रविवार, 14 सप्टेंबर 2025
छायाचित्र स्रोत: अन्स्प्लॅश
देवाने जगावर इतके प्रेम केले की त्याने आपला एकुलता एक पुत्र दिला, यासाठी की त्याच्यावर विश्वास ठेवणाऱ्या कोणाचाही नाश होऊ नये, तर त्याला सार्वकालिक जीवन मिळावे. कारण देवाने आपल्या पुत्राला जगात पाठवले ते जगाला दोषी ठरवण्यासाठी नव्हे, तर त्याच्याद्वारे जगाचे तारण व्हावे म्हणून. योहान 3:16–17
जगाच्या तारणासाठी येशूने क्रुसावर आपले प्राण दिले नसते, तर क्रुसाकडे कधीही ‘गौरवाने’ पाहिले गेले नसते. क्रूस हे मुळात मृत्यूचे साधन आहे—भयंकर आणि हिंसक मृत्यूचे साधन. ते अपमानाचे आणि छळाचेही साधन आहे. तरीही आज क्रूस पवित्र आणि आशीर्वादित मानला जातो. आपण घरात क्रूस लावतो, गळ्यात घालतो, जपमाळेच्या टोकाला असलेला क्रूस खिशात ठेवतो आणि क्रुसासमोर प्रार्थनेत वेळ घालवतो. क्रूस आता एक गौरवशाली प्रतीक आहे; त्याद्वारे आपण प्रार्थनेत देवाकडे वळतो आणि स्वतःला त्याच्या स्वाधीन करतो. पण हे केवळ यामुळेच शक्य झाले की क्रुसावरच आपले तारण झाले आणि आपल्याला सार्वकालिक जीवन लाभले.
क्षणभर थांबून या विलक्षण सत्याचा विचार करा: छळ व मृत्यू घडवून आणणाऱ्या सर्वांत भयंकर साधनांपैकी एक आज पृथ्वीवरील सर्वांत पवित्र प्रतीकांपैकी एक मानले जाते. ही गोष्ट विस्मयचकित करणारी आहे. हे उमगले की देवाला काहीही अशक्य नाही, याची जाणीव आपल्याला व्हायला हवी. देव अगदी वाईटातल्या वाईट गोष्टीचाही उपयोग करून तिचे रूपांतर सर्वांत उत्तम गोष्टीत करू शकतो. तो मृत्यूतून जीवन फुलवू शकतो.
आजचा ‘पवित्र क्रुसाच्या गौरवाचा सण’ आपण साजरा करतो, तो सर्वप्रथम पित्याने आपल्या दैवी पुत्राच्या ठायी जे कार्य केले त्याबद्दल पित्याचा गौरव करण्यासाठी. त्याचबरोबर या सणातून आपण नम्रपणे हेही समजून घेतले पाहिजे की जीवनात आपण सहन करत असलेल्या प्रत्येक क्रुसाला देव ‘गौरव’ देऊ शकतो आणि त्यातून विपुल कृपा देऊ शकतो.
तुमचा सर्वांत जड क्रूस कोणता आहे? तुमच्या सर्वांत मोठ्या दुःखाचे कारण काय आहे? त्याची आठवण झाली तरी बहुधा तुम्हाला वेदना होत असतील. बहुतेकदा आपण आपले क्रूस आणि दुःखे यांतून सुटका करून घेण्याचा प्रयत्न करतो. जीवनात आनंद नाही, याचा दोष आपण सहजपणे या क्रुसांना देतो. अमुक एक गोष्ट बदलली किंवा नाहीशी झाली, तर आपले जीवन अधिक चांगले होईल, असे आपल्याला सहज वाटते. मग तुमच्या जीवनातला तो क्रूस कोणता?
खरे तर तुमचा सर्वांत जड क्रूस कोणताही असो, तो तुमच्या जीवनात आणि जगात कृपेचा खरा स्रोत होण्याची विलक्षण शक्यता आहे. पण हे तेव्हाच शक्य आहे, जेव्हा तुम्ही तो क्रूस श्रद्धेने आणि आशेने स्वीकारता. मग आपला प्रभू तो आपल्या क्रुसाशी एकरूप करू शकतो आणि तुमच्या क्रुसांनाही ख्रिस्ताच्या क्रुसाच्या गौरवात सहभागी होता येते. हे श्रद्धेचे अतिशय गहन रहस्य आहे, तसेच आपल्या श्रद्धेतील एक अतिशय गहन सत्यही आहे.
आज तुम्ही स्वतः वाहत असलेल्या क्रुसांवर चिंतन करा. त्यांच्याकडे ओझे म्हणून न पाहण्याचा प्रयत्न करा. त्याऐवजी, त्यांच्यात दडलेली शक्यता ओळखा. प्रार्थनापूर्वक त्यांच्याकडे पाहा: ते तुम्हाला ख्रिस्ताच्या क्रुसात सहभागी होण्याचे आमंत्रण देतात. आपल्या क्रुसांना ‘हो’ म्हणा. स्वेच्छेने त्यांचा स्वीकार करा. ते ख्रिस्ताच्या क्रुसाशी एकरूप करा. तुम्ही ते स्वेच्छेने स्वीकारता, तेव्हा त्यांच्याद्वारे देवाचे वैभव तुमच्या जीवनात आणि जगात प्रकट होईल, अशी आशा बाळगा. देवाच्या परिवर्तन घडवणाऱ्या सामर्थ्याने या ‘ओझ्यांचे’ रूपांतर होईल आणि ती तुमच्या जीवनात गौरवाचा स्रोत बनतील, हे जाणून घ्या.
हे माझ्या गौरवशाली प्रभू, माझ्या गरजेच्या वेळी, तारण करण्याच्या तुझ्या दैवी सामर्थ्यावर पूर्ण श्रद्धा ठेवून मी तुझ्याकडे धाव घेत आहे. तुझ्यावर आशा आणि श्रद्धा ठेवून माझ्या जीवनातील प्रत्येक क्रूस पूर्णपणे स्वीकारण्यासाठी मला आवश्यक ती कृपा दे. माझ्या जीवनातील क्रुसांचे असे रूपांतर कर की त्यांच्याद्वारे तुझा गौरव होईल आणि ते तुझ्या गौरवाचे व कृपेचे साधन बनतील. हे येशू, माझा तुझ्यावर विश्वास आहे.
दुःखित माता मरियेची नोवेना
परंपरेनुसार 7–15 सप्टेंबर या काळात ही नोवेना केली जाते
आजचा सण – पवित्र क्रुसाचा गौरव
सामान्य काळासाठी पवित्र शास्त्रावरील चिंतन




