मराठी

देवाचा आवाज ओळखणे

१२ मे २०२५
पुनरुत्थान काळातील चौथ्या आठवड्याचा सोमवार
आजची वाचने

संत नेरेउस आणि अखिल्लेउस, रक्तसाक्षी — ऐच्छिक स्मरण

संत पंक्रास, रक्तसाक्षी — ऐच्छिक स्मरण

कॅडेटग्रे, CC BY-SA 3.0, विकिमीडिया कॉमन्समार्फत

व्हिडिओ

“पण जो दारातून आत येतो, तो मेंढरांचा मेंढपाळ आहे. द्वारपाल त्याच्यासाठी दार उघडतो आणि मेंढरे त्याचा आवाज ऐकतात. मेंढपाळ आपल्या मेंढरांना नावाने हाक मारतो आणि त्यांना बाहेर घेऊन जातो. आपल्या सर्व मेंढरांना बाहेर काढल्यावर तो त्यांच्यापुढे चालतो आणि मेंढरे त्याच्या मागे जातात, कारण ती त्याचा आवाज ओळखतात.” योहान 10:2–4

तुम्ही मेंढपाळाचा आवाज ओळखता का? तो तुम्हाला दररोज मार्ग दाखवून आपल्या पवित्र इच्छेनुसार चालायला शिकवतो का? तो रोज जे सांगतो, ते तुम्ही किती लक्षपूर्वक ऐकता? मनन करण्यासारखे हे काही अत्यंत महत्त्वाचे प्रश्न आहेत.

देवाचा आवाज ओळखणे अनेकांना कठीण जाते. दररोज कितीतरी ‘आवाज’ आपले लक्ष वेधून घेण्याचा प्रयत्न करतात. ठळक बातम्यांपासून मित्रमैत्रिणींच्या व कुटुंबीयांच्या मतांपर्यंत, आजूबाजूच्या लौकिक जगातील मोहांपासून आपण स्वतः बनवलेल्या मतांपर्यंत, कितीतरी ‘आवाज’ आणि ‘विचार’ आपले मन भरून टाकतात. त्यांतला फरक ओळखणे कठीण जाऊ शकते. यातले काय देवाकडून येते? आणि काय इतर स्रोतांकडून येते?

देवाचा आवाज ओळखणे खरोखरच शक्य आहे. सर्वप्रथम, देवाने आपल्याला सर्वांना लागू होणारी अनेक सत्ये आधीच सांगितली आहेत. उदाहरणार्थ, पवित्र शास्त्रात जे काही आहे, त्यातून देवाचा आवाज आपल्याला ऐकू येतो. त्याचे वचन जिवंत आहे. पवित्र शास्त्र वाचत गेल्यावर देवाचा आवाज आपल्या अधिकाधिक ओळखीचा होतो.

देव आपल्याशी हळुवार प्रेरणांमधूनही बोलतो आणि त्यांतून तो आपल्याला शांती देतो. उदाहरणार्थ, एखादा निर्णय घ्यायचा असेल, तर तो प्रार्थनेत आपल्या प्रभूसमोर मांडा आणि त्याची तुमच्याकडून जी काही अपेक्षा असेल ती स्वीकारायला तयार राहा. अनेकदा त्याचे उत्तर मनात खोलवर जाणवणाऱ्या, निःसंदिग्ध शांतीच्या रूपाने येते.

दैनंदिन जीवनात देवाचा आवाज ओळखायला शिकण्यासाठी मनाला एक सवय लावावी लागते: ऐकणे, आवाज ओळखणे, त्याला प्रतिसाद देणे, मग पुन्हा ऐकणे, ओळखणे आणि प्रतिसाद देणे. जितके तुम्ही देवाचा आवाज ऐकाल, तितका तो अगदी सूक्ष्म रीतीने बोलतो तेव्हाही तुम्हाला ओळखता येईल. आणि त्याच्या आवाजातील सूक्ष्म छटा जितक्या तुम्हाला ऐकू येऊ लागतील, तितके तुम्हाला त्याच्या मागे चालता येईल. शेवटी, मनाला आधार देणाऱ्या सखोल प्रार्थनेच्या सातत्यपूर्ण सवयीनेच हे साधते. ती सवय नसेल, तर मेंढपाळाची सर्वांत जास्त गरज असेल तेव्हाच त्याचा आवाज ओळखणे फार कठीण जाईल.

प्रार्थनेत तुम्ही देवाकडे किती लक्ष देता, यावर आज चिंतन करा. तुमची रोजची प्रार्थना कशी असते? आपल्या प्रभूचा सौम्य आणि सुंदर आवाज ऐकण्यासाठी तुम्ही दररोज वेळ देता का? त्याचा आवाज अधिकाधिक स्पष्टपणे ऐकू यावा, अशी साधना तुम्ही नियमितपणे करण्याचा प्रयत्न करता का? तसे नसेल आणि त्याचा आवाज ओळखणे तुम्हाला कठीण जात असेल, तर रोजची प्रार्थना अधिक सखोल करण्याचा निश्चय करा, जेणेकरून आपल्या प्रेमळ प्रभूचा आवाजच तुम्हाला दररोज मार्ग दाखवेल.

हे येशू, माझ्या उत्तम मेंढपाळा, तू माझ्याशी रोज बोलतोस. माझ्या जीवनासाठी असलेली तुझी परमपवित्र इच्छा तू मला सतत प्रकट करतोस. तुझा कोमल आवाज मला नेहमी ओळखता येऊ दे, म्हणजे जीवनातील आव्हानांतून जाताना मला तुझे मार्गदर्शन लाभेल. माझे प्रार्थनामय जीवन इतके सखोल आणि आधार देणारे होऊ दे की तुझा आवाज माझ्या हृदयात आणि आत्म्यात सदैव घुमत राहो. हे येशू, माझा तुझ्यावर विश्वास आहे.

आपल्याला नवे पोप लाभले आहेत! पोप लिओ चौदावे यांच्यासाठी प्रार्थना

संत नेरेउस आणि अकिल्लेउस, रक्तसाक्षी

संत पँक्रस, रक्तसाक्षी

शुभवर्तमानावरील आणखी चिंतने

दैवी दयेवरील चिंतन

सर्व संत / सण

मिस्सातील वाचनांचे पर्याय