സൗഖ്യം തേടി

ഫെബ്രുവരി 6, 2023
ആണ്ടുവട്ടത്തിലെ അഞ്ചാം വാരത്തിലെ തിങ്കളാഴ്ച
ഇന്നത്തെ വായനകൾ

രക്തസാക്ഷികളായ വിശുദ്ധ പോൾ മിക്കിയും സഹചാരികളും—അനുസ്മരണം

വീഡിയോ

അവൻ പ്രവേശിച്ച ഗ്രാമങ്ങളിലും പട്ടണങ്ങളിലും നാട്ടിൻപുറങ്ങളിലുമെല്ലാം അവർ രോഗികളെ ചന്തസ്ഥലങ്ങളിൽ കിടത്തി, അവന്റെ മേലങ്കിയുടെ തൊങ്ങലിലെങ്കിലും തൊടാൻ അനുവദിക്കണമെന്ന് അവനോട് അപേക്ഷിച്ചു; അതിൽ തൊട്ടവരെല്ലാം സുഖം പ്രാപിച്ചു. മർക്കോസ് 6:56

യേശു രോഗികളെ സുഖപ്പെടുത്തുന്നതിനു സാക്ഷിയാകുന്നത് തീർച്ചയായും വിസ്മയഭരിതമായ ഒരു അനുഭവമായിരുന്നിരിക്കണം. അതിനു സാക്ഷികളായവർ അതുപോലൊന്ന് മുമ്പൊരിക്കലും കണ്ടിട്ടില്ലെന്നു വ്യക്തമാണ്. രോഗികൾക്കും രോഗികളായ പ്രിയപ്പെട്ടവരുള്ളവർക്കും ഓരോ രോഗശാന്തിയും അവരുടെയും അവരുടെ മുഴുവൻ കുടുംബത്തിന്റെയും ജീവിതത്തിൽ ശക്തമായ സ്വാധീനം ചെലുത്തിയിരുന്നിരിക്കണം.

ഇന്ന്, അനേകം രോഗങ്ങൾ ചികിത്സിക്കാനുള്ള ആധുനിക വൈദ്യശാസ്ത്രത്തിന്റെ കഴിവ് രോഗം വരുന്നതിനെക്കുറിച്ചുള്ള ഭയവും ഉത്കണ്ഠയും കുറച്ചിട്ടുണ്ട്. എന്നാൽ യേശുവിന്റെ കാലത്ത് ഗുരുതരമായ രോഗം ഇതിലേറെ ആശങ്കയ്ക്കു കാരണമായിരുന്നു. അതുകൊണ്ടുതന്നെ, തങ്ങളുടെ രോഗികൾക്ക് സൗഖ്യം ലഭിക്കേണ്ടതിന് അവരെ യേശുവിന്റെ അടുക്കൽ കൊണ്ടുവരാനുള്ള ആഗ്രഹം അനേകം ആളുകളിൽ വളരെ ശക്തമായിരുന്നു. “അവന്റെ മേലങ്കിയുടെ തൊങ്ങലിൽ മാത്രം തൊട്ട്” സൗഖ്യം പ്രാപിക്കാനായി യേശുവിന്റെ അടുക്കലെത്താൻ ഈ ആഗ്രഹം അവരെ പ്രേരിപ്പിച്ചു. യേശു അവരെ നിരാശരാക്കിയില്ല.

യേശു നൽകിയ ശാരീരിക സൗഖ്യങ്ങൾ രോഗികളോടും അവരുടെ കുടുംബങ്ങളോടും കാണിച്ച സ്നേഹപ്രവൃത്തികളായിരുന്നു എന്നതിൽ സംശയമില്ല. എങ്കിലും, യേശു ചെയ്ത കാര്യങ്ങളിൽ ഏറ്റവും പ്രധാനപ്പെട്ടത് അവയായിരുന്നില്ല എന്നത് വ്യക്തമാണ്. ആ വസ്തുത നാം സ്വയം ഓർമ്മിപ്പിക്കേണ്ടത് പ്രധാനമാണ്. തന്റെ വചനം ശ്രവിക്കാനും ഒടുവിൽ പാപമോചനത്തിലൂടെ ആത്മീയസൗഖ്യം സ്വീകരിക്കാനും ജനങ്ങളെ ഒരുക്കുക എന്നതായിരുന്നു യേശു നൽകിയ സൗഖ്യങ്ങളുടെ പ്രാഥമിക ലക്ഷ്യം.

