മാർച്ച് 4, 2021
നോമ്പുകാലം രണ്ടാം വാരത്തിലെ വ്യാഴാഴ്ച
ഇന്നത്തെ വായനകൾ
വിശുദ്ധ കാസിമിർ—ഐച്ഛിക അനുസ്മരണം
വീഡിയോ
യേശു ഫരിസേയരോടു പറഞ്ഞു: “ധൂമ്രവസ്ത്രവും നേർത്ത ചണവസ്ത്രവും ധരിച്ച് ദിവസവും സമൃദ്ധമായി വിരുന്നുണ്ണിയിരുന്ന ഒരു ധനികനുണ്ടായിരുന്നു. അവന്റെ പടിവാതിൽക്കൽ ലാസർ എന്നു പേരുള്ള ഒരു ദരിദ്രൻ വ്രണങ്ങൾ നിറഞ്ഞ ശരീരവുമായി കിടന്നിരുന്നു. ധനികന്റെ മേശയിൽനിന്നു വീഴുന്ന ഭക്ഷണാവശിഷ്ടങ്ങൾകൊണ്ട് വയറുനിറയ്ക്കാൻ അവൻ കൊതിച്ചിരുന്നു. നായ്ക്കൾപോലും വന്ന് അവന്റെ വ്രണങ്ങൾ നക്കുമായിരുന്നു.” ലൂക്കാ 16:19–21
ഈ കഥ ഇത്രയധികം ശക്തമായി നമ്മെ സ്വാധീനിക്കുന്നതിന്റെ ഒരു കാരണം ധനികനും ലാസറും തമ്മിൽ വ്യക്തമായി വരച്ചുകാട്ടുന്ന വൈരുധ്യമാണ്. മുകളിലെ ഭാഗത്തു മാത്രമല്ല, അവരുടെ ഓരോരുത്തരുടെയും ജീവിതത്തിന്റെ അന്തിമഫലത്തിലും ഈ വൈരുധ്യം കാണാം.
ആദ്യത്തെ വൈരുധ്യം നോക്കുമ്പോൾ, ധനികന്റെ ജീവിതം കൂടുതൽ അഭികാമ്യമായി തോന്നുന്നു, പുറമേനിന്നു നോക്കുമ്പോഴെങ്കിലും. അവൻ സമ്പന്നനാണ്, താമസിക്കാൻ വീടുണ്ട്, മേൽത്തരം വസ്ത്രങ്ങൾ ധരിക്കുന്നു, ദിവസവും സമൃദ്ധമായി ഭക്ഷിക്കുന്നു. നേരെമറിച്ച്, ലാസർ ദരിദ്രനാണ്; അവനു വീടോ ഭക്ഷണമോ ഇല്ല, ശരീരം നിറയെ വ്രണങ്ങളാണ്. നായ്ക്കൾ അവന്റെ മുറിവുകൾ നക്കുന്നതിന്റെ അപമാനംപോലും അവൻ സഹിക്കുന്നു. ഇവരിൽ ആരായിരിക്കാനാണ് നിങ്ങൾ ആഗ്രഹിക്കുക?
ആ ചോദ്യത്തിന് ഉത്തരം പറയുന്നതിനുമുമ്പ് രണ്ടാമത്തെ വൈരുധ്യം പരിഗണിക്കുക. ഇരുവരും മരിക്കുമ്പോൾ, തികച്ചും വ്യത്യസ്തമായ നിത്യഗതികളാണ് അവർ അനുഭവിക്കുന്നത്. ദരിദ്രൻ മരിച്ചപ്പോൾ അവനെ “ദൈവദൂതന്മാർ കൊണ്ടുപോയി.” ധനികൻ മരിച്ചപ്പോൾ അവൻ പാതാളത്തിലേക്കു പോയി; അവിടെ നിരന്തരമായ പീഡനമുണ്ടായിരുന്നു. അതിനാൽ വീണ്ടും ചോദിക്കട്ടെ, ഇവരിൽ ആരായിരിക്കാനാണ് നിങ്ങൾ ആഗ്രഹിക്കുക?
ജീവിതത്തിൽ നമ്മെ ഏറ്റവും വശീകരിക്കുകയും വഞ്ചിക്കുകയും ചെയ്യുന്ന യാഥാർഥ്യങ്ങളിലൊന്നാണ് സമ്പത്തിന്റെയും ആഡംബരത്തിന്റെയും സുഖസൗകര്യങ്ങളുടെയും ആകർഷണം. ഭൗതികലോകം അതിൽത്തന്നെ തിന്മയല്ലെങ്കിലും, അതോടൊപ്പം വലിയ പ്രലോഭനവുമുണ്ട്. വാസ്തവത്തിൽ, സമ്പത്തിന്റെ ആകർഷണവും അത് ആത്മാവിൽ ചെലുത്തുന്ന സ്വാധീനവും അവഗണിക്കാനാവില്ലെന്ന് ഈ കഥയിൽനിന്നും ഈ വിഷയത്തെക്കുറിച്ചുള്ള യേശുവിന്റെ മറ്റു പല പ്രബോധനങ്ങളിൽനിന്നും വ്യക്തമാണ്. ഈ ലോകത്തിലെ വസ്തുക്കളാൽ സമ്പന്നരായവർ, മറ്റുള്ളവർക്കുവേണ്ടി ജീവിക്കുന്നതിനുപകരം തങ്ങൾക്കുവേണ്ടി ജീവിക്കാൻ പലപ്പോഴും പ്രലോഭിതരാകുന്നു. ഈ ലോകത്തിനു നൽകാനാകുന്ന എല്ലാ സുഖസൗകര്യങ്ങളും ഒരാൾക്കുണ്ടാകുമ്പോൾ, മറ്റുള്ളവരെക്കുറിച്ച് കരുതലില്ലാതെ ആ സുഖങ്ങൾ ആസ്വദിച്ചുകഴിയുക എളുപ്പമാണ്. ഈ രണ്ടു മനുഷ്യരും തമ്മിൽ നേരിട്ടു പറയാതെ സൂചിപ്പിക്കുന്ന വൈരുധ്യം വ്യക്തമായും അതുതന്നെയാണ്.
