരത്തിന്റെ സമ്മർദങ്ങൾക്ക് വഴങ്ങാതെ വിശ്വാസത്തിനുവേണ്ടി വേറിട്ടുനിൽക്കാനുള്ള പ്രയാസകരമായ തീരുമാനം എടുക്കേണ്ടിവരുമ്പോഴോ? ക്രിസ്തുവിന്റെ അനുയായിയായിരിക്കുക കൂടുതൽ വെല്ലുവിളി നിറഞ്ഞതാകുന്നത് ഇത്തരം സമയങ്ങളിലാണ്.

ഇന്നത്തെ സുവിശേഷത്തിൽ, യേശുവിന്റെ പ്രബോധനം വിശകലനം ചെയ്യുകയും അവിടുത്തെ ശ്രവിക്കുകയും അവിടുത്തെക്കുറിച്ച് സംസാരിക്കുകയും ചെയ്തിരുന്ന അനേകരുണ്ടായിരുന്നു. യേശു വിശുദ്ധനായ ഒരു മനുഷ്യനും വലിയൊരു പ്രവാചകനുമാണെന്നതായിരുന്നു പൊതുവായ ധാരണയെന്നു വ്യക്തമായി തോന്നുന്നു. അവിടുന്ന് മിശിഹായാണെന്നു വിശ്വസിക്കാൻപോലും പലരും തുടങ്ങിയിരുന്നു. അതിനാൽ, അനുകൂലമായ ഒരുതരം മുന്നേറ്റം അവിടെ ഉണ്ടായിരുന്നു; തങ്ങൾ അവിടുത്തെ വിശ്വസിക്കുന്നുവെന്നും അവിടുന്ന് ദൈവത്തിൽനിന്നു വന്നതാണെന്നു വിശ്വസിക്കുന്നുവെന്നും പറയാൻ അത് അനേകർക്കും എളുപ്പമാക്കി.

അവർ ഇപ്പോൾ വിശ്വസിക്കുന്നുണ്ടെങ്കിലും, ഏറെക്കുറെ എല്ലാവരും അവിടുത്തെ ഉപേക്ഷിക്കുന്ന ഒരു സമയം ഉടൻ വരുമെന്നും, അവർ ചിതറിപ്പോയി അവിടുത്തെ തനിച്ചാക്കുമെന്നും യേശു ഉടൻതന്നെ അവരോടു ചൂണ്ടിക്കാട്ടുന്നു. ഇത് അവിടുന്ന് നേരിടാനിരിക്കുന്ന പീഡനത്തെയും കുരിശുമരണത്തെയും കുറിച്ചുള്ള പ്രവചനമാണെന്നതു വ്യക്തമാണ്.

ക്രിസ്തുവിനെ അനുഗമിക്കുന്നതിന് അത്രയൊന്നും പൊതുസ്വീകാര്യതയില്ലാത്തപ്പോൾ നാം എത്രത്തോളം വിശ്വസ്തരായി നിലകൊള്ളുന്നു എന്നു പരിശോധിക്കുന്നത് നമ്മുടെ വിശ്വാസത്തിന്റെ ഏറ്റവും വലിയ പരീക്ഷണങ്ങളിലൊന്നാണ്. എളുപ്പമുള്ള നിമിഷങ്ങളെക്കാൾ ഇത്തരം നിമിഷങ്ങളിലാണ് നമ്മുടെ വിശ്വാസം പ്രകടമാക്കാനും ഒരു ക്രൈസ്തവനായി ജീവിക്കാനുള്ള നമ്മുടെ ദൃഢനിശ്ചയം കൂടുതൽ ആഴപ്പെടുത്താനും നമുക്ക് അവസരം ലഭിക്കുന്നത്.

ക്രിസ്തുവിനോടുള്ള നിങ്ങളുടെ സമർപ്പണം എത്ര ആഴമുള്ളതാണെന്ന് ഇന്ന് ധ്യാനിക്കുക. കുരിശുവരെ അവിടുത്തെ അനുഗമിക്കാൻ നിങ്ങൾ തയ്യാറാണോ? അവിടുത്തെ അനുഗമിക്കാൻ എല്ലാം ഉപേക്ഷിക്കാൻ നിങ്ങൾ സന്നദ്ധരാണോ? ഉറച്ച ഒരു ‘അതെ’ ആയിരിക്കട്ടെ നിങ്ങളുടെ മറുപടി. ജീവിതത്തിൽ നാം ഏതു സാഹചര്യത്തിലായിരുന്നാലും നമ്മുടെ ജീവിതത്തെ നയിക്കുന്ന ഒരു ‘അതെ’ ആയിരിക്കണം അത്.

കർത്താവേ, ഞാൻ വിശ്വസിക്കുന്നു. അങ്ങയിലുള്ള ആ വിശ്വാസം എല്ലായ്പ്പോഴും ദൃഢമായി നിലനിർത്താൻ എന്നെ സഹായിക്കണമേ. അങ്ങയോട് ‘അതെ’ എന്നു പറയാനും ആ സമ്മതത്തിനനുസരിച്ച് എപ്പോഴും ജീവിക്കാനും എന്നെ സഹായിക്കണമേ. യേശുവേ, ഞാൻ അങ്ങയിൽ ശരണപ്പെടുന്നു.

പരിശുദ്ധാത്മാവിനോടുള്ള നൊവേന
പെന്തക്കുസ്തായ്ക്കുള്ള ഒരുക്കമായി ചൊല്ലുന്നത്
നാലാം ദിവസം – മേയ് 25, തിങ്കളാഴ്ച

കൂടുതൽ സുവിശേഷ വിചിന്തനങ്ങൾ

ദൈവകരുണയെക്കുറിച്ചുള്ള വിചിന്തനങ്ങൾ

എല്ലാ വിശുദ്ധരും/തിരുനാളുകളും

ഇന്നത്തെ വിശുദ്ധർ

വന്ദ്യനായ വിശുദ്ധ ബീഡ്, പുരോഹിതനും വേദപാരംഗതനും

വിശുദ്ധ ഗ്രിഗറി ഏഴാമൻ, മാർപാപ്പയും സന്ന്യാസിയും

വിശുദ്ധ മരിയ മഗ്ദലേന ദെ പാസ്സി, കന്യക

വിശുദ്ധ കുർബാനയിലെ വായനകൾക്കുള്ള തിരഞ്ഞെടുപ്പുകൾ

ചിത്രം: ജെയിംസ് ടിസ്സോട്ട് വരച്ച ‘ഭണ്ഡാരത്തിനരികിൽ സംസാരിക്കുന്ന യേശു’

ഈ പേജ് പങ്കിടുക:

പങ്കിടാനുള്ള മാർഗങ്ങൾക്കായി ക്ലിക്ക് ചെയ്യുക