मराठी

ख्रिस्ताने आपल्याला पाठवले आहे

मंगळवार, 28 ऑक्टोबर 2025

संत सायमन आणि संत ज्यूड या प्रेषितांचा सण

आजची वाचने

उगोलिनो दी नेरिओ, सार्वजनिक मालकी, विकिमीडिया कॉमन्समार्फत

व्हिडिओ

येशू प्रार्थना करण्यासाठी डोंगरावर गेला आणि त्याने सारी रात्र देवाची प्रार्थना करण्यात घालवली. दिवस उजाडल्यावर त्याने आपल्या शिष्यांना जवळ बोलावले आणि त्यांच्यापैकी बारा जणांना निवडले. त्यांना त्याने ‘प्रेषित’ असेही नाव दिले…  लूक 6:12

येशूने स्वतः आपले प्रेषित होण्यासाठी ज्या मोजक्या शिष्यांना निवडले, त्यांच्यात शिमोन आणि यहूदा यांचा समावेश होता. आजचे संत शिमोन म्हणजे शिमोन पेत्र नव्हेत, आणि आजचे संत यहूदा म्हणजे यहूदा इस्कार्योत नव्हेत. या दोन्ही प्रेषितांविषयी फार थोडी माहिती उपलब्ध आहे. शुभवर्तमानांत शिमोनचा उल्लेख ‘झीलोट’ असा केला आहे. याचा अर्थ असा असू शकतो की ते यहुदी धर्मातील एखाद्या अधिक कट्टर पंथाचे सदस्य होते. आशा उरली नाही अशा संकटांत सापडलेल्यांचे आश्रयदाते संत म्हणून यहूदा ओळखले जातात. काहींच्या मते, सुरुवातीच्या ख्रिस्ती श्रद्धावंतांना त्यांचे नाव घेताच येशूचा विश्वासघात करणाऱ्या यहूदा इस्कार्योतची आठवण येत असे, कारण दोघांचे नाव एकच होते. त्यामुळे प्रेषितांची मध्यस्थी मागताना ते बहुधा संत यहूदांकडे शेवटी वळत असत. असे असेल तर, देवाच्या व्यवस्थेनुसार, ज्या प्रेषिताची मध्यस्थी सर्वांत शेवटी मागितली जात असे, तेच अनेकांची शेवटची आशा बनले. अशा रीतीने, ज्यांच्या संकटातून सुटण्याची खरोखरच काही आशा उरली नव्हती, त्यांचे ते आश्रयदाते संत झाले.

एका परंपरेनुसार, रोमन कॅननमध्ये संत शिमोन आणि संत यहूदा यांचा एकत्र उल्लेख केला जातो आणि त्यांचा सणही एकाच दिवशी साजरा होतो. याचे कारण असे सांगितले जाते की दोघांनाही एकाच दिवशी, एकत्र हौतात्म्य आले. हे कदाचित सीरिया, लेबनॉन किंवा पर्शिया येथे घडले असावे. मात्र त्यांच्या सुवार्ताप्रसाराच्या प्रवासांचा आणि हौतात्म्याचा नेमका तपशील स्पष्ट नाही. पण त्यांच्याविषयी एक गोष्ट निश्चित आहे : ते प्रेषित होते. आपल्या प्रभूने त्यांना निवडले, आपल्या ख्रिस्तसभेच्या पहिल्या बिशपांपैकी दोघे म्हणून त्यांची नेमणूक केली आणि पृथ्वीच्या टोकापर्यंत शुभवर्तमान पोहोचवण्याची आज्ञा त्यांना दिली.

आजच्या आपल्या दृष्टीने पाहता, त्या निवडलेल्या बारा जणांपैकी एक असणे हा केवढा मोठा बहुमान होता! त्यांच्या सेवाकार्यातून पहिले ख्रिस्ती समुदाय उभे राहिले आणि त्यातूनच आज जगभर पसरलेली आपली सार्वत्रिक कॅथलिक ख्रिस्तसभा साकारली. प्रभूशी एकनिष्ठ राहून त्यांनी केलेल्या सेवेचा जगावर किती मोठा परिणाम होईल, याची त्यांना बहुधा कल्पनाही नव्हती.

या दोन प्रेषितांचा सन्मान करताना आपल्याला याचीही आठवण होते की पृथ्वीच्या टोकापर्यंत जाऊन शुभवर्तमानाची घोषणा करण्यासाठी आपल्यापैकी प्रत्येकाला पाचारण केले आहे. ख्रिस्ताने आपल्यापैकी प्रत्येकाला दिलेल्या पाचारणानुसार आणि सोपवलेल्या कार्यानुसार आपण हे करतो. आपण ज्यांची सेवा करतो, त्यांच्या जीवनात सार्वकालिक बदल घडवण्याचे पाचारण आपल्यापैकी प्रत्येकाला आहे. आपण आपल्याला सोपवलेल्या कार्याशी एकनिष्ठ राहिलो, तर आपल्या प्रेषितीय सेवेचा प्रभाव जगाच्या अंतापर्यंत असंख्य लोकांच्या जीवनात जाणवत राहील, याची आपण खात्री बाळगू शकतो.

येशूने या दोघांना कसे निवडले आणि प्रेषित म्हणून त्यांची नेमणूक केली, यावर आज चिंतन करा. हे चिंतन करताना देवाचा आवाज ऐका, कारण तो तुमच्याशीही बोलत आहे. येशू तुमच्यावर जे कार्य सोपवतो, ते स्वीकारण्याचे महत्त्व कमी लेखू नका. या दोन प्रेषितांच्या पावलांवर पाऊल ठेवून येशूला ‘हो’ म्हणा. लक्षात ठेवा की अशा प्रकारे आपल्या प्रभूची सेवा करण्याचा तुमचा निर्णय केवळ तुमच्या जीवनावर मोठा परिणाम करणार नाही, तर इतर अनेकांच्या जीवनावरही त्याचा परिणाम अनंतकाळ टिकून राहील.

हे माझ्या गौरवशाली प्रभू, शिमोन आणि यहूदा या दोन साध्या माणसांना तू तुझे प्रेषित होण्यासाठी बोलावलेस. तू त्यांना तुझ्या कृपेने भरलेस, तुझ्या वचनाने त्यांना शिकवलेस आणि पृथ्वीच्या टोकापर्यंत शुभवर्तमानाची घोषणा करण्यासाठी त्यांना पाठवलेस. हे प्रिय प्रभू, तू ज्यांना निवडशील त्यांच्याकडे मलाही पाठव. तुझे साधन म्हणून माझा उपयोग कर. तुझ्याशी सदैव एकनिष्ठ राहून उत्साहाने गरजूंपर्यंत, विशेषतः ज्यांच्या जीवनात श्रद्धा आणि आशा यांचा अभाव आहे अशांपर्यंत पोहोचण्यासाठी मला मदत कर. संत शिमोन आणि संत यहूदा, आमच्यासाठी प्रार्थना करा. हे येशू, माझा तुझ्यावर विश्वास आहे.

अधिक वाचन – संत सायमन आणि संत ज्यूड हे प्रेषित

शुभवर्तमानावरील आणखी चिंतने

दैवी दयेवरील चिंतन

सामान्य काळासाठी पवित्र शास्त्रावरील चिंतन

सर्व संत / सण

मिस्सातील वाचनांचे पर्याय