നിങ്ങളുടെ സ്വന്തം ജീവിതത്തിൽ, നിങ്ങൾ ഗുരുതരമായ രോഗബാധിതനാകുകയും ശാരീരിക രോഗശാന്തിയോ പാപമോചനമെന്ന ആത്മീയസൗഖ്യമോ തിരഞ്ഞെടുക്കാൻ അവസരം ലഭിക്കുകയും ചെയ്താൽ, നിങ്ങൾ ഏതു തിരഞ്ഞെടുക്കും? തീർച്ചയായും, നിങ്ങളുടെ പാപങ്ങൾക്കു മാപ്പു ലഭിക്കുന്നതിലൂടെയുള്ള ആത്മീയസൗഖ്യത്തിന് അനന്തമായി കൂടുതൽ മൂല്യമുണ്ട്. അത് നിത്യത മുഴുവൻ നിങ്ങളുടെ ആത്മാവിൽ ഫലമുളവാക്കും. അത്യന്തം ശ്രേഷ്ഠമായ ഈ സൗഖ്യം നമുക്കെല്ലാവർക്കും, പ്രത്യേകിച്ച് അനുരഞ്ജന കൂദാശയിൽ, ലഭ്യമാണ് എന്നതാണു സത്യം. ആ കൂദാശയിൽ, ഒരർത്ഥത്തിൽ പറഞ്ഞാൽ, “അവന്റെ മേലങ്കിയുടെ തൊങ്ങലിൽ തൊടാനും” ആത്മീയസൗഖ്യം പ്രാപിക്കാനും നാം ക്ഷണിക്കപ്പെടുന്നു. അതുകൊണ്ട്, യേശുവിന്റെ കാലത്തെ ജനങ്ങൾക്കു ശാരീരിക രോഗശാന്തിക്കുവേണ്ടി ഉണ്ടായിരുന്നതിനെക്കാൾ ഏറെ ആഴമായ ആഗ്രഹം, കുമ്പസാരക്കൂട്ടിൽ യേശുവിനെ തേടാൻ നമുക്കുണ്ടാകണം. എന്നിട്ടും, നമുക്ക് ഇത്ര ഉദാരമായി നൽകപ്പെടുന്ന ദൈവത്തിന്റെ കരുണയുടെയും സൗഖ്യത്തിന്റെയും അമൂല്യദാനം നാം പലപ്പോഴും അവഗണിക്കുന്നു.

ഈ സുവിശേഷസംഭവത്തിലെ ജനങ്ങളുടെ ഹൃദയങ്ങളിലുണ്ടായിരുന്ന ആഗ്രഹത്തെക്കുറിച്ച് ഇന്ന് ധ്യാനിക്കുക. പ്രത്യേകിച്ച്, ഗുരുതരമായ രോഗബാധിതരായവരെയും സൗഖ്യം തേടി യേശുവിന്റെ അടുത്തെത്താനുള്ള അവരുടെ തീവ്രമായ ആഗ്രഹത്തെയും കുറിച്ച് ചിന്തിക്കുക. നിങ്ങളുടെ ആത്മാവിന് അത്യന്താപേക്ഷിതമായ ആത്മീയസൗഖ്യങ്ങൾക്കായി നമ്മുടെ കർത്താവിന്റെ അടുത്തേക്ക് ഓടിയെത്താൻ നിങ്ങളുടെ ഹൃദയത്തിലുള്ള ആഗ്രഹവുമായി—അല്ലെങ്കിൽ ആഗ്രഹത്തിന്റെ അഭാവവുമായി—അവരുടെ ഹൃദയങ്ങളിലെ ആ ആഗ്രഹത്തെ താരതമ്യം ചെയ്യുക. പ്രത്യേകിച്ച് അനുരഞ്ജന കൂദാശയിലൂടെ നിങ്ങൾക്കു ലഭിക്കുന്ന ഈ സൗഖ്യത്തിനായി കൂടുതൽ ആഴമായ ആഗ്രഹം വളർത്താൻ ശ്രമിക്കുക.

എനിക്കു സൗഖ്യം നൽകുന്ന കർത്താവേ, വിശേഷിച്ച് അനുരഞ്ജന കൂദാശയിലൂടെ അങ്ങ് എനിക്കു നിരന്തരം നൽകുന്ന ആത്മീയസൗഖ്യത്തിനായി ഞാൻ അങ്ങേക്കു നന്ദി പറയുന്നു. കുരിശിലെ അങ്ങയുടെ പീഡാസഹനത്താൽ എന്റെ പാപങ്ങൾ ക്ഷമിക്കപ്പെടുന്നതിനായി ഞാൻ അങ്ങേക്കു നന്ദി പറയുന്നു. എനിക്കു ലഭിക്കാവുന്ന ഏറ്റവും വലിയ ദാനമായ പാപമോചനം സ്വീകരിക്കാൻ അങ്ങയുടെ അടുക്കൽ വരുന്നതിനുള്ള കൂടുതൽ തീക്ഷ്ണമായ ആഗ്രഹത്താൽ എന്റെ ഹൃദയം നിറയ്ക്കണമേ. ഈശോയേ, ഞാൻ അങ്ങയിൽ ശരണപ്പെടുന്നു.

കൂടുതൽ സുവിശേഷ വിചിന്തനങ്ങൾ

ദൈവകരുണയെക്കുറിച്ചുള്ള വിചിന്തനങ്ങൾ

എല്ലാ വിശുദ്ധരും/തിരുനാളുകളും

ഇന്നത്തെ വിശുദ്ധർ – രക്തസാക്ഷികളായ വിശുദ്ധ പോൾ മിക്കിയും സഹചരരും

വിശുദ്ധ കുർബാനയിലെ വായനകൾക്കുള്ള തിരഞ്ഞെടുപ്പുകൾ

മുകളിൽ നൽകിയിരിക്കുന്ന മുഖ്യചിത്രം: ക്രിസ്തു രോഗികൾക്കു സൗഖ്യം നൽകുമ്പോൾ ജനക്കൂട്ടങ്ങൾ ഒത്തുകൂടുന്നു. ടി. ഫിൽ തയ്യാറാക്കിയ കൊത്തുചിത്രം, വിക്കിമീഡിയ കോമൺസ് വഴി