27 Agosti 2020
Alhamisi ya Wiki ya Ishirini na Moja ya Mwaka
Masomo ya Leo
Sikiliza kwa Kiingereza
“Kesheni! Kwa maana hamjui Bwana wenu atakuja siku gani.” Mathayo 24:42
Je, ikiwa leo ndiyo siku hiyo?! Je, ungejua kwamba leo ndiyo siku ambayo Bwana wetu angerudi duniani katika fahari na utukufu Wake wote kuwahukumu wazima na wafu? Je, ungetenda tofauti? Yaelekea sisi sote tungefanya hivyo. Labda tungewasiliana na watu wengi kadiri tuwezavyo na kuwajulisha kwamba kurudi kwa Bwana kumekaribia sana, tungeenda kuungama, kisha tungetumia siku hiyo katika sala.
Lakini mwitikio bora zaidi kwa swali kama hilo ungekuwa upi? Ikiwa, kwa ufunuo maalumu kutoka kwa Mungu, ungejulishwa kwamba leo ndiyo siku ambayo Bwana angerudi, mwitikio bora zaidi ungekuwa upi? Baadhi ya watu wamesema kwamba mwitikio bora zaidi ni kuendelea na shughuli zako za siku kana kwamba ni siku nyingine yoyote. Kwa nini? Kwa sababu, kama inavyotupasa, sisi sote tunaishi kila siku kana kwamba ndiyo siku yetu ya mwisho, na kila siku tunazingatia maneno ya Maandiko Matakatifu yaliyo hapo juu. Tunajitahidi kila siku “kukesha” na kuwa tayari kwa kurudi kwa Bwana wetu wakati wowote. Ikiwa kweli tunayapokea na kuyaishi maneno haya ya Maandiko Matakatifu, basi haijalishi kama atarudi leo, kesho, mwakani au baada ya miaka mingi.
Lakini wito huu wa “kukesha” unahusu zaidi ya ujio wa mwisho wa Kristo katika utukufu. Unahusu pia kila wakati wa kila siku ambapo Bwana wetu anatujia kwa neema. Unahusu kila msukumo wa upendo na huruma Yake ndani ya mioyo na roho zetu. Unahusu minong’ono Yake mipole isiyokoma, inayotuita tumkaribie zaidi.
Je, unakuwa makini kumtambua anapokujia kwa njia hizi kila siku? Je, unazingatia njia zisizo na idadi ambazo anazitumia kutaka kuingia kwa ukamilifu zaidi katika maisha yako? Ingawa hatujui siku ambayo Bwana wetu atakuja katika ushindi Wake wa mwisho, tunajua kwamba kila siku na kila wakati wa kila siku ni wakati wa kuja Kwake kwa neema. Msikilize, uwe makini, uwe macho na ukeshe!
Bwana, nisaidie kuitafuta sauti Yako na kuwa makini kutambua uwepo Wako katika maisha yangu. Daima niwe macho na tayari kukusikia unaponiita. Yesu, nakutumainia.
Tafakari juu ya Huruma ya Mungu
Mtakatifu wa Siku – Mtakatifu Monika
Machaguo ya Masomo ya Misa Takatifu