ദരിദ്രനായിരുന്നെങ്കിലും, ജീവിതത്തിൽ യഥാർഥത്തിൽ വിലയുള്ള കാര്യങ്ങളിൽ ലാസർ സമ്പന്നനാണെന്നു വ്യക്തമാണ്. അവനു ലഭിച്ച നിത്യപ്രതിഫലം ഇതിനു തെളിവാണ്. ഭൗതികമായ ദാരിദ്ര്യത്തിനിടയിലും അവൻ ഉപവിയിൽ സമ്പന്നനായിരുന്നുവെന്നു വ്യക്തമാണ്. ഈ ലോകത്തിലെ വസ്തുക്കളാൽ സമ്പന്നനായിരുന്ന മനുഷ്യൻ ഉപവിയിൽ ദരിദ്രനായിരുന്നു എന്നതും വ്യക്തമാണ്. അതിനാൽ, ഭൗതികജീവൻ നഷ്ടപ്പെട്ടപ്പോൾ കൂടെ കൊണ്ടുപോകാൻ അവന് ഒന്നുമുണ്ടായിരുന്നില്ല. നിത്യജീവിതത്തിനുള്ള പുണ്യമില്ല. ഉപവിയില്ല. ഒന്നുമില്ല.
ജീവിതത്തിൽ നിങ്ങൾ ആഗ്രഹിക്കുന്നതെന്താണെന്ന് ഇന്ന് വിചിന്തനം ചെയ്യുക. ഭൗതികസമ്പത്തും ലൗകികസ്വത്തുക്കളും നൽകുന്ന വഞ്ചനാപരമായ ആകർഷണങ്ങൾ മിക്കപ്പോഴും നമ്മുടെ ആഗ്രഹങ്ങളെ നിയന്ത്രിക്കുന്നു. വാസ്തവത്തിൽ, വളരെ കുറച്ചു മാത്രം ഉള്ളവർക്കുപോലും അനാരോഗ്യകരമായ ഈ ആഗ്രഹങ്ങളിൽ എളുപ്പം മുഴുകിപ്പോകാം. പകരം, നിത്യമായവ മാത്രം ആഗ്രഹിക്കാൻ പരിശ്രമിക്കുക. ദൈവസ്നേഹവും അയൽക്കാരനോടുള്ള സ്നേഹവും ആഗ്രഹിക്കുക. ഇതു നിങ്ങളുടെ ജീവിതത്തിലെ ഏക ലക്ഷ്യമാക്കുക. അപ്പോൾ, നിങ്ങളുടെ ജീവിതം പൂർത്തിയാകുമ്പോൾ നിങ്ങളെയും ദൈവദൂതന്മാർ കൊണ്ടുപോകും.
യഥാർഥ സമ്പത്തിന്റെ നാഥനായ എന്റെ കർത്താവേ, യഥാർഥ സമ്പത്ത് ഭൗതികധനത്തിലൂടെയല്ല, സ്നേഹത്തിലൂടെയാണ് ലഭിക്കുന്നതെന്നതിന്റെ അടയാളമായി അങ്ങ് ഈ ലോകത്തിൽ ദരിദ്രനായിരിക്കാൻ തിരഞ്ഞെടുത്തു. എന്റെ ദൈവമേ, എന്റെ സർവസ്വവുംകൊണ്ട് അങ്ങയെ സ്നേഹിക്കാനും, അങ്ങ് മറ്റുള്ളവരെ സ്നേഹിക്കുന്നതുപോലെ അവരെ സ്നേഹിക്കാനും എന്നെ സഹായിക്കണമേ. ആത്മീയസമ്പത്ത് എന്റെ ജീവിതത്തിലെ ഏക ലക്ഷ്യമാക്കാനുള്ള ജ്ഞാനം എനിക്കു നൽകണമേ; അങ്ങനെ നിത്യത മുഴുവൻ ഈ സമ്പത്ത് ആസ്വദിക്കാൻ എനിക്കിടയാകട്ടെ. യേശുവേ, ഞാൻ അങ്ങയിൽ ശരണപ്പെടുന്നു.
കുരിശിൻ ചുവട്ടിൽ 40 ദിനങ്ങൾ – വിചിന്തനം പതിനഞ്ച് – ദൈവവചനം ശ്രവിക്കുകയും പാലിക്കുകയും ചെയ്യുക
ദൈവകരുണയെക്കുറിച്ചുള്ള വിചിന്തനങ്ങൾ
നോമ്പുകാലത്തേക്കുള്ള തിരുവചന ധ്യാനങ്ങൾ
ഇന്നത്തെ വിശുദ്ധൻ – വിശുദ്ധ കാസിമിർ
വിശുദ്ധ കുർബാനയിലെ വായനകൾക്കുള്ള തിരഞ്ഞെടുപ്പുകൾ